Куды пайсці ў выхадныя 24–26 лютага ў Мінску, Варшаве, Вільнюсе і іншых гарадах, дзе жывуць беларусы

Нацыянальны цэнтр сучасных мастацтваў ладзіць дзве куратарскія экскурсіі па выставе «Штучны інтэлект: мастак ці машына?»

У чацвер, 23 лютага, экскурсаводкай стане куратарка выставы Дзіна Даніловіч, а ў суботу, 25 лютага, – Дар’я Румянцава, навуковая супрацоўніца музея.

Арт-галерэя «Катавасія» ладзіць акцыю: у панядзелак а 14:00 і ў пятніцу а 18:00 кошт экскурсіі па экспазіцыі будзе складаць толькі 5 руб. Праўда, дадаткова трэба заплаціць і за ўваход: дарослым – 12 руб., дзецям – 8 руб.

Наведаўшы такую экскурсію, вы не толькі пабачыце шмат котаэкспанатаў, але і дапаможаце бяздомным коцікам: уся выручка ад працы галерэі накіроўваецца ў цэнтр дапамогі «Стары кот», які гадуе больш за сотню катоў і кацянят.

У лекторыі «Фрэскі» стартуюць лекцыі-дэгустацыі гістарычнай беларускай кухні з Аленай Мікульчык, шэф-поваркай, даследчыцай кулінарыі і аўтаркай кнігі «Шляхецкая кухня». Вас чакае кулінарнае падарожжа ў гісторыю беларускай кухні, знаёмства са старажытнымі рэцэптамі і тэхналогіямі, кухняй каралеў, сістэмай здаровага харчавання і – самае галоўнае – дэгустацыя.

Будзе дэгустацыя скібак і канапак (беларускіх бутэрбродаў), а па жаданні – яшчэ і двух алкагольных напояў па рэцэптах 19 стагоддзя – хрэнавухі і англічанкі (настойкі на духмяным перцы). Не забудзьцеся пра рэгістрацыю.

У музеі Якуба Коласа адбудзецца творчы вечар Івана Кірчука. Вас завуць паслухаць неверагодныя беларускія песні – там жа можна будзе набыць кнігі спадара Івана і атрымаць аўтограф.

Калі вам не хапае пяшчоты і абдыманкаў, запішыцеся на cuddle party – мерапрыемства, дзе робяць медытацыі, знаёмяцца і выконваюць практыкаванні на цялесны кантакт. Падрабязней пра гэтыя вечарыны мы расказвалі тут, пачытайце. А вось тут шукайце кантакты для запісу.

Усе выхадныя ў прасторы «Вершы» будзе праходзіць модны маркет Maslenitsa CraftMall. Абяцаюць цікавыя і адзінкавыя вырабы ад лакальных дызайнераў, брэндаў і майстроў, вінтаж, хатнюю выпечку, музычную праграму і прыемную атмасферу.

Працаваць будуць з 12:00 да 20:00. Можна будзе купіць падарункі, адзенне, пачаставацца блінамі і паслухаць музыку.

У суботу ў батанічным садзе будуць традыцыйна адзначаць Масленіцу. На свежым паветры вас будуць чакаць інтэрактыўныя лакацыі, анімацыя, гулянні і блінны пір. Напрыканцы свята абяцаюць шоў ад тэатра вогненных паказаў. Кульмінацыяй стане спаленне пудзіла зімы.

У нядзелю вас клічуць працягнуць свята, паласавацца блінамі і наведаць экзатычную аранжэрэю з квітнеючымі архідэямі, камеліяй японскай, азаліяй, стрэліцыяй і спатыфілумамі.

Беларускі тэатр «Лялька» запрашае адсвяткаваць Дзень роднай мовы спектаклем-гульнёй «Скрыпка дрыгвы й верасовых пустэчаў». Будуць віктарыны, конкурсы, танцы і майстар-класы, якія падрыхтавалі для вас артысты.

Разыначкай на свяце будзе спектакль паводле казкі Ўладзіміра Караткевіча «Скрыпка дрыгвы і верасовых пустэчаў». Напрыканцы вечарыны самых актыўных гасцей чакае сюрпрыз.

Філіял Веткаўскага музея зноў ладзіць майстар-клас па лепцы з гліны. Гэтым разам тэма занятка вольная – прыходзьце зляпіць што-небудзь масленічна-святочнае. Усе матэрыялы прадастаўляюцца музеем, але з сабой лепш узяць спецыяльны мастацкі фартух або зменную вопратку, якую нястрашна запэцкаць, і заколкі або гумку, калі ў вас доўгія валасы.

Колькасць месцаў абмежаваная, таму запісвайцеся загаддзя: +375 232 50 96 98. Таксама просяць ўнесці перадаплату у філіяле музея да чацвера-пятніцы – так за вамі застанецца месца.

У галерэі Вашчанкі адкрылася выстава «Беларускія маляванкі» з калекцыі музея-запаведніка «Заслаўе» (а ў Заслаўі – самая вялікая і крутая калекцыя беларускіх маляваных дываноў). На выставе можна пабачыць каля 30 маляванак – і творы Алены Кіш і Язэпа Драздовіча таксама.

Маляваныя дываны, ці маляванкі, – гэта творы, намаляваныя на саматканым палатне, радзей цыраце ці паперы, прызначаныя для ўпрыгожвання жылля. Мастакі з народа ўвасаблялі на палотнах і сцэны са штодзённага жыцця, і фантастычны свет казак і легенд.

Народны эксперыментальны тэатр-студыя «Бачонак» грае спектакль «Геній і распуста» – пра генія і ягоны цяжкі лёс, пра акцёрства і каханне, пра надзеі і расчараванні.

Народны тэатр-студыя «Бачонак» створана гарадзенскімі акцёрамі-аматарамі ў 2009 годзе і названая так па прозвішчы кіраўніка і рэжысёра Сяргея Бачкова. У рэпертуары тэатра ужо больш за 10 спектакляў – прыходзьце паглядзець новы.

Беларускі моладзевы хаб і амбасада Нідэрландаў у Польшчы ладзяць экскурсію па інклюзіўнай Варшаве. У першую чаргу сустрэча арыентавана на людзей з інваліднасцю, але можна прыходзіць і усім ахвотным. Спачатку будзе знаёмства і нетворкінг, а потым і сам шпацыр.

У суботу ў беларускім бары Beer Station Centrum будзе горача, бо там адбудзецца канцэрт гурта N.R.M. Размінайце галасавыя звязкі, рыхтуйце да танцаў ногі – і прыходзьце. Папярэдніх рэзервацый не прымаюць, таму лепш прыйсці загадзя.

Лекцыя будзе пра Уэса Андэрсана – караля сіметрыі, цэнтравання, маляўнічай палітры і высокай ступені дэталізацыі. Гаворка будзе аб вядомым стылі рэжысёра, які паспяхова здымае не толькі поўнаметражныя фільмы, але і рэкламныя кампаніі для розных брэндаў. Лектарка Даша Брыян.

Беларусы Кракава пішуць дыктовачку да Дня роднай мовы – ды з Андрусём Такіндангам. Усе ўдзельнікі атрымаюць сувеніры на памяць, а пакуль дыктоўкі будуць правяраць, музыка зайграе лямпавы канцэрт.

Palina распачынае вялікі тур па гарадах Еўропы і ў нядзелю грае канцэрт у Познані. Колькасць месцаў абмежавана, таму замаўляйце квіткі па спасылцы.

У бары Pahonia адбудзецца канцэрт беларускага музыкі Аляксандра Памідорава. Будзе лампава, прыемна і хораша. Білеты можна будзе набыць на ўваходзе – таму проста збірайцеся і прыязджайце.

У CreateCulture Space пройдзе дзень сэкс-прасвету – мерапрыемства, прысвечанае сэксуальнай адукацыі. У праграме – тры аўтарскія лекцыі ад вядомых блогерак Сашы Казанцавай, Зоі Прышывалка і Лізы Ветравай, займальны нэтворкінг, дыскусія і afterparty з Dj.

Тэмы выступаў: «Як рэфлексія сэксуальнасці мяняе грамадства», «Сэкс і стрэс», «Сэкс па-беларуску».