Сёння стала вядома, што новым дырэктарам Купалаўскага тэатра стаў дыпламат Павел Латушка – ці не адзіны публічны чыноўнік, які заўжды размаўляе па-беларуску.
Сёння ў фэйсбук-акаўнце тэатра з’явіўся здымак, на якім Павел Латушка разам з мастацкім кіраўніком Купалаўскага Мікалаем Пінігіным ідуць ля тэатра. “Здагадайцеся, якія справы прывялі гэтых сур’ёзных людзей мастацтва ў тэатр”, – напісана пад фота.
Чаму гэта кепская навіна
Павел Латушка, які да апошняга працаваў спачатку ў міністэрстве замежных спраў, пасля ўзначальваў міністэрства культуры і апошнія гады працаваў амбасадарам Беларусі ў Францыі, – ці не адзіны чыноўнік, які размаўляе выключна па-беларуску.
Да таго ж Латушка вядомы сваімі ліберальнымі поглядамі.
Такім чынам, у беларускім палітычным істэблішменце на аднаго беларускамоўнага чыноўніка стане менш. І гэта, безумоўна, кепска.
Чаму гэта добрая навіна
Бо Латушка вядомы як добры культурны менеджар, і яго прызначэнне пойдзе на карысць найлепшаму тэатру Беларусі.
Таму мы віншуем і калектыў тэатра, і спадара Паўла з новым прызначэннем!
Фота: facebook.com/kupalauski.by
