Куды пайсці ў вялікія выхадныя 8–10 сакавіка ў Мінску, Варшаве, Вільнюсе і Берліне

Усе выхадныя будзе праходзіць вясновая выстава аўтарскіх вырабаў «Чароўны млын», дзе можна будзе знайсці падарункі і сувеніры ад майстроў, мастакоў і дызайнераў Беларусі.

На выставе будуць прадстаўлены вырабы з дрэва, керамікі, шкла; лялькі і цацкі, карціны і пано, упрыгажэнні і адзенне, сумкі і аксесуары, а таксама фларыстычныя кампазіцыі.

У пятніцу і суботу ў Flame Place будзе праходзіць Spring Craftmall – вас запрашаюць разам сустрэць вясну і адзначыць самае далікатнае вясновае свята.

Будуць прыгожы кірмаш вырабаў ручной працы, спецыяльнае святочнае меню ад рэстарана Flame, музыка і непаўторная атмасфера. На маркеце вы зможаце купіць падарункі, свежыя кветкі, прысмакі, паспрабаваць смачныя святочныя стравы і напоі.

У прасторы «Цэх» будзе два дні імпрэз. У пятніцу, 8 сакавіка, вас чакае Bless Retro, а ў суботу, 9 сакавіка, – BLESS Retro x BLESS.

Будзе два танцполы: адзін для аматараў рэпа, а другі – для аматараў хітоў 2000-х. Таму ў кожнага будзе магчымасць знайсці тое, што яму даспадобы.

У суботу Сула запрашае ўсіх аматараў бліноў на «Шчодрую Масленіцу». Гэта гарэзлівае і вясёлае развітанне з зімой і сустрэча вясны, якая нясе ажыўленне прыродзе і сонечнае цяпло.

У праграме будзе шмат гульняў і забаў, смачнай ежы і падарункаў. Самыя спрытныя могуць паспрабаваць сябе ў розных спаборніцтвах: баі мяхамі, перацягванне канатаў, «Масленічны слуп» і не толькі. Самае цікавае застанецца тым, хто прыедзе на свята!

У суботу адбудзецца новая сустрэча праекта літаратурных вечароў «Аўтар выйшаў з дому». Гэтым разам прапануюць зірнуць на літаратуру «праз дзіцячае люстэрка», каб наблізіцца да адказаў на пытанні пра запатрабаванасць «дзіцячай», знарочыста спантаннай, інтуітыўнай манеры пісьма ў эпоху робаэтыкі і постпраўды; пра дзіцячае, непасрэднае бачанне свету (навошта?); пра тэмы дзяцінства, сям’і і ўсяго спектра эмоцый, з імі звязаных, атамізацыі і сацыяльнай энтрапіі; пра «дзіцячае» для дзяцей або для дарослых.

Праект Cinemascope запрашае паглядзець фільм 1970 года «Пяць лёгкіх п’ес».

Нафтавік Роберт Дзюпі жыве ў адным з мястэчкаў Тэхаса. Яго спадарожніца жыцця працуе афіцыянткай у мясцовай забягалаўцы. Ніхто не ведае, што некалі Роберт быў таленавітым піяністам, але паставіў крыж на кар’еры музыканта, кінуў сваякоў і з’ехаў у Тэхас. Але аднойчы яму прыходзіць паведамленне, што яго бацька пры смерці.

Фільм будзе ісці на мове арыгінала з рускімі субцітрамі.

У Нацыянальным цэнтры сучаснага мастацтва працуе выстава «Жарсці па архітэктуры».

Усе прыёмы, характэрныя для сучаснага мастацтва, усе метады ўздзеяння на гледача – святло, гук, прасторавыя аб’екты і інсталяцыі, відэаарт, творы мастацтва ў розных тэхніках і нават пахі, якія складаюць аснову экспазіцыі, – служаць перш за ўсё галоўнай мэце: выклікаць у чалавека эмацыйнае перажыванне прасторы, бо менавіта яно складае сутнасць эстэтычнага ўспрымання архітэктуры.

Аснову экспазіцыі складаюць працы як маладых, так і вядомых сучасных беларускіх аўтараў, а таксама творы беларускіх мастакоў з фонду НЦСМ.

Арт-праект Revolution запрашае на імпрэзу Monologue of Female Artists, прысвечаную Дню жаночай салідарнасці і вызвалення. У межах імпрэзы паразмаўляюць з трыма польскімі мастачкамі пра феміністычнае мастацтва, пакажуць іх выбраныя карціны і зладзяць перформанс эксперыментальнай беларускай музыкі ад KETEVAN.

У праграме: 18:00–21:00 – прагляд кароткаметражнага мастацкага фільма «3.14159» і трох серый MOOFA; 18:00–19:00 – майстар-класы па стварэнні зінаў ад Zofia Kuryło і Veta M.; 19:00–20:30 – панэльная дыскусія з удзелам польскіх фем-мастачак Хелены Сцясны, Кінгі Бурэк і Магдалены Лапіньскай-Розенбаўм; 20:40–21:00 – жывы сэт беларускай эксперыментальнай музыкі ад KETEVAN.

Мова мерапрыемства – польская (на майстар-класах таксама будзе перакладчык на рускую і ўкраінскую мовы).

У пятніцу пройдзе новая сустрэча беларускамоўнага нэтворкінгу «Клубень», дзе размаўляюць на беларускай мове на розныя цікавыя і нечаканыя тэмы.

Правілы простыя: будзе 3 раўнда і адна гульня. У кожным раўндзе вы апынецеся ў невялікай групе з 3–5 новымі людзьмі і атрымаеце тры цікавыя пытанні, каб размова была захапляльнай. Вы зможаце падзяліцца сваімі ідэямі і поглядамі, стварыць сувязі і пасябраваць з удзельнікамі.

А яшчэ падчас нэтворкінгу вы зможаце адпраўляць ананімныя запіскі адно аднаму, пакідаючы іх у адмысловай паштовай скрыні на стале. У канцы сустрэчы скрынкі адчыняць, і вы атрымаеце прызначаную вам «пошту».

У Варшаве прэзентуюць «Карані / Лісце» – зборнік дэкаланіяльных тэкстаў, напісаных жанчынамі, транс- і небінарнымі людзьмі з Беларусі. Ён быў створаны ў выніку пісьменніцкай лабараторыі, праца якой цягнулася апошнія паўгода і аб’яднала 50 літаратараў і літаратарак, якія цяпер жывуць у розных краінах.

На сустрэчы пагутараць з аўтарамі і аўтаркамі пра пісьмо і дэкаланіяльнасць у ім, падзеляцца досведам працы лабараторыі і паслухаюць чытанне тэкстаў.

На прэзентацыі можна будзе набыць асобнік за любую камфортную для вас суму. Частку сабраных ахвяраванняў перададуць праекту «Палітвязынка», які дапамагае беларускім жанчынам у зняволенні, а частку выкарыстаюць на падтрымку псіхалагічнага сэрвісу «Тэндар на гендар» для жанчын у крызісных сітуацыях у Беларусі.

Мастачка Карына Мараева і актывістка Яўгенія Доўгая запрашаюць дзетак і іх бацькоў на арт-пікнік у «Беларускім моладзевым хабе». У праграме – вітражны роспіс (вы створыце ліхтарык з вясновым кветкавым матывам) і стварэнне аплікацыі з паперы «Заапарк».

Абяцаюць вясёлае баўленне часу, файныя арт-аб’екты і магчымасць бацькам пакінуць дзяцей на тры гадзіны.

У нядзелю адбудзецца сустрэча з гуртом «Разбітае сэрца пацана» ў фармаце Stories. Вас чакаюць 1,5 гадзіны зносінаў з любімымі артыстамі ў нефармальнай абстаноўцы.

Артысты будуць расказваць пра сябе, свае ўзлёты і падзенні, смешныя і сумныя выпадкі, а таксама адказваць на самыя гарачыя пытаннечкі гледачоў.

У пятніцу суполка «ІншыЯ» разам з ініцыятывай «Гэта база» ладзіць у Вільнюсе квіз «Што вы ведаеце пра дыскрымінацыю?» у рамках Тыдня нулявой дыскрымінацыі.

Падчас квіза вы ўзгадаеце гісторыю барацьбы жанчын за свае правы, а таксама даведаецеся пра тое, што такое дыскрымінацыя і ці існуе яна дагэтуль у свеце і ў Беларусі.

Беларускія творцы ў Вільнюсе запрашаюць на новы «Шпакоўнік» – цыкл музычна-паэтычных сустрэч, натхнёных творчай ініцыятывай актрысы Анастасіі Шпакоўскай. Гэтым разам удзел бяруць Раман Арлоў і Кацярына Ваданосава.

У Берліне адбудзецца дыскусія «Адкрываючы трывожную (беларускую) касметычку», прысвечаная беларускаму досведу фемінізму.

Калі-небудзь задаваліся пытаннем, як вырвацца з абмежаванняў маленькага горада ў патрыярхальным грамадстве, азмрочаным гвалтам і стэрэатыпамі? Далучайцеся, каб абмеркаваць досвед Беларусі і беларускіх пратэстаў у гэтым аспекце праз фізічныя і пісьменніцкія практыкі.

Аўтарка кнігі «Я танцую» Віка Біран разбярэцца ў гэтых тэмах з філосафкай Вольгай Шпарагай і літаратуразнаўцай Яраславай Ананка. Рыхтуйцеся да сканцэнтраванага даследавання фемінізму, ЛГБТК і беларушчыны.