Заснавальніца беларускага брэнда адзення Up2You расказала пра кур’ёзную сітуацыю з папулярнай мадэллю лангсліваў. Падчас вышыўкі на рукаве ў надпісе з’явілася памылка, хоць макет перад вытворчасцю праверылі і ўзгаднілі.
Нядаўна брэнд Up2You распрацаваў лангслівы з выявай бусла. На рукаве павінна была быць вышыта фраза Якуба Коласа па-беларуску: «Добра быць у дарозе, якую ты сам сабе выбіраеш».
Як расказала заснавальніца брэнда ў відэа, макет падрыхтавала дызайнерка. Яго праверылі, узгаднілі і адправілі на вышыўку.
Аднак гатовыя рэчы вярнуліся з памылкай. У слове «выбіраеш» падчас вышыўкі з’явіўся мяккі знак. У выніку замест правільнага варыянта атрымалася «выбіраешь».
Заснавальніца назвала гэта «самай грубай памылкай», якую можна дапусціць у беларускай мове.
Паводле яе слоў, лангслівы карысталіся вялікай папулярнасцю. Брэнд вырабіў 50 такіх рэчаў. Цяпер частку з іх забіраюць з крамы. Што рабіць з сапсаванымі лангслівамі далей, супрацоўнікі брэнда пакуль не ведаюць.
У каментарыях многія падтрымалі аўтарку відэа. Некаторыя нават напісалі, што гатовыя купіць рэчы з памылкай.
«Дашыйце выпраўленне чырвонай ніткай у школьным стылі. Закрэсліце чырвоным колерам», – прапанавала ats2404.
«Расіянам прадайце», – жартуе gleb_babushkin.
«Мы купім – давайце сюды», – напісала polar_foxik.
«Дык а калі ў макеце не было літары і яе дадалі на вытворчасці, то гэта іх віна і яны павінны кампенсаваць страты. Дызайнерка ўверсе адпісала, што яна праверыла макет – там няма мяккага знака. Ён з’явіўся пры вытворчасці. Гэта абуральна!» – адрэагавала el.zaiats.
«Хай перашываюць у сэрца ў канцы, калі гэта магчыма», – прапанавала marina_bogdanova1.
«Я магу купіць з памылкай», – напісала danilava.vera.
Up2You – брэнд адзення для падарожнікаў і геданістаў, як самі сябе апісваюць яго стваральнікі. Брэнд знаходзіцца ў Мінску на вуліцы Сурганава, 57в, а таксама дастаўляе свае рэчы па ўсім свеце.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.
