Вялікі тэатр Беларусі абвясціў конкурс для гледачоў. Прачытайце ўлюбёны твор беларускага аўтара, пастаўце адмысловы хэштэг і атрымайце запрашальны квіток на вечар, прысвечаны Дню матчынай мовы.
Што будзе на вечары?
18 лютага, напярэдадні Дня роднай мовы (які адзначаюць 21 лютага), у Вялікім тэатры Беларусі пачнецца імпрэза з вядомымі беларускімі паэтамі, зоркамі сталічных тэатраў, кіно і тэлебачання: яны прачытаюць радкі з твораў сваіх любімых беларускіх аўтараў. Гледачы таксама могуць выступіць з дэкламацыяй на сцэне.
На вечар запрашаюць у Камерную залу ў 18:15, а ў 19:00 пачнецца опера Дзмітрыя Смольскага «Сівая легенда», лібрэта да якой напісаў класік беларускай літаратуры Уладзімір Караткевіч.
Як прыняць удзел у конкурсе?
- Выкладзіце ў любую сацсетку відэа, дзе вы чытаеце творы беларускіх аўтараў;
- пастаўце хэштэгі #чытаемразам #мойтэатрмаясцэна #матчынамова #маямова;
- чакайце.
Гледачы, якія праявяць сябе найбольш крэатыўна, атрымаюць запрашальны квіток на вечар, прысвечаны Дню матчынай мовы.
Перадрук матэрыялаў CityDog.by магчымы толькі з пісьмовага дазволу рэдакцыі. Падрабязнасці тут.
