Кракаўскі блогер і гід Глеб разам з дызайнеркай Аляксандрай у ліпені выпусцілі першы беларускамоўны друкаваны гайд па Кракаве. У ім сабралі 44 месцы, інтэрактыўныя заданні і лічбавыя бонусы для тых, хто хоча лепш пазнаёміцца з горадам.
Аўтары падзялілі 44 лакацыі на сем катэгорый: база, культура, ежа, кава, бары, экспірыенс і шопінг. Каля кожнага месца ёсць кароткае апісанне на 20 слоў, каб вы маглі хутка зразумець, ці варта туды ісці.
Гайд па Кракаве. Фота: аўтары.
Паводле Глеба, праца над выданнем заняла паўгода.
«Канцэпцыя была гатовая ад самага пачатку і не змянілася. Але сама падрыхтоўка заняла доўгія месяцы: мы выбіралі вокладку са шматлікіх варыянтаў, тэставалі месцы для падборкі і рабілі пробнікі для сяброў, каб сабраць зваротную сувязь», – расказвае ён.
Аўтары кажуць, што хацелі зрабіць сучасны гайд, які можна падарыць блізкім.
Што ўнутры?
У гайдзе ёсць некалькі інтэрактыўных элементаў. Напрыклад, бінга з 12 «па-сапраўднаму кракаўскімі» актыўнасцямі, якое можна запаўняць стыкерамі, пошук месца на гістарычным здымку Кракава 1942 года, красворд, старонкі для турыстычных пячатак і асабістых нататак. Адна са старонак нават змяшчае жартам напісаны дазвол праліць на яе каву.
Гайд па Кракаве. Фота: аўтары.
Разам з друкаванай версіяй пакупнікі атрымаюць PDF-версію для тэлефона, Google Maps з усімі пазначанымі лакацыямі, а таксама яшчэ 15 месцаў, якія не ўвайшлі ў асноўны друкаваны спіс.
Гайд каштуе 55 злотых (каля 41,53 руб.). У якасці бонусу аўтары дадаюць хэнд-мэйд-паштоўку, якую дызайнерка Аляксандра зрабіла ў тэхніцы лінагравюры. Набыць гайд можна тут. Таксама пры яго набыцці можна пры жаданні дакупіць дзве паштоўкі, якія падрыхтавалі аўтары.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
