Куды пайсці ў выхадныя 22–24 сакавіка ў Мінску, Варшаве, Вільнюсе і Берліне

У Нацыянальным цэнтры сучасных мастацтваў куратар Міхаіл Мірошнікаў прачытае лекцыю «Беларускі ландшафт». Будуць размаўляць пра разнавіднасці і філасофію роднага ландшафту.

Краявіды, архітэктурныя матывы, святы і будні адлюстраваліся ў шматлікіх палотнах мастакоў, каштоўнасць твораў якіх з часам узрастае: сучасныя тэхналогіі і тыражнасць робяць прафесійны пейзаж дарагім рарытэтам.

Праект Cinemascope запрашае паглядзець роўд-муві-кіно 1939 года «Дыліжанс». Трансляцыя будзе весціся на мове арыгінала з рускімі субцітрамі.

Паўночная Амерыка, канец 19-га стагоддзя. З маленькага мястэчка пад назвай Тонта адпраўляецца дыліжанс. Пункт прызначэння – Нью-Мексіка. Кампанія падабралася больш чым пярэстая: п’яніца-доктар, які страціў ліцэнзію, баязлівы банкір, шулер, гандляр алкаголем, куртызанка і цяжарная жонка афіцэра. На чале дыліжанса – вярзіла-фурман і грубаваты прадстаўнік закона. Ужо ў дарозе да экіпажа прыбіўся каўбой-злачынца.

Экіпажу трэба будзе перасекчы арызонскія прэрыі, дзе поўна непрыязна настроеных індзейцаў. Ці дабяруцца героі да Нью-Мексіка ў поўным складзе?

Нічога лішняга: любімая музыка, асляпляльнае святло, бляск дыскашара і нерэальная атмасфера. Для тых, каму трэба патанчыць.

Па традыцыі вас чакаюць вінтаж, garage sale, дызайн, вініл, арт, музыка, модны паказ, майстар-класы да актыўнасці ад партнёраў. Хочацца схадзіць хаця б дзеля атмасферы.

«ТэатраТэрапія» – гэта два дні, поўных унутраных лабараторый, практык і трансфармацый. Сустрэчы пройдуць пад тэмай «Адзінота – непераадольны разрыў паміж Я і Іншымі» з сумесным праглядам спектакля «Вечар».

Каб замовіць месца, неабходна прайсці невялікае сумоўе з куратаркай праекта Жаннай Гурынай. Пасля гэтага вы атрымаеце поўныя звесткі аб праграме і часе сустрэч.

Звяртайцеся па нумары +375 44 765 11 93 альбо ў інстаграм @gurina.coach.

У сераду, 20 сакавіка, у галерэі «Арт Фабрыка» адкрылася выстава «Пагоркi i грудкi» – сапраўднае падарожжа па хвалістай паверхні часу і прасторы непадалёк ад старажытнага Лоска.

Некалькі аўтараў сустрэліся ў гэтым пейзажы і пражылі творчы час з летняй навальніцай, шпацырамі па ваколіцах, купаннямі ў бліскучай рэчцы, доўгімі размовамі, фатаграфічнымі эксперыментамі і народжанай ідэяй сумеснай працы, якая расцягнулася на некалькі месяцаў і пераўтварылася ў калектыўны праект-развагу над вечнымі філасофскімі пытаннямі.

Усе фотаздымкі надрукаваны ў тэхніцы цыянатыпіі літаральна на летнім сонцы ўдзельнікамі праекта.

У Палацы мастацтва адкрылася выстава Terragraphica: Sacrum, якая ахоплівае шырокі пласт чалавечага ўяўлення аб уладкаванні Сусвету. Праз міфы, легенды, духоўныя практыкі і рэлігіі мы прыходзім да сакральнага сэнсу.

Сакральнае мастацтва – гэта не экзістэнцыяльная спрэчка аб паходжанні свету і сутнасці светабудовы, а хутчэй спроба канкрэтнага мастака даць адказ на вечныя пытанні пра прыроду дабра і зла, граху і дабрадзейнасці.

У нядзелю ў беларускім месцы Scena Chmielna пройдзе арт-маркет беларускіх рамеснікаў. Модна будзе набыць упрыгажэнні, свечкі, адзенне, прысмакі і іншыя рэчы, створаныя рукамі нашых майстроў. Завітвайце!

У нядзелю беларусы Варшавы святкуюць Дзень Волі. Спачатку будзе мітынг з удзелам беларускіх, польскіх, украінскіх палітычных і грамадскіх дзеячаў. Пасля стартуе марш да помніка Мікалаю Каперніку – традыцыйнага месца правядзення штотыднёвых беларускіх акцый. Фінальным пунктам падзеі стане вялікі вечаровы канцэрт на Замкавай плошчы з удзелам вядомых беларускіх артыстаў.

Сярод музыкаў, якія прымуць удзел у святкаванні, – Dzieciuki, Піт Паўлаў, Atesta.

Гурт N.R.M. грае ў Варшаве вялікі канцэрт салідарнасці да Дня Волі. Салідарнасці з усімі, хто змагаецца за свабоду і дэмакратыю ў краінах, дзе гэтыя асноўныя правы чалавека знішчаны.

Разам з N.R.M. у імпрэзе бярэ ўдзел яшчэ адзін беларускі рок-гурт, назва якога пакуль не раскрываецца. Да музыкаў далучыцца і вядомы польскі мастак і акцыяніст Павел Альтхамэр.

CreateCulture Space запрашае на адкрыццё выставы Out(In)side беларускай мастачкі Ангеліны Блашчыцынай, пераможцы сумеснага з Chrysalis Mag OPEN CALL для мастакоў і мастачак з Беларусі.

Out(In)side – выстава-даследаванне ўнутранага і знешняга свету чалавека праз партрэты і акварэльныя ілюстрацыі мастачкі. Праз кожны слой заліўкі, кожнае перапляценне колераў мастачка расказвае гісторыю пра сустрэчу рэальнасці і міфа, а акварэль як матэрыял накіроўвае гледача даследаваць крохкасць і тонкасць уласнай існасці.

Беларусы Вільнюса таксама збіраюцца разам, каб адсвяткаваць Дзень Волі. Запланаваны аўтапрабег, канцэрт з удзелам беларускіх музыкаў, святочны марш, круглы стол і іншае.

Падрабязны расклад і месцы правядзення мерапрыемстваў глядзіце тут.

Прадзюсарская ініцыятыва INEX KULT прывозіць у Берлін спектакль Юры Дзівакова Clausa Fores у выкананні Аляксандра Казелы. Вы ўбачыце і, галоўнае, пачуеце з першых вуснаў музычную гісторыю падзення самотнага тырана.

Спектакль будзе ісці на італьянскай і нямецкай мовах.

З пятніцы, 22 сакавіка, Інстытут Гётэ ў выгнанні ладзіць у Берліне міждысцыплінарны фестываль, прысвечаны Беларусі. Фэст мае мэтай засяродзіць увагу на жыццяздольнасці і разнастайнасці беларускай культурнай сцэны ў Германіі і за яе межамі.

Падрабязную праграму, лакацыі ды спасылкі на рэгістрацыю (там, дзе яна патрэбна) глядзіце тут.