Вялікая афіша на вялікія выхадныя: вось куды можна схадзіць 29 снежня – 2 студзеня ў Мінску, Варшаве, Вільнюсе і іншых гарадах, дзе жывуць беларусы

Цягам трох дзён у Мінску можна будзе ўзяць удзел у мерапрыемстве пад назвай «Калядная зорка Максіма», якое пазнаёміць ахвотных з гісторыяй аднаго з самых містычных святаў – Каляд.

Удзельнікаў чакае батлейка і ўдзел у вырабе каляднай зоркі і елачнай цацкі.

У батанічным садзе пройдзе вялікі сямейны кірмаш «Зімовы сад». Будзе анімацыйная праграма з любімымі і новымі героямі, фуд-зона, майстэрня Дзеда Мароза з майстар-класамі і займальныя конкурсы. Таксама вас чакаюць калядныя эльфы, Грынч, героі «Шчанячага патруля», «Фіксікі», Ганна і Эльза, Гары Потэр, Мікі і Міні Маус і іншыя.

Таксама абяцаюць кірмаш забаў і незабыўнае шоу.

Святочны кірмаш унікальных вырабаў ручной работы – падарункі, кераміка і тэкстыль, упрыгажэнні, яловы дэкор, ёлачныя і дзіцячыя цацкі, свежапрыгатаваныя дамашнія прысмакі, а таксама навагодняе меню і мора шампанскага, ёлка і музыка.

Прыбірайцеся, бярыце родных, сяброў, дзетак, каханых хвосцікаў і прыходзьце: купляць падарункі, загадваць жаданні, танчыць, вадзіць карагоды каля ёлкі, фатаграфавацца і зараджацца святочным настроем.

ГЦ Galileo запрашае дзяцей і іх бацькоў за навагоднім настроем. Дзед Мароз абяцае падарыць наведвальнікам зімовую казку і прыгожыя фота.

Акрамя таго, штодня ў гандлёвым цэнтры працуе пошта Дзядулі Мароза. Маленькія госці могуць напісаць ліст з самымі патаемнымі марамі і апусціць яго ў вялізную паштовую скрыню.

У снежаньскія і студзеньскія дні ў Дукорскі маёнтак вяртаюцца любімыя і доўгачаканыя героі Каляд: Каза, Чорт, Дзед і Баба.

Надышоў час збірання цукерак, але для гэтага спатрэбіцца прайсці шэраг традыцыйных выпрабаванняў і, вядома, патанчыць-паспяваць.

Таксама ў гэтыя дні наведвальнікаў чакаюць бясплатныя майстар-класы па саломапляценні і выцінанцы. Удзел уваходзіць у кошт білета.

Інтэрактыўны музей музыкі запрашае стаць героем самай каляднай казкі «Щелкунчик в мире музыки» – для дзяцей ад 3 да 8 гадоў.

Малыя змогуць акунуцца ў атмасферу зімовага свята і паслухаць добрую музычную казку з незвычайным гукавым суправаджэннем на музычных інструментах, а таксама прыняць удзел у творчым конкурсе, загадаць жаданне на каралеўскім троне, пачаставацца смачнымі ласункамі і атрымаць куфар з падарункамі!

Чакаюць хлопчыкаў і дзяўчынак, сняжынак і зайчыкаў, прынцэс і рыцараў – і іх бацькоў. Мерапрыемства праводзіцца ў малых групах да 7 дзяцей.

На выставе прадстаўлена калекцыя ёлачных цацак з усяго свету, якая штогод папаўняецца новымі ўнікальнымі экспанатамі. У Музеі ёлачных цацак кожнае дзіця зможа перанесціся ў чароўную навагоднюю казку, а дарослыя – вярнуцца ў дзяцінства.

Наведвальнікі змогуць пазнаёміцца з традыцыйнымі зімовымі святамі Беларусі, унікальнымі абрадамі і навагоднімі батлеечнымі інтэрмедыямі. Экспазіцыя раскажа гісторыю вытворчасці шкляных шароў і іншых упрыгажэнняў з сярэдзіны XIX стагоддзя да нашых дзён. Тут можна будзе адначасова пабываць у розных кутках свету: Конга, Перу, Інданезіі, Новай Зеландыі і Паўночнай Карэі. Навагоднія цацкі савецкага перыяду, якія сталі блізкімі і роднымі некалькім пакаленням, раскажуць дзецям пра традыцыі навагодніх свят у часы СССР. Адзін з акцэнтаў праекта – мініяцюрнае інтэрактыўнае каляднае мястэчка.

Фуд-пляцоўка Lidbeer Dvor адкрыла зімовы сезон і запрашае на промасэты з аўтарскімі глінтвейнамі, вялікі калядны маркет ад рамеснікаў і фермераў, кросінг падарункаў, майстар-класы і іншае. Адна фотазона ў стылі 90-х чаго каштуе! Тут вам і ёлка з савецкімі цацкамі, і дыван на сцяне, і адпаведная мэбля.

А яшчэ на пляцоўцы можна прыгожа запакаваць падарункі і, як звычайна, падсілкавацца чым-небудзь смачным.

Кожны дзень з 18:00 да 22:00 у батанічным садзе заззяе таямнічымі агнямі сад ліхтароў «Макра-мікра-мір» – дзіўныя і вялізныя светлавыя фігуры насякомых, якія дазваляюць стаць меншым, каб убачыць большае. Тут пчаліны вулей дасягае памеру двухпавярховага будынка, а павук у тысячу разоў большы за рэальны памер!

У выхадныя і святочныя дні дадаткова праходзіць фаер-неон-шоу (у 21:00). Таксама з 18:00 да 22:00 вы можаце наведаць экспазіцыйную аранжарэю.

Калі хочацца не толькі падняць сабе настрой, але і зрабіць прыгожыя святочныя фотакарткі для сацсетак, адпраўляцеся ў мінскія кавярні, кафе і рэстараны за цікавымі навагоднімі дэсертамі. Вось тут мы зрабілі падборку месцаў, дзе можна знайсці тэматычныя смакоцці: ад какавы з пернікавым чалавечкам да пірожных у выглядзе ёлачных цацак.

У пятніцу самая няспетая зорка беларускага андэрграўнда Сяргей Пукст дае вялікі канцэрт разам з выбухованебяспечным Вовам Агаянам на ўдарных. Не пашкодзіць зарадзіцца перад Новым годам.

«Беларускі моладзевы хаб» запрашае правесці апошнюю пятніцу года пад акорды беларускага музыканта Алеся Дзянісава. Музыка сыграе свае лепшыя хіты, а гледачы змогуць усе разам падпяваць. А можа, і патанчыць.

Беларусаў Варшавы запрашаюць святкаваць Новы год па-беларуску. Прапануюць безлімітны бар і ежу ў фармаце шведскага стала. Таксама будзе вялікі канцэрт гурта «Красная зелень», ноч танцаў пад зорны кавер-бэнд музыкаў з гуртоў Volski, Brutto, «Ляпис Трубецкой», J:MОРС, «Крамбамбуля», Superbullz і музычныя сюрпрызы ад знакамітых гасцей з розных калектываў: Akute, Lear, Георгий Добро, Раман Арлоў і таемныя госці. Ну і караоке да самай раніцы (а можа, і болей). Вядоўца – Аляксандр Памідораў.

Beer Station прапануе святкаваць Новы год разам. Абяцаюць смачныя стравы, розныя алкагольныя напоі і, вядома ж, нечаканыя сюрпрызы і падарункі. Будзьце гатовы да актыўнага ўдзелу ў спаборніцка-забаўляльнай гульні «Успрыманне» і сустрэчы з таямнічым Богам Зімы, якога неабходна будзе залагодзіць пачастункамі, а таксама выканаць яго непрадказальныя заданні.

У беларускай кавярні Kult Kawy праходзіць выстава акварэлі беларускай мастачкі Анастасіі Моўчан. Можна прыйсці паглядзець, а таксама замовіць на бары смачную каву ці калядныя стравы. Напрыклад, цяпер у меню вы знойдзеце салаты «Аліўе» і «Пад шубай». Іх можна зʼесці на месцы або забраць з сабой – і дома гатаваць не давядзецца.

Беларусы Гданьска традыцыйна збіраюцца сустрэць Новы год разам і гуляць да самай раніцы. Удзельнікі будуць сумесна гатаваць навагоднія стравы, упрыгожваць ялінку, знаёміцца і весяліцца.

Абмеркаванне дэталей святкавання тут. Колькасць месцаў абмежавана.

З калядным канцэртам у Вільнюс едуць гусляр Алесь Чумакоў і спявачка Таццяна Ячная. Вы пачуеце калядныя і навагоднія песні з Англіі, Ірландыі, Шатландыі, Уэльса, Іспаніі, Італіі, Францыі, Даніі, Фінляндыі, Румыніі, Украіны, Беларусі, Латвіі, ЗША, Венесуэлы і, канешне ж, Польшчы.

Усе песні прагучаць на беларускай мове ў перакладах беларускіх паэтаў – пад акампанемент беларускіх гусляў.

Калядны цягнік запрашае малых і іх бацькоў у паўгадзінную паездку па напоўненым калядным духам Старым горадзе. Галоўны прыпынак, дзе трэба чакаць цягнік, – каля Саборнай плошчы. Рост дзяцей будзе вымярацца спецыяльным лічыльнікам «Гномы». Білеты можна набыць на прыпынку, адсканіраваўшы QR-код.

А калі палістаеце галерэю інстаграм-паста, знойдзеце і іншыя цікавыя мерапрыемствы на святы: напрыклад, можна зʼездзіць на лыжны курорт або схадзіць у музей цацак.

А хто сказаў, што гатаваць калядныя стравы можна толькі на Новы год? Глупства! Смачна есці і радаваць сябе трэба кожны дзень. Тым больш што мы ўжо ўсё прыдумалі за вас.

Напрыклад, тут знойдзеце 9 варыянтаў святочных салатаў, тут – 8 варыянтаў лёгкіх закусак. А вось тут мы расказвалі пра стравы з мяса і рыбы, якія абавязкова трэба паспрабаваць. Ну а калі ўсё ж такі задумваецеся, што прыгатаваць на навагодні стол, то вось тут забірайце гатовае меню.

Беларуская тэатральная школа Вільнюса падрыхтавала падборку беларускіх мульфільмаў для святочнага настрою. Таму заварвайце какаву, захутвайцеся ў плед, знаходьце мульцікі на YouTube – і правядзіце спакойны ўтульны вечар дома.