З 11 па 13 студзеня ў кінатэатрах “Масква” і velcom cinema пройдуць святочныя паказы фільма “Адзін дома” на беларускай мове. У агучцы фільма ўзялі ўдзел 14 чалавек, уключаючы прафесійных акцёраў тэатра і кіно, – гэта новы рэкорд праекта “Беларускія ўікэнды”.
Сярод беларускіх зорак, якія агучвалі знакамітую навагоднюю камедыю, Павел Харланчук, Яўген Перлін, Святлана Цімохіна, Юліяна Міхневіч, якія ужо не аднойчы агучвалі фільмы праекта, і многія іншыя. “Адзін дома” завершыць “Калядны марафон”, папярэднія фільмы якога – “Цвёрды арэшак” і “Гэта цудоўнае жыццё” – сабралі на паказах больш за 3500 чалавек.
Зняты ў 1990 годзе “Адзін дома” – адзін з самых папулярных навагодніх фільмаў апошніх трыццаці гадоў. Стужка распавядае пра Кевіна МакКалістара, малодшага сына ў вялікай сям’і. Напярэдадні вандроўкі ў Еўропу яго выпадкова пакінулі дома аднаго, і яму прыйшлося спраўляцца з недзіцячымі праблемамі: у прыватнасці, з парай прафесійных рабаўнікоў. У 1991 годзе сямейная камедыя са шчаслівым фіналам атрымала дзве намінацыі на “Залаты глобус” і дзве – на “Оскар”.
Гледачы змогуць не толькі атрымаць асалоду ад прагляду любімага фільма на беларускай мове, але і паўплываць на будучыню праекта “Беларускія ўікэнды”: усе госці змогуць паўдзельнічаць у апытанні на тэму іх пераваг у кіно. Які фільм быў лепшым у 2018 годзе, фільмы якіх жанраў хацелася б глядзець часцей – адказы гледачоў паўплываюць на рэпертуар будучага сезона “Беларускіх уікэндаў”.
У рамках праекта “Беларускія ўікэнды”, які рэалізуе кампанія “Кінаконг” пры падтрымцы velcom, вядомыя прадстаўнікі тэатра і кіно Беларусі ўдзельнічаюць у перакладзе і агучцы на беларускую мову разнапланавых замежных фільмаў, якія пасля дэманструюцца ў шырокім пракаце.
Перепечатка материалов CityDog.by возможна только с письменного разрешения редакции. Подробности здесь.
