Таямніцы колеру (18+)

3 чэрвеня 2017 года ў 20.00 у зорнай зале мінскага Планетарыя адбудзецца пазнавальная лекцыя «Таямніцы колеру».

Што такое колеры, навошта яны нам патрэбныя і якія тайны ад нас утойваюць? Аб гэтым можна будзе даведацца з лекцыі навуковага супрацоўніка Навукова-практычнага цэнтра па матэрыялазнаўству НАН Беларусі Рыгора Аляксандравіча Русецкага. Наведвальнікі лекцыі высвятляць, ці ўсе людзі бачаць наваколле аднолькава, і паспрабуюць разглядзець колеры там, дзе падаецца, што іх увогуле няма. Ці заўсёды варта верыць сваім вачам? А якая роля вока ва ўспрыманні колераў?

Мастацтва, літаратура, навука, штодзённае жыццё – паўсюль людзі сустракаюцца з колерамі. Мы актыўна карыстаемся гэтым паняццем і нават не задумваемся над яго сэнсам. Больш-менш удалая тэорыя колеру з’явілася толькі на прыканцы семнаццатага стагоддзя, дзякуючы выбітнаму англійскаму навукоўцу Ісааку Ньютану. Аднак у той час немагчыма было выявіць усе асаблівасці колеру.

Тыя, хто цікавіцца таямніцамі навукі і звычайнымі з’явамі, на якія можна паглядзець з нечаканага боку, запрашаюцца ў Планетарый!

Пасля лекцыі прысутных у зале чакае экскурсія па зорнаму небу.