У маі беларусаў чакаюць прыемныя і не вельмі прыемныя змяненні. Напрыклад, вырасце бюджэт пражытачнага мінімуму, а для 11-класнікаў прагучаць апошнія званкі. CityDog.io расказвае, да чаго нам яшчэ рыхтавацца ў апошні вясенні месяц.
Бюджэт пражытачнага мінімуму вырасце
З 1 мая паднімаецца бюджэт пражытачнага мінімуму (БМП) – з 496,96 руб. да 509,62 руб. Ад БМП залежыць памер дзіцячых дапамог, сацыяльных пенсій і выплат па доглядзе пажылых людзей і людзей з інваліднасцю. Калі расце БМП, павялічваецца і памер гэтых даплат.
Дарэчы, вырасце і памер субсідый на адкрыццё сваёй справы. У гарадах сума складзе 11 БМП – 5605 руб., у невялікіх мястэчках і вёсках – 15 БМП (7644 руб.).
Пачнуць адключаць гарачую ваду
Да канца мая ў Беларусі пачнуць адключаць гарачую ваду – работы абяцаюць правесці максімум за 13 дзён.
Даты адключэння вады ў Мінску ўжо вядомыя – з 25 мая, а азнаёміцца з графікам гараджане могуць на сайце Мінскага гарвыканкама.
Экзамены, апошні званок і ўступная кампанія
У маі вучняў выпускных класаў чакае адразу некалькі мерапрыемстваў. Святочную лінейку па ўсёй Беларусі правядуць 23 мая, пасля – іспыты. Сумешчаны ЦЭ і ЦТ запланаваны на 26 мая, а 29 мая адбудуцца экзамены па рускай і беларускай мовах.
У некаторых рэгіёнах у сувязі са святамі ўвядуць часовыя забароны на продаж алкаголю, таму купіць у крамах спіртное 23 мая не атрымаецца.
Адкрываем купальны сезон
З 1 мая ў Беларусі афіцыйна пачынаецца купальны сезон: плануюць добраўпарадкаваць больш за 500 пляжаў і арганізаваць работу больш чым 150 пастоў АСВОД.
Скончыцца купальны сезон толькі 30 верасня.
У пенсіянераў з’явяцца скідкі на праезд у электрычцы
З 1 мая па 31 кастрычніка пенсіянеры могуць скарыстацца льготамі пры паездках на электрычцы. Акцыя распаўсюджваецца на праезд у цягніках рэгіянальных ліній эканомкласа, а каб атрымаць скідку, пры куплі білета трэба прад’явіць пенсіённае пасведчанне.
Калі жывяце ў ЕС, з беларускай крыптай узнікнуць праблемы
З 24 мая Еўрасаюз забараняе прама ці ўскосна ўдзельнічаць у любых здзелках, звязаных з крыптавалютай, калі паслугі аказвае беларуская юрыдычная асоба. А яшчэ – забароняць аказваць падтрымку развіццю лічбавага беларускага рубля і праводзіць з імі любыя аперацыі.
Забароны звязаны з новым пакетам санкцый Еўрасаюза, які быў апублікаваны ў красавіку 2026-га.
Літва ўводзіць новыя абмежаванні – на гэты раз з палівам
З 3 мая грузавым аўтамабілям з беларускай дзяржрэгістрацыяй нельга ўвозіць паліва ў стандартных баках, калі іх аб’ём перавышае 200 літраў. Абмежаванне не распаўсюджваецца на беларускія фуры, якія едуць праз Літву транзітам.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.