Як правільна гатаваць дранікі? Аляксандр Гойшык – гэта вулічны артыст, вольны падарожнік і журналіст-фрылансер родам з Салігорска. Вось ужо амаль год ён ездзіць па Лацінскай Амерыцы і, каб не адвыкнуць ад дамашняй ежы, пастаянна гатуе дранікі. Днямі ён зрабіў допіс у Facebook, а ў ім – ідэальны рэцэпт беларускіх дранічкаў.
Ён год падарожнічае – і таму зразумеў, у чым праблема з класічнымі дранікамі
Аляксандр Гойшык
«Хто нам сказаў, што бульбу неабходна менавіта драць, прычым разам з пальцамі? – піша Аляксандр. – Хто дадумаўся да гэтага? Гэта наш самы вялікі беларускі падман! Маўляў, беларусу абавязкова трэба трохі пакутаў, інакш які з яго беларус!
За амаль што год у падарожжы мне надакучыла іхняя лацінская пайка (ну, апроч куркі хіба). Таму пры любой аказіі я сам гатую, каб нармальнай ежы паесці і людзей пачаставаць. За гэты час я дасягнуў сапраўднага дзэну і зразумеў рэцэпт ідэальных, простых і, самае галоўнае, хуткіх дранікаў».
А вось і той самы ідэальны рэцэпт дранікаў (на ўсё пра ўсё 15–20 хв.)
1. Тром бульбу на буйной тарцы, прычым не абавязкова ўсю цалкам.
2. Пакідаем «попкі».
3. Адціскаем масу ў друшляку.
4. Закідваем у блэндэр цыбулю і бульбяныя «попкі». Дадаём да адціснутай бульбы.
5. Убіваем яйка, соль і чорны перац. Смажым на сярэднім агні, пасля кладзём на хвіліну на сурвэтку.
6. Listo! Ніякіх пакутаў і танцаў з бубнамі! За 15–20 хвілін атрымліваецца сапраўдная боская рапсодыя і твор мастацтва, ад якога абсалютна ўсе ў захапленні! І чаму я не дадумаўся да гэтага раней?..
А што са смятанай?
«Нешта максімальна падобнае да нашай смятаны ў Лаціне называецца crema pura, сустракаецца яна ў Гватэмале і краінах CA-4 (Цэнтральна-Амерыканскі саюз Guatemala, El Salvador, Honduras y Nicaragua).
У іншых краінах Лаціны не сустракаў (не ўпэўнены наконт Мексікі). Але эмпірычным шляхам выявілася, што яшчэ лепш, чым смятана, з дранікамі спалучаецца queso crema (вяршковы сыр а-ля Philadelphia)».
Фота: Facebook.
