Наведвальніца кавярні Paul у цэнтры Мінска паскардзілася на паводзіны кандытаркі, якая, паводле яе слоў, аблізвала кандытарскі мяшок і пальцы падчас прыгатавання дэсертаў. Пасля скаргі ўстанову праверыла санслужба і выявіла парушэнні, паведамляе дзяржаўнае агенцтва «Мінск-Навіны».
Пра здарэнне ў кавярні Paul на Інтэрнацыянальнай, 21, мінчанка расказала ў Threads. Паводле яе слоў, падчас абеду яна сядзела побач з адкрытай кухняй, аддзеленай ад наведвальнікаў шклом, і назірала за працай кандытараў.
Яна назвала ўбачанае «захапляльным, але крыху шакавальным відовішчам». Паводле яе слоў, раней яна сама працавала ў сферы грамадскага харчавання і ведае, што можа адбывацца на кухні. Аднак жанчыну здзівіла, што кандытарка рабіла гэта проста перад наведвальнікамі.
У каментарыях прадстаўнікі Paul заявілі, што «не заўсёды ўсё, што здаецца відавочным, з’яўляецца такім насамрэч». Аднак падрабязных тлумачэнняў не далі.
На скаргу адрэагаваў Цэнтр гігіены і эпідэміялогіі Цэнтральнага раёна Мінска. 30 кастрычніка спецыялісты праверылі кавярню і выявілі парушэнні санітарна-эпідэміялагічных патрабаванняў.
«Пачаты адміністрацыйны працэс у дачыненні да адказнай службовай асобы таварыства з абмежаванай адказнасцю “Савана-Спорт Трэйдынг”», – паведамілі ў санітарнай службе.
Paul – міжнародная сетка французскіх кавярняў-пякарняў. У Мінску яна працуе па франшызе. Беларускі партнёр брэнда – кампанія «Савана-Спорт Трэйдынг», якая ўваходзіць у рэстаранны холдынг Union Hospitality Group.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
