Адсвяткаваць Купалле і не толькі: куды пайсці ў выхадныя 7–9 ліпеня ў Мінску, Варшаве і Вільнюсе

А чаму б не адсвяткаваць Купалле за горадам? Збірайце сяброў і адпраўляйцеся на Аўгустоўскі канал – там будзе шмат цікавага.

У праграме: рэканструкцыя абраду і купальскае шэсце; карагоды і спевы вакол купальскага вогнішча, скокі праз вогнішча; майстар-клас па зборы зёлак і вырабе купальскіх вянкоў; дзявочыя варожбы на вянках і зеляніне; вандроўка па чароўную папараць-кветку; этнамарафон «Танцуем сваё, танцуем з асалодай».

Школа яхцінгу «Сила ветра» ладзіць начную гонку. І ўсё, што вам патрэбна для ўдзелу, – запісацца, апрануць сваю лепшую піжаму і прыехаць у месца збору. Удзельнічаць можна, нават калі ў вас няма аніякага досведу.

Пасля гонкі плануюць танчыць і весяліцца на беразе з напоямі і хот-догамі ад «Вершаў». А ўладальніку самай лепшай піжамы нават абяцаюць спецыяльны прыз.

Батанічны сад святкуе Купалле кожны год – і зараз зноў кліча пагрузіцца ў атмасферу купальскай магіі «Купальскія агні». Абяцаюць прыгожае старажытнае свята з усімі элементамі аўтэнтычнага святкавання, стварэнне старадаўніх славянскіх абярэгаў, пляценне вянкоў з кветак і траў, жывая музыка, карагоды і купальскія варожбы.

Свята ўпрыгожаць спецыяльныя госці: этнічны гурт Aratseya, фолк-гурт Krasa (Магілёў), ансамбль «Гуды», танцавальная праграма «Купальскі хіт» і ў завяршэнне праграмы – чароўнае фаер-шоу.

Тут зможаце знайсці вопратку, купальнікі, хусткі; упрыгaжэнні, сумкі, hand made-аксесуары; тэкстыль, свечкі, кераміку для дома; натуральную касметыку, рамесныя прадукты, кветкі і іншае.

Таксама будуць майстар-класы па пляценні купальскіх вянкоў і роспісы шопераў з нацыянальнымі беларускімі матывамі; прыгожыя фотазоны для атмасферных фатаграфій на памяць і пункт самаабслугоўвання з букетамі палявых кветак; стравы беларускай кухні ад бара «Агеньчык»; пачастункі для вашых хатніх жывёл, печыва з купальскімі прадказаннямі – і не толькі.

Гучны гарадскі аўтафестываль пройдзе ўжо ў гэтыя выхадныя. На паркінгу БЦ «Футурыс» разгорнецца маштабнае мерапрыемства з крутымі (як абяцаюць арганізатары) праектамі, дзе ў вас будзе магчымасць разгледзець усе тыя аўтамабілі, на якія вы заглядваліся ў горадзе.

Акрамя аўтамабіляў на пляцоўцы будуць фуд-корт, лаундж-зоны, гульнявая зона для дзяцей і незвычайныя зоны ад партнёраў мерапрыемства.

KaliLaska зноў ладзіць маркет – і зноў ён будзе працягвацца не чатыры дні, як гэта было раней, а цэлы тыдзень. Пачынаюць ужо ў гэту нядзелю. Абнаўляць асартымент будуць кожны дзень, таму знайсці штосьці цікавае можна будзе на працягу ўсяго тыдня – нават у апошні дзень.

А яшчэ дзякуючы таму, што барахолка будзе ісці доўга, людзей на пляцоўцы будзе менш – і шопінг будзе больш камфортным.

У Суле таксама будуць святкаваць Купалле: у пятніцу (з 20:00 да 24:00) вас чакае начная праграма, а ў суботу і нядзелю (з 14:00 да 17:00) – дзённая.

Клічуць вас варажыць, замаўляць зёлкавую гарбату, плесці вянкі, вадзіць карагоды, гуляць у старадаўні Tinder, спяваць, танчыць, скакаць праз вогнішча і шукаць папараць-кветку. Абяцаюць поўнае пагружэнне ў традыцыі і абрады, конкурсы з прызамі і вогненны настрой.

Аматары начной праграмы могуць загадзя забраніраваць нумар на ноч, каб пабачыць Сулу не толькі ноччу, але і на світанку. Тым больш што пры браніраванні нумара ў гатэлі ўваход у парк бясплатны.

Пра гэту выставу мы ўжо расказвалі, але нагадаем яшчэ раз: у чацвер, 6 ліпеня, у галерэі Міхаіла Савіцкага адкрываецца выстава пад адкрытым небам унікальных здымкаў старой Нямігі.

Ідэя стварэння гэтай выставы з’явілася дзякуючы дзіўнаму выпадку: супрацоўніца Музея гісторыі горада Мінска Яўгенія Стальмахова знайшла каля свайго пад’езда выкінутыя суседзямі фотастужкі. Гэта быў цэлы сямейны архіў, і супрацоўнікаў музея зацікавілі рэдкія віды старой забудовы вуліцы Нямігі да яе рэканструкцыі, якія таксама захаваліся на фотастужцы. Кадры былі алічбаваны, месцы фотаздымкаў вызначаны. Цяпер іх можна будзе ўбачыць на выставе.

«Вялікая папяровая выстава» – серыя прац мастака Мішы Дайліды. Гэта дзённік вырваных, выпадковых дзён жыцця, які адлюстроўвае пражыванне стану запаволенасці, ціхай радасці. Гэта свет спакою, камфорту і прымірэння мастака. Свет, куды можна сысці з галавой з імпульсіўнага знешняга жыцця.

Працуючы з такімі матэрыяламі, як папера, пастэль, гелевыя ручкі, алоўкі, мастак вызначае свой стыль як канцылярскі рэалізм і адлюстроўвае рэчаіснасць у сваіх працах, але дапаўняе іх своеасаблівым шармам.

Разам са слухачамі каманда «Паўгадзіны кардыё» абмяркуе, як жывецца жанчынам і мужчынам без стасункаў. Вядоўцы падзеляцца асабістым досведам і рэфлексіяй, а таксама раскажуць, з якімі стэрэатыпамі, жартамі і сацыяльным ціскам сутыкаюцца, пакуль не маюць сталага партнёра ці партнёркі.

Таксама закрануць тэму таго, як дзяржава намагаецца залезці да беларусаў і беларусак у ложак і задамінаваць у пытаннях адносінаў і сям’і.

Беларускія майстры і рамеснікі збяруцца разам на арт-маркеце «Ноч Купалы». Будзе шмат розных упрыгажэнняў, галаўных убораў, брошак, мыла ручной працы і свечак, ільняных тканін для дома, цішотак з прынтамі, паштовак, малюнкаў і нават вэнджаных прысмакаў.

А ўвечары, а 18-й гадзіне, запланаваны яшчэ і выступ гурта BELARUSIAN TRUESTORY.

У нядзелю Free Belarus Center ладзіць на беразе Віслы вялікі бясплатны Hučna Fest. Будзе шмат беларускай музыкі, СучБелЛіт, сучаснае мастацтва з актывізмам.

На сцэне выступяць Super Besse, Света Бень і Галя Чыкіс, Альгерд Бахарэвіч з новымі кніжкамі, Андрэй Хадановіч, Андрэй Янушкевіч і шмат хто яшчэ. На пляжы будуць нанасіць шаўкаграфіяй прынты, збіраць данаты на палітвязняў, гуляючы ў пінг-понг, і чыліць на сонечнай Вісле.

Летні кірмаш – гэта круты маркет handmade-рэчаў, дзе вы абавязкова знойдзеце нешта асабістае для сябе. Можна будзе набыць сучасныя аўтарскія ўпрыгажэнні, вязаныя і тэкстыльныя цацкі для дзяцей, дарослых і катоў, упрыгажэнні з пацерак, паетак і крышталёў, дызайнерскія нататнікі, японскія закладкі, вітражы, вітражныя лаўцы сонца і ўпрыгажэнні са шкла, футболкі з прынтамі беларускіх мастакоў, шаўковыя сукенкі і трэнчы, торбы, сукенкі, завушніцы, пано ў тэхніцы макрамэ і шмат чаго іншага.

Калі вы аб’ехалі паўсвету з 10 доларамі ў кішэні, ці знайшлі цікавую кавярню, якую ні ў якім разе нельга прамінуць у вандроўках, ці склалі маршрут, каб паглядзець усё-ўсё-ўсё ў горадзе за адзін дзень, то прыходзьце, хваліцеся і дзяліцеся адкрыццямі і дасягненнямі.

Магчыма, на сустрэчы знойдзеце сабе кампанію на сумесныя вандроўкі па Вільнюсе і яго ваколіцах, па Літве ці іншых краінах. Кожны зможа прапанаваць сваю тэму.

У нядзелю схадзіце на шпацыр са знакамітым Сяргеем Харэўскім «Вільня як форма духа». Наведаеце касцёл Святой Тройцы, у якім цяпер санктуарый славутага абраза Ісуса Міласэрнага, касцёл Святога Крыжа, у крыпце якога ёсць крыніца, убачыце цудадзейны абраз Маці Божай Снежнай. Зойдзеце ў вільнюскі Архікафедральны сабор, каб ушанаваць памяць Святога Казіміра.

І скончыце шпацыр на Лукішках, у касцёле Святых Піліпа і Якуба, дзе ўбачыце самы старажытны абраз у Вільнюсе – Маці Божай Лукішскай. А таксама будзеце разважаць, як гэтыя святыні і іх гісторыі былі адлюстраваны ў памяці пакаленняў і ў творчасці мастакоў і паэтаў.