Куды пайсці ў выхадныя 12–14 мая ў Мінску, Варшаве, Вільнюсе, Тбілісі і Празе

Мінскі планетарый запрашае на прэм’еру фільма «Галактыка і яе насельніцтва». Першыя два паказы будуць бясплатнымі!

Галактыка Млечны Шлях – гэта зорная сістэма, у якой мы жывём. Вывучаць яе нялёгка, паколькі мы знаходзімся ў сярэдзіне. Калі не бачыць Галактыку збоку, складана ацаніць яе памеры, форму, колькасць зорак. Тым не менш за гады даследаванняў навукоўцам удалося гэта зрабіць. Фільм ствараўся з улікам найноўшых навуковых даных.

Праект Cinemascope ў рамках кінаклуба «Анталогія» вяртае на экран культавыя фільмы сусветнага кінематографа. У пятніцу можна будзе паглядзець Vertigo (1958) Альфрэда Хічкока.

Штосуботу ў Lidbeer Dvor праходзіць фермерскі рыначак «Усё сваё», дзе збіраюцца лакальныя рамеснікі і прадаюць свае смачныя натуральныя вырабы. Можна знайсці хлеб, мяса і каўбасы, сыры і малочку, смакоцце і выпечку, натуральныя алеі і шмат чаго яшчэ.

У Нацыянальным цэнтры сучасных мастацтваў паўтараюць спектакль «Медэя». Гэта інтэрпрэтацыя аднайменнай п’есы Жана Ануя – гісторыя пра каханне, якое часам прымушае нас пакутаваць. Мы не хочам прымаць, рэальнасць якая нас палохае. Адна частка нас прагне пакуты, другая ўсё разумее і жадае супакоіцца.

У галерэі Міхаіла Савіцкага працуе кароткатэрміновая выстава твораў навучэнцаў школ мастацтваў «Мінск: учора, сёння, заўтра» па выніках адкрытага конкурсу выяўленчага мастацтва, скульптуры і дэкаратыўна-прыкладнога мастацтва.

Можна паглядзець на Мінск вачыма мастакоў-пачаткоўцаў.

У Мастацкім музеі адкрылася выстава «Неба і зямля Аляксандра Кішчанкі», прымеркаваная да 90-годдзя з дня нараджэння мастака.

На экспазіцыі можна пабачыць творы жывапісу, ткацтва, дакументы (фатаграфіі, публікацыі), прадстаўленыя сям’ёй мастака, а таксама калекцыі, якія належаць Нацыянальнаму мастацкаму музею.

Калі не хочацца сядзець у горадзе, выпраўляйцеся ў падарожжа па Беларусі. Тут як раз беларуская рэжысёрка Кацярына Маркавец параіла 5 файных месцаў, дзе варта пабываць, і расказала шмат цікавых гісторый, якія ў гэтых месцах адбыліся. Пачытайце і сплануйце маршрут!

Усе мы апошнім часам моцна стрэсуем. Ад гэтага, бывае, забываемся пра такія звычайныя фізіялагічныя патрэбы, як добрая ежа. У выніку не атрымліваем неабходных рэчаў і адчуваем сябя яшчэ больш дрэнна.

Вось тут мы пагутарылі з псіхалагіняй, гештальт-тэрапеўткай Марынай Прохаравай, якая расказала, як вярнуць сабе апетыт. У артыкуле ёсць і простыя рэцэпты, якія не адбяруць шмат часу, але дакаладна парадуюць сваім смакам.

У пятніцу адбудзецца прэзентацыя кнігі вершаў Артура Камароўскага Corpus Vile. Гэта ўжо другі зборнік аўтара, які выйшаў у 2023 годзе ў выдавецтве Skaryna. У кнізе аўтар працуе з такімі тэмамі, як цялеснасць, гендар, сексуальнасць, мова, радзіма, і спрабуе знайсці адказы на пытанні, як яны звязаны адно з адным і што вынікае з такой сувязі.

У пятніцу ў Варшаве дасць канцэрт этна-хіп-хоп-спявачка, аўтарка песень і проста вядзьмарка Iva Sativa. Будзе шматмоўны фолк-хіп-хоп з беларускімі народнымі матывамі – не прапусціце!

На першым паверсе «Беларускага моладзевага хаба» працуе персанальная выстава мастачкі Надзі Букі «Адраджэнне».

На экспазіцыі прадстаўлены працы, выкананыя ў розных тэхніках і напісаныя мастачкай у розныя часы. Карціны насычаны яркімі фарбамі і вясной – схадзіце натхніцца.

Калі ў Варшаве сядзець надакучыла, з’ездзіце ў Люблін – можна будзе і па старым горадзе прагуляцца, і файны спектакль Купалаўцаў паглядзець.

У пятніцу і суботу яны сыграюць «Гусі-людзі-лебедзі» паводле адной з частак рамана Альгерда Бахарэвіча «Сабакі Эўропы» (мы глядзелі – вельмі файны!).

У суботу Віленскі беларускі музей імя І. Луцкевіча ладзіць тры майстар-класы па традыцыйных рамёствах: птушка з саломы, вышыўка ахоўнага арнаменту процягам і выраб традыцыйнай тэкстыльнай лялькі.

Усе матэрыялы дадуць на месцы. Майстар-класы разлічаны на дарослых, але могуць удзельнічаць і падлеткі ад 11 гадоў. Колькасць месцаў абмежавана, таму не забудзьце зарэгістравацца.

У суботу беларусаў Вільнюса клічуць вучыцца ляпіць з гліны ўласныя кубачкі. Матэрыялы і неабходныя веды дадуць на месцы. З вас – толькі сабраць валасы і апрануцца ў адзенне, якое не шкада запэцкаць.

Мінская галерэя «ДК» сумесна з вільнюскай GODO адкрыла ў Вільнюсе выставу «Дыялогі». Гэты праект – размова двух выдатных беларускіх сучасных мастакоў: Яўгена Шадко і Сяргея Грыневіча.

Першы ў сваіх творах часцей за ўсё робіць акцэнт на асобах і частках цела. Серыя партрэтаў прадстаўляе характары, застылыя ў часе, у імгненні. Анатамічныя часткі цела часта ссоўваюцца, відазмяняюцца, фрагментуюцца; чалавек на карціне існуе ў розных сітуацыях і адначасова.

У творах другога спалучаюцца рэалістычныя і абстрактныя прыёмы. Карціны запамінаюцца каларытнасцю і нестандартнай кампазіцыяй.

Света Бень (экс-«Серебряная свадьба») і Галя Чыкіс (Chikiss) упершыню дадуць канцэрт у Тбілісі. Будзе прэзентацыя альбома «ПРИЕМ!».

У пятніцу ў Прагу прыбывае любы многім беларусам бард Зміцер Вайцюшкевіч. Абяцае песні, гутаркі ды лямпавы беларускі нетворкінг. Білеты можна будзе набыць на ўваходзе.