Куды пайсці ў выхадныя 3–5 сакавіка ў Мінску, Варшаве, Вільнюсе і іншых гарадах, дзе жывуць беларусы

Новы сезон – цікавыя абноўкі. Завітайце на дабрачынны маркет KaliLaska, купіце сабе што-небудзь новенькае і проста добра пабаўце час.

У першыя тры дні маркета абяцаюць лепшыя навінкі па выдатнай цане: будуць пастаянна дадаваць і давешваць крутыя штучкі для вашых ідэальных аўтфітаў і інтэр’ераў. У нядзелю адбудзецца суперсэйл: увесь асартымент за палову кошту!

«Чароўны Млын» будзе праходзіць тры дні – з пятніцы па нядзелю. Там вы знойдзеце вырабы з дрэва, керамікі і шкла, лялькі і цацкі, карціны і пано, упрыгажэнні і адзенне, фларыстычныя кампазіцыі, фермерскія экапрадукты і іншае. Завітвайце за падарункамі.

У «Вершах» адбудзецца майстар-клас па лепцы з самазастывальнай гліны. Пад кіраўніцтвам вопытнай мастачкі вы зможаце самі зляпіць галоўны сімвал вясны – сакавіцкага ката. Ну, і пагутарыць з цікавымі людзьмі і добра пабавіць час.

16 беларускіх аўтараў правялі сваё міні-даследаванне і падзяліліся тым, што іх уразіла ў культуры і гісторыі Бразіліі, на мовах жывапісу, графікі, арт-аб’екта, інсталяцыі, лічбавага мастацтва і анімацыі. Экспазіцыя выставы складаецца ў калектыўна створаны партрэт Бразіліі – тое, як бачаць яе беларускія мастакі.

У нядзелю ў прасторы «Вершы» збяруцца клёвыя беларускія рамеснікі, таму вельмі выгодна можна будзе разгледзець працы адразу некалькіх вытворцаў і выбраць тое, што больш падабаецца. Для атмасферы будзе яшчэ і дыджэйка, таму абавязкова забяжыце па порцыю творчасці.

З 1 па 12 сакавіка ў батанічным садзе праходзіць кветкавая выстава цюльпанаў і гіяцынтаў «Дыханне вясны». На экспазіцыі прадстаўлены і свежыя вясновыя кампазіцыі, і працы ў стылі ікебаны, і ў тэхніцы сумі-э (жывапіс тушшу). А яшчэ там можна набыць расліны ў збанках у падарунак каханым.

Таксама ў рамках выставы 3, 4, 5 сакавіка ў 13:00 пройдзе практыкум «Цыбульныя расліны». Вы даведаецеся, як захаваць цыбульныя пасля цвіцення, якія гатункі лепш выбіраць для «выганкі» і ўсё пра агратэхніку вырошчвання цыбульных.

У галерэі «ДК» праходзіць выстава, прымеркаваная да 100-годдзя найярчэйшага прадстаўніка беларускай жывапіснай школы, народнага мастака Леаніда Шчамялёва. Гэта чалавек-эпоха, мастак свайго часу, паэт жывапісу, гісторык, краязнаўца і назіральнік.

Карціны Шчамялёва вылучаюцца свабодай: легкасцю выканання, экспрэсіўнасцю і дынамічнасцю. Завітайце, як будзе час, – не пашкадуеце.

З пятніцы ў барнай частцы рэстарана Ember запускаецца эксклюзіўны культурны праект, арганізаваны сумесна з галерэяй «ДК». На выставе можна будзе пазнаёміцца з творчасцю сучаснага беларускага мастака Анатоля Кузняцова (на экспазіцыі вас чакае больш за 10 прац аўтара).

Праект цікавы тым, што можна і на мастацтва паглядзець, і кактэйль у бары замовіць. А калі якая-небудзь праца спадабаецца, яе можна будзе адразу і набыць.

У Музеі гісторыі Гарадніцы працуе выстава «Веснавыя святы, абрады і звычаі беларусаў». Там можна пазнаёміцца з народнымі традыцыямі веснавых святаў Гукання вясны, Саракоў, Благавешчання, Камаедзіцы, Вялікадня, Юр’я.

У экспазіцыі – абразы ХІХ ст., птушкі з тканіны, паперы, гліны, саломы, абрадавыя атрыбуты ды процьма іншых народных ды аўтарскіх твораў, прысвечаных абрадам надыходу вясны.

У «Беларускім моладзевым хабе» распачынаецца цыкл дзіцячых праграм «Чароўны край» з музыкамі Сержуком Доўгушавым і Андрэем Еўдакімавым. Абяцаюць аўтарскія праграмы на аснове народных традыцый і фальклору ў сучасным аздабленні.

На першай сустрэчы – знаёмства з унікальнымі музычнымі інструментамі, інтэрактыўныя гульні, супольныя спевы і танцы. Прагучаць і некаторыя творы з рэпертуару гурта Vuraj.

У нядзелю беларускія рамеснікі Варшавы збяруцца ў бары Beer Station Ursynów, каб прапанаваць вам свае вырабы напярэдадні 8 сакавіка. Будуць біжутэрыя, кніжкі, касметыка, дэкор для дому, кашулі з беларускімі надпісамі і іншае. Заходзьце за падарункамі – сабе ці сяброўкам.

У Музеі вольнай Беларусі запланавана творчая сустрэча з тым самым Маляванычам, якога ўсе ведаюць па «Калыханцы». Артыст прапануе паслухаць паэтычную кампазіцыю па вершах беларускіх паэтаў, а мерапрыемства называецца «Вось яны, а вось мы». Уваход вольны – завітвайце.

У нядзелю ў Кракаў з гарачанькім стэндапам на беларускай мове прыбываюць Ягор Анісімаў, Павел Радзевіч і Аляксандр Калінкін. Абяцаюць лепшыя жарты і добрую атмасферу.

У суботу ў Гданьск едзе суполка беларускіх комікаў «Пан Стэндап» і вязе свае лепшыя жарты на роднай мове. Выступяць Максім Канавал, Андрусь Райн і Ян Ліпай. Набывайце білеты і праводзьце суботу весела.

Беларусаў Вільнюса запрашаюць на гарадскі кірмаш Казюкас – падтрымаць беларускіх майстроў і набыць што-небудзь цікавае для сябе ці ў падарунак. Будуць дызайнерскае адзенне, упрыгажэнні, сумкі, паштоўкі і іншыя рэчы, зробленыя з душой.

Вас запрашаюць на беларускі моўны гурток, дзе ў спакойных і бяспечных абставінах абмяркоўваюць самыя розныя тэмы і рэчы – і ўсё на роднай мове. Колькасць месцаў абмежавана, таму не забудзьце запоўніць адпаведную форму для рэгістрацыі.

У нядзелю вас клічуць адзначаць 8 Сакавіка, разам смяяцца і танчыць. А яшчэ дапамагаць іншым: сабраныя сродкі будуць накіраваны на падтрымку ініцыятывы «Палітвязынка», якая працуе з жанчынамі-палітвязнямі ў Беларусі.

Квіткоў усяго 50 штук, таму паспейце зарэгістравацца.