Беларускія ініцыятывы Sviadomy Šyk і Art Yard Community аб’ядналіся, каб стварыць капсульную калекцыю адзення, якая пакажа, як можна стыльна выглядаць, захоўваючы традыцыі і клапоцячыся пра планету.
Праект Sviadomy Šyk разам з паблік-арт-ініцыятывай Art Yard Community хочуць змяніць падыход тэкстыльнай індустрыі. Па словах арганізатараў, яна адна з найбольш шкодных для экалогіі і штогод вырабляе мільярды адзінак адзення. У выніку гэта прыводзіць да залішняга спажывання і сур’ёзных наступстваў для планеты.
У чым сэнс праекта?
Удзельнікі лабараторыі хочуць паказаць, што адзенне можа быць прыгожым, экалагічным і культурна значным. Вось што яны для гэтага будуць рабіць:
- Даследчая праца. Каманда дызайнераў і майстроў вывучае, як выкарыстоўваць натуральныя фарбавальнікі і ствараць устойлівыя тканіны.
- Майстар-класы. Любы ахвочы зможа навучыцца экалагічным тэхнікам фарбавання і пераасэнсаваць свой гардэроб.
- Адкрытыя мерапрыемствы ў Варшаве і Тбілісі. Там можна будзе падзяліцца ідэямі і меркаваннем пра ўстойлівую моду.
Пасля будзе створана капсульная калекцыя, якая стане «прыкладам таго, як сучасная мода можа шанаваць прыроду і беларускія традыцыі».
Акрамя гэтага, для ўсіх зацікаўленых падрыхтуюць кіраўніцтва па экалагічных прыёмах, якія можна выкарыстоўваць дома ці ў бізнесе.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
