Беларускі музыкант Лявон Вольскі і рэжысёрка Дар’я Каляда збіраюць 2500 еўра на здымкі кліпа на песню «Пакідаем на потым». Падтрымаць праект можна за данат, а ўзамен аўтары прапануюць розныя падарункі.
На момант публікацыі ўжо сабралі 680 еўра з неабходных 2500. Да канца збору засталося 15 дзён.
Паводле апісання праекта, кліп раскажа гісторыю чалавека, які аказаўся на мяжы сваіх сіл. Цяжкасці, страхі і боль амаль перамагаюць героя, але ў нейкі момант ён знаходзіць у сабе сілы пражыць гэтыя эмоцыі і выйсці з цяжкага стану больш моцным і свабодным.
Гісторыю хочуць расказаць праз вобразы, флэшбэкі, асацыяцыі, рух і дарогу, якая стане метафарай унутранага шляху героя. У цэнтры відэа будзе акцёр, які павінен перадаць розныя эмацыйныя станы персанажа.
У кліпе таксама з’явяцца музыкі Паша Трыпуць, Алесь Мышкевіч і Павел Мамонаў.
Падтрымаць здымкі можна рознымі сумамі. За 5 еўра прапануюць узнагароду ў выглядзе паштоўкі з выявай Вольскага (аўтарства Дар’і Каляды), аўтографам і персанальным подпісам музыканта. За 15 еўра можна атрымаць матэрыялы са здымак, якія не будуць публікавацца ў іншых сацсетках.
За большы данат аўтары прапануюць падзяку ў цітрах, персанальны відэазварот, а таксама магчымасць размясціць імя фундатара ў асобным блоку цітраў.
Падтрымаць можна тут.
Лявон Вольскі – cтваральнік гуртоў «Мроя», N.R.M., «Крамбамбуля», VOLSKI, сааўтар праекта «Народны альбом».
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
