Мурал «Маментальнасць» з’явіўся пад мостам на скрыжаванні праспекта Незалежнасці і вуліцы Бабруйскай. Работа належыць мастаку KHVST KHVOOOSTOV (Улад Хвастоў) і зроблена ў межах пятага фестывалю урбан-арту Vulica Brasil.
Як выглядае мурал?
Вось так. Звярніце ўвагу на дэталі: на малюнку – героі, якіх можна сустрэць на вуліцах нашага горада, і розныя віды транспарту – ад коней да скейтаў. А таксама вялікі коцік: коцікаў любяць усе.
Што кажа аўтар мурала?
Мастак Улад Хвастоў расказаў CityDog.by, што праца над муралам ішла два тыдні і два дні.
– Ідэя арт-аб’екта ў тым, што свет не на экране смартфона, а вакол нас, – лічыць Улад. – У паўсядзённым жыцці чалавек успрымае сваё акружэнне – людзей, машыны, жывёл – як суцэльны струмень, які зліваецца ў аднатонную сцяну, падобную да той, дзе намаляваны мурал. Аднатонная сцяна акружае чалавека, і ён проста перастае яе заўважаць. А мы зрабілі адмысловы скрыншот з жыцця горада, каб была магчымасць спыніцца і ўгледзецца ў дэталі, выразы на тварах, падумаць, куды ўсё ідзе.
Да таго ж у мурала ёсць гістарычны пласт: выявы мінскага транспарту яшчэ з мінулага стагоддзя.
Сцяна падцякала, і з ёй давялося папрацаваць
Штодзень Уладу дапамагалі чатыры-пяць чалавек. Разам яны падчышчалі, замацоўвалі плітачным клеем дзіркі, адкуль ішла вада, каб не цякла фарба. У апошні дзень працавалі цэлыя суткі, прывезлі генератар і будаўнічы фен. Сцяну пакрывалі плітачным клеем, фарбавалі, сушылі, лакіравалі, зноў сушылі.
– Але праблема засталася, – паскардзіўся мастак. – Нягледзячы на нашы намаганні, сцяна ўсё роўна цячэ, і з цягам часу мурал можа пацярпець ад дажджу.
Перепечатка материалов CityDog.by возможна только с письменного разрешения редакции. Подробности здесь.
Фото: Павал Хадзiнскi для CityDog.by.
