З 13 па 26 лістапада пройдзе кінафестываль «Паўночнае ззянне». Усе фільмы можна будзе часткова паглядзець у анлайне згодна з раскладам ці пабачыць афлайн у кінатэатрах у Вільнюсе і Таліне.
Беларускі конкурс складаецца з 12 фільмаў, да якіх прыкладаюцца яшчэ два спецыяльныя паказы па-за конкурсам. Беларускія фільмы будзе ацэньваць міжнароднае журы.
Упершыню на «Паўночным ззянні» фільмы, якія адзначыць журы, атрымаюць грашовыя прызы. Прызавая падтрымка прадстаўляецца тэлеканалам «Настоящее время»:
- гран-пры – 1200$,
- спецыяльны прыз – 800$.
Галоўная тэма кінафэсту сёлета – адлегласць, а ўсе сабраныя ў конкурсе фільмы – пра рэфлексію і пераасэнсаванне падзей 2020 года ў Беларусі.
Праграма фэсту
«КУЛ», 2023, Беларусь
- Фільм паказваецца па-за конкурсам (14 лістапада анлайн з 00:00 да 23:59 – даступны ў любым пункце свету).
Навэлы французскіх, рускіх, румынскіх, валійскіх, украінскіх, нямецкіх рэжысёраў і, вядома, беларускіх аўтараў. У аснове кожнага фільма альманаха ляжаць адборныя беларускія навіны.
«Радзіма», 2023, Швецыя, Украіна, Нарвегія
- Фільм удзельнічае ў Беларускім конкурсе (15 лістапада, 18:15, Талін, к/т Apollo Kino Solaris, 1. Saku saal; 23 лістапада, 17:30, Вільнюс, к/т Skalvija).
«Радзіма» – маштабны дакументальны фільм, які выходзіць далёка за межы краіны і аналізуе постсавецкі стан з пункту гледжання моладзі.
«У жывым эфіры», 2022, Польшча
- Фільм удзельнічае ў Беларускім конкурсе (17 лістапада, 16:45, Талін, к/т Kino Sõprus; 21 лістапада, анлайн, з 00:00 да 23:59, даступны толькі на тэрыторыі Беларусі).
Кароткаметражны фільм рэжысёркі Мары Тамковіч, натхнёны ўчынкам Кацярыны Андрэевай і Дар’і Чульцовай, расказвае гісторыю затрымання журналістак падчас іх стрыму з плошчы Перамен у 2020 годзе.
«Калыханка», 2023, Польшча, Саўдаўская Аравія
- Фільм удзельнічае ў Беларускім конкурсе (17 лістапада, 16:45, Талін, к/т Kino Sõprus; 22 лістапада, анлайн, з 00:00 да 23:59, даступны ўсюды, акрамя тэрыторыі Беларусі).
«Калыханка» – ненаратыўная мастацкая гісторыя, якая паказвае гледачу прыгажосць змрочных настрояў.
«Усё добра. Я сплю», 2023, ЗША
- Фільм удзельнічае ў Беларускім конкурсе, але не прэтэндуе на грашовы прыз (17 лістапада, 16:45, Талін, к/т Kino Sõprus; 25 лістапада, анлайн, з 00:00 да 23:59, даступны ў любым пункце свету).
Пасля падзей 2020 года «неабыякавыя» грамадзяне пачалі паведамляць у міліцыю пра выпадковых незнаёмцаў, сваіх калег, сяброў і нават сваякоў – тых, хто ўдзельнічаў у акцыях пратэсту, або тых, хто проста публічна выказваў сваё меркаванне.
«Ператрымка», 2022, Польшча
- Фільм удзельнічае ў Беларускім конкурсе (17 лістапада, 16:45, Талін, к/т Kino Sõprus).
Па сюжэце «Ператрымкі», амапавец затрымлівае некалькі чалавек падчас антываеннай акцыі, але ў турме яму паведамляюць, што ў камерах больш няма месца. Яму нічога не застаецца, апрача як забраць вязняў адбываць 15 дзён арышту да сябе дадому. Гратэскная камедыя пра абсурднасць беларускай рэчаіснасці.
«Ястраб памерам з каня», 2022, Францыя
- Фільм удзельнічае ў Беларускім конкурсе (18 лістапда, анлайн, з 00:00 да 23:59, даступны ў любым пункце свету; 24 лістапада, Вільнюс, к/т Skalvija).
Гісторыя пра арніталагіню Лідзію, якая раней была Сяргеем. Яна дае прыватныя ўрокі біялогіі, працуе на кампанію, якая прадухіляе сутыкненні птушак з самалётамі, а паралельна будуе ў Шчарбінцы Чорны вігвам з «Твін Пікс».
«Чатыры колы далей ад цэнтра», 2023, Беларусь
- Фільм удзельнічае ў Беларускім конкурсе (18 лістапада, анлайн, з 00:00 да 23:59, даступны ў любым пункце свету; 24 лістапда, 17:30, Вільнюс, к/т Skalvija).
Дакументальны партрэт мінскай мастачкі Марыны Капілавай у адсутнасці дыстанцыі.
«Смеццевая галава», 2022, Беларусь
- Фільм удзельнічае ў Беларускім конкурсе (19 лістапада, анлайн, з 00:00 да 23:59, даступны ў любым пункце свету).
Меланхалічны індзі-хорар пра злую іронію лёсу і сілу жадання.
«Котка», 2023, Беларусь
- Фільм удзельнічае ў Беларускім конкурсе (19 лістапада, анлайн, з 00:00 да 23:59, даступны ў любым пункце свету).
Разбітая разрывам з каханым, Ганна ў роспачы спальвае макет дома, прызначанага для іх абаіх, прытуляе ў сябе сляпога змучанага ката і спрабуе заглушыць боль страты наркатычным трыпам.
«Дзённік Анастасіі», 2022, Польшча
- Фільм удзельнічае ў Беларускім конкурсе (21 лістапада, анлайн, з 00:00 да 23:59, даступны ў любым пункце свету; 24 лістапада, 17:30, Вільнюс, к/т Skalvija).
Дакументальная споведзь беларускай мастачкі Анастасіі Рыдлеўскай.
«Мяцеліца», 2023, Беларусь
- Фільм удзельнічае ў Беларускім конкурсе (22 лістапада, анлайн, з 00:00 да 23:59, даступны ў любым пункце свету).
«Мяцеліца» – гэта 3 хвіліны медытатыўнай паэтычнай анімацыі, якая злучае ў сабе быццам усе адценні белага.
«Беларусь. OST», 2022, Беларусь
- Фільм паказваецца па-за конкурсам (25 лістапада, анлайн, з 00:00 да 23:59, даступны ў любым пункце свету).
Фільм змяшчае гукавыя дарожкі з аматарскіх відэа, знятых падчас пратэстаў 2020 года.
«Патрыятычнае практыкаванне», 2023, Польшча
- Фільм удзельнічае ў Беларускім конкурсе, але будзе даступны для прагляду толькі журы. Прэм’ера фільма адбудзецца ў снежні.
«Патрыятычнае практыкаванне» – адзін з чатырох эпізодаў серыяла «Працэсы» рэжысёра Андрэя Кашперскага. У гэтым эпізодзе інтрыгуючая завязка: малодшыя школьнікі атрымліваюць залаты білет на экскурсію ў чароўны будынак КДБ.
Уся анлайн-праграма будзе даступная бясплатна па папярэдняй рэгістрацыі (калі вы раней не рэгістраваліся на платформе кінафестывалю).
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
