Куды пайсці ў выхадныя 7–9 красавіка ў Мінску, Варшаве, Вільнюсе і іншых гарадах, дзе жывуць беларусы

7 красавіка ў майстэрні «Ярна» пройдзе файны велікодны майстар-клас па пісанках. Пад далікатным кіраўніцтвам народнай майстрыхі Беларусі Наталлі Сухой вы засвоіце чатыры традыцыйныя тэхнікі аздаблення яек: крапанку, пісанку, шкробанку ды крашанку. Бонусам ідзе арт-медытацыя, бо спадарыня Наталля да таго ж дасведчаная арт-тэрапеўтка.

З сабой просяць прынесці 10 белых вараных яек і трошкі натхнення.

У пятніцу ў лекторыі «Фрэскі» стартуе другая плынь лекцый-дэгустацый гістарычнай беларускай кухні з Аленай Мікульчык, шэф-поваркай, даследчыцай кулінарыі і аўтаркай кнігі «Шляхецкая кухня».

Вас чакае кулінарнае падарожжа ў гісторыю беларускай кухні, знаёмства са старажытнымі рэцэптамі і тэхналогіямі, кухняй каралёў, сістэмай здаровага харчавання. А самае галоўнае – вы будзеце не толькі чуць і бачыць, але і дэгуставаць. І нават нешта зможаце прыгатаваць самі.

Тэма лекцыі 7 красавіка – «Гісторыя з’яўлення бульбы ў Еўропе і Беларусі. Уся праўда аб драніках». Даведаецеся, як бульба здзейсніла кулінарную рэвалюцыю, як узвысіла адны народы і загубіла іншыя. На майстар-класе і дэгустацыі вас чакае беларускі прадзед чыпсаў – бульбяныя локшыны з дзвюма падліўкамі.

Legendary Grooves – гэта магчымасць пераканацца ў шматграннасці грува і вывучыць вялізны культурны пласт, які стаў асновай для многіх жанраў і застаецца актуальным цяпер.

За адну ноч вы зможаце патанчыць пад фанк, дыска, хіп-хоп і хаўс.

У рамках рэтраспектывы «Новы Галівуд» ад праекта Cinemascope на Кастрычніцкай будуць круціць стужку «Французскі сувязны» Уільяма Фрыдкіна.

Эпоха Новага Галівуду адрознівалася творчай свабодай у рамках студыйнай сістэмы: аўтараў не абмяжоўвалі ні ў выбары тэм, ні ў тым, як іх падаваць. Дзякуючы гэтаму амерыканскія карціны таго часу практычна сцерлі грань паміж камерцыйным кіно і інтэлектуальным.

Паказ будзе адбывацца на мове арыгінала з рускімі субтытрамі.

Гэтымі выхаднымі ў Рэспубліканскім тэатры беларускай драматургіі адбудзецца прэм’ера спектакля «Вось я і прыйшла!» паводле Данііла Хармса. Новая пастаноўка – прастора парадокса, гратэску і гульні падсвядомасці галоўнага героя.

Завітайце ў дзіўны, поўны абсурду свет пісьменніка, які аднойчы атрымлівае заказ напісаць твор. На дапамогу нашаму герою прыходзіць Старая. Старая? А потым яшчэ адна… І яшчэ адна… Яны рознымі спосабамі заклікаюць пісьменніка пісаць: то ўгаворваюць яго, то супакойваюць, то б’юць, то пужаюць, то абдымаюць, то знікаюць. Хто гэтыя Старыя і ці рэальныя яны наогул?

Рэжысёр – Аляксандр Бародка.

5 красавіка ў Мінску пачала працаваць цудоўная выстава «відзікаў» – твораў беларускага традыцыйнага роспісу на шкле. Тут можна пабачыць процьму розных шкляных маляванак: і аўтэнтычныя экспанаты, прывезеныя з беларускіх вёсачак ды гарадоў, і артэфакты з музейных фондаў, і відзікі з прыватных калекцый, і нават шкляныя абразы, якіх па ўсёй Беларусі збераглося толькі два дзясяткі.

З 4 красавіка ў Палацы мастацтва працуе выстава Terragraphica, дзе можна пабачыць графічныя творы мноства знакамітых мастакоў – ад Пабла Пікаса да Валерыя Славука. Праект ставіць сабе задачу прыадчыніць для гледача дзверы ў неверагодны свет графікі і пазнаёміць яго з лепшымі мастакамі-графікамі, якія складаюць залаты фонд сусветнага мастацтва.

Сярод аўтараў выставы – вядомыя шырокай публіцы імёны: Пабла Пікаса, Сальвадор Далі, Уільям Хогарт, Напалеон Орда, Осіп Цадкін і Марк Шагал; класікі беларускай школы графікі – Анатоль Тычына, Сямён Герус, Васіль Шаранговіч, Георгій Паплаўскі, Уладзімір Басалыга і іншыя. Усяго экспазіцыя складаецца з больш чым 300 твораў графікі з прыватных калекцый, а таксама збору Беларускага саюза мастакоў.

У кнігарні-кавярні «Маркс» ідзе файная выстава «Ззянне наскрозь». Тут можна пабачыць творы мастакоў з інклюзіўнай майстэрні «Краіна Оз», якая працуе пры аддзяленні дзённага знаходжання для людзей з інваліднасцю і людзей сталага ўзросту.

Гэта тонкія, ясныя, жывыя працы творцаў малапрыкметных, амаль нябачных – і ўсё ж відавочных. Усе працы нараджаюцца насуперак і скрозь – насуперак адсутнасці матэрыялаў, цяжкасцям у падрыхтоўцы працэсу і замацаваным у свядомасці мадэлям успрымання.

Да 9 красавіка ў кінатэатры «Цэнтральны» будуць круціць італьянскае кіно. У праграму ўвайшлі камедыі апошніх гадоў. Рамантычныя, драматычныя разнажанравыя фільмы, якія пагрузяць вас у італьянскае жыццё.

• 7 красавіка – рамантычная камедыя «Мая другая палавінка» (2021);
• 8 красавіка – камедыйная меладрама «Каханне без памяці» (2021);
• 9 красавіка – камедыя «Лакдаўн па-італьянску» (2020).

7 красавіка беларуская рэжысёрка і музыка Паліна Дабравольская, якую многія ведаюць як CHORNABROVА, грае канцэрт у Варшаве. Яе музыка – гэта эклектыка: будзе вам і дарк-хоп, і фальклор з электронікай, і зусім неймаверныя спалучэнні ўсяго з усім, а яшчэ – моцныя тэксты.

7 красавіка ў «Беларускім моладзевым хабе» адбудзецца прэзентацыя фотаальбома пра Мінск «Я хачу дадому». На івэнце таксама можна будзе пазнаёміцца з аўтарамі твораў і парэфлексаваць на тэму дома и вымушанай эміграцыі з псіхалагіняй Валяй Сарокай.

Фотаальбом «Я хачу дадому» быз створаны па матывах выставы, якую ў кастрычніку 2022 года арганізавалі рабяты з арт-суполкі Heartbreaking Performance. У альбом увайшлі здымкі Мінска розных гадоў да 2020-га.

8 красавіка Света Бень і Галя Чыкіс граюць у Варшаве канцэрт і прэзентуюць свой першы сумесны альбом «Прыём!» Прыходзьце сёрфіць ды паглыбляцца ў хвалі эмоцый – ад безнадзейна адчаю да нястрыманай надзеі.

З 5 красавіка ў Гданьску працуе выстава Анастасіі Рыдлеўскай «Я бяру свой гнеў з сабой». На выставе – самыя новыя арт-аб’екты, створаныя літаральна ў сакавіку 2023 года. Творы расказваюць пра шырокі спектр дыскамфортных эмоцый, якія людзі знаходзяць у сабе і спрабуюць схаваць нават ад сябе.

7 красавіка беларускі незалежны «Тэатр_безназвы» запрашае на чытку па п’есе Славаміра Мрожака «Дом на мяжы». Гэта п’еса ў жанры абсурду, дзе сутыкаюцца два светы: свет простых людзей і шалёны – дзяржавы і чыноўнікаў. Тэма, на жаль, застаецца актуальнай. А мы паспрабуем з гэтага пасмяяцца, бо як па-іншаму?

Чытка адбудзецца на рускай мове.

Вас запрашаюць стаць значнай часткай фотапраекта «Быць, а не падавацца». Спалучэнне фатаграфіі і псіхалогіі дасць вам магчымасць убачыць сябе такімі, якія вы ёсць на самой справе. Асноўная ідэя ў тым, што сапраўдная прыгажосць і прывабнасць зыходзяць з таго, як мы сябе адчуваем унутры.

Што вас чакае?

• Партрэтныя фатаграфіі кожнага ўдзельніка перад трэніроўкай.
• Праца псіхолага з заціскамі – практыка будзе накіравана на іх ухіленне. Цялесныя заціскі часта перашкаджаюць раскрыццю асобы і эмацыйнага стану.
• Партрэт кожнага пасля трэніроўкі.

Удзельнікі праекта: група з шасці чалавек, таму колькасць месцаў абмежавана.

Усіх-усіх запрашаюць правесці суботу на «Ночы правалаў», дзе кожны і кожная змогуць расказаць (а іншыя – паслухаць) гісторыі пра пацешныя вандроўкі, няўдалыя спробы зразумець мясцовыя звычаі, пра страчаны багаж і нечаканыя сітуацыі, якія прывялі да сапраўдных прыгод.

Што патрэбна, каб прыйсці паслухаць?

• Зарэгістравацца;
• прынесці якаю-небудзь купюру – free donation;
• узяць з сабой добры настрой і цёплую падтрымку для тых, хто будзе выступаць.