Выдавец Андрэй Янушкевіч у чарговым выпуску YouTube-канала «Жыццё-маліна» расказаў, колькі заплаціў за права выдаваць бестселер караля жахаў Стывена Кінга на беларускай мове.
У красавіку 2023 года стала вядома, што выдавецтва «Янушкевіч», якое вымушана было пераехаць у Польшчу, заключыла кантракт з амерыканскім пісьменнікам Стывенам Кінгам на выданне яго класічнага рамана «Ззянне» (1977) па-беларуску.
А ў суботу ў чарговым выпуску YouTube-канала «Жыццё-маліна» Андрэй Янушкевіч расказаў, колькі заплаціў агентам Кінга: «Прыстойны аўтамабіль можна было б купіць. Гэта калі лічыць ўвесь працэс, а не толькі выкуп правоў».
На ўдакладняльнае пытанне вядоўцы: «Гэта 10–15 тысяч, такі парадак?» – выдавец адказаў: «Ну, нават, напэўна, і больш».
Раман «Ззянне» плануецца выдаць па-беларуску ў снежні 2023 года ў папяровым, электронным і аўдыяфарматах.
