Завод «Луч» выпусціў абмежаваную калекцыю гадзіннікаў, прысвечаную беларускаму пісьменніку Васілю Быкаву. Да выхаду калекцыі брэнд таксама запусціў творчы чэлендж: кожны ахвочы можа прачытаць урыўкі з любімага твора аўтара і перадаць эстафету далей.
Беларускі брэнд «Луч» прадставіў новую лімітаваную калекцыю гадзіннікаў «Асоба. Васіль Быкаў», створаную ў памяць пра вялікага беларускага пісьменніка.
Калекцыя прысвечана сіле яго слова, якое прайшло праз самыя цяжкія гістарычныя выпрабаванні ХХ стагоддзя. Васіль Быкаў пісаў пра вайну, маральны выбар, боль, чалавечнасць і цану жыцця – і яго тэксты застаюцца актуальнымі і сёння.
У калекцыі толькі 200 экзэмпляраў. Кошт гадзінніка – 599 руб. Набыць яго можна ў фірменных крамах «Луч» або на афіцыйным сайце.
Каб падтрымаць калекцыю, брэнд запусціў творчы чэлендж з хэштэгам #ЧытаемБыкава. Далучыцца можа кожны:
- Запішыце відэа.
- Раскажыце ў ім пра чэлендж.
- Прачытайце радкі з любімага твора Васіля Быкава.
- Перадайце эстафету іншаму чалавеку.
- Абавязкова дадайце хэштэг #ЧытаемБыкава, каб ваша відэа ўбачылі і падтрымалі.
Калі памятаеце, CityDog.io паведамляў, што ў 2024 годзе беларусы прапанавалі пасмяротна прысвоіць званне «Герой Беларусі» празаіку, драматургу і публіцысту Васілю Быкаву. Як адзначалі аўтары звароту, званне «Герой Беларусі» – гэта найвышэйшая ступень адзнакі ў краіне, якую надаюць за выключныя заслугі перад дзяржавай і грамадствам.
За сваё творчае жыццё пісьменнік быў удастоены самых высокіх дзяржаўных узнагарод:
- Лаўрэат Дзяржаўнай прэміі СССР (1974).
- Народны пісьменнік Беларусі (1980).
- Герой сацыялістычнай працы (1984).
- Лаўрэат Ленінскай прэміі (1986).
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
