Куды пайсці ў выхадныя 21–23 ліпеня ў Мінску, Варшаве і Вільнюсе

Беларускі мастак Андрэй Пічушкін падзеліцца важнасцю мемаў і іх ролі ў сучасным мастацтве. Прывядзе прыклады мастакоў, якія выкарыстоўваюць інтэрнэт-малюнкі ў сваіх работах і ствараюць значныя выказванні. Будзе цікава!

Хочацца расслабіцца пасля працоўнага тыдня, але пры гэтым атрымаць новыя веды ці натхненне? Далучайцеся да кінавечара ў InnoDom. Там пакажуць фільмы на IT-тэматыку, а пасля можна будзе разам абмеркаваць.

Перформанс нагадвае, што ўсё ў жыцці пакідае сляды: людзі, сітуацыі і час. Уявіце, як шмат гісторый мы пражываем, і кожная з іх адбіваецца на вас, мне, нас. Гэта ўнікальны код. Захавайце свой адбітак. Хочаце – адпусціце, можаце – падзяліцеся. Забярыце новы адбітак з сабой.

«Лета ў “Манахроме”» – спецыяльная праграма фільмаў з летнім настроем у прасторы «Манахром». Гэтым разам будуць паказваць французскае кіно 1983 года «Паліна на пляжы» (Pauline à la plage).

Пасля разводу Марыён вырашае правесці астатак лета ў загарадным доме на Нармандскім узбярэжжы. Яна бярэ з сабой юную кузіну Паліну, якая рада падоўжыць свае вакацыі. На пляжы Паліна і Марыён сустракаюць П’ера, былога палюбоўніка Марыён. Ён прапануе навучыць іх віндсёрфінгу, а таксама знаёміць з Анры, які запрашае іх да сябе. Падчас наведвання мясцовага казіно П’ер прызнаецца Марыён у каханні, але тая аддае перавагу Анры. Тым часам Паліна знаёміцца з Сільвенам…

Вечарына Tonight адпраўляецца на востраў Мадагаскар! Ужо ў гэту суботу вас чакаюць лепшыя хіты 2000-х, крутыя дэкарацыі, тэматычныя фатазоны, музыка ад дыджэяў, мэйкап- і тату-зоны з пераводкамі, dance show і іншае.

Брэнд Miller аб’ядноўвае ў адным месцы самыя таленавітыя промагрупы горада і кліча вас на музычны фестываль з трыма танцполамі. Абяцаюць незабыўную атмасферу цудоўнай музыкі, разнастайных жанраў і ўнікальных гучанняў, якія адлюстроўваюць дух і культуру горада.

Зноў Vulitsa Ezha – зноў насычаная праграма на выхадныя. На тэрыторыі батанічнага саду вас будуць чакаць больш за 50 удзельнікаў на вялікім фуд-корце, дызайнерскі «Гарошак-маркет», дабрачынны праект «Добрая ежа», Local Food Market з фермерскімі вырабамі, вулічны кінатэатр, вялікая дзіцячая прастора, споты з летнімі напоямі, дэгустацыямі, інтэрактывамі, лекцыямі і майстар-класамі і шмат іншага.

Білеты лепш купіць анлайн, каб не стаяць у вялікай чарзе на ўваходзе.

У нядзелю музей Якуба Коласа запрашае на свята, прымеркаванае да стагоддзя выхаду ў свет паэмы «Новая зямля». Пачынаюць у Мінску, а заканчваюць на Стаўбцоўшчыне.

Свята пачнецца з 10:00. У праграме: прэзентацыя факсімільнага выдання паэмы Якуба Коласа «Новая зямля»; прывітальныя словы ганаровых гасцей свята; кава-паўза; ад’езд на Стаўбцоўшчыну; ускладанне кветак да помніка Якубу Коласу ў Стоўбцах; экскурсія па сядзібе Акінчыцы філіяла «Мікалаеўшчына»; свята паэзіі, песні і народных рамёстваў «З народнага скарбу душы самабытнай» на сядзібе Альбуць; ад’езд у Мінск.

З 17 па 30 ліпеня 23 пункты ў фудмоле «Канкорс» прапаноўваюць гасцям асаблівае меню – аўтарскія сэты з фіксаваным коштам 20 руб. Можна паспрабаваць розныя кухні свету: кітайскую, амерыканскую, грузінскую, ліванскую, в’етнамскую, італьянскую і іншыя.

Выдатным дадаткам да ежы і напояў стане насычаная забаўляльная праграма. У рамках фестывалю запланаваны выступленні музыкантаў і танцавальных калектываў, кулінарныя батлы і дэгустацыі, творчыя майстар-класы і дзіцячыя шоу.

На працягу двух дзён у бары «Карма» ў Варшаве 13 дыджэяў з Украіны, Беларусі і Францыі будуць ладзіць салідарныя рытмы, а ў студыі будуць працаваць тры запрошаныя татуіроўшчыкі. Таму можна будзе і адпачыць, і зрабіць на сабе малюнак на памяць.

Запісвацца не трэба, проста прыходзьце. Усе грошы з мерапрыемства пойдуць на дабрачыннасць.

Беларускае трыа DLINA VOLNY грае канцэрт у Варшаве. Кампанію складзе COSEY MUELLER, берлінская артыстка, удзельніца праекта Das Das.

Цікава, што трыа даследуе synthwave і постпанк і творча чэрпае з традыцый гэтых плыняў, а таксама з багатай спадчыны альтэрнатыўнай і электроннай усходнееўрапейскай музыкі.

У пятніцу адбудзецца канцэрт супердуэта Sielicki/Vorsoba – польскага кампазітара Эдварда Сяліцкага і беларускага кампазітара, акардэаніста, заснавальніка гурта Port Mone Аляксея Варсобы.

Гэтыя два неверагодныя музыкі з вялікім творчым і імправізацыйным досведам выступяць разам упершыню – не прапусціце.

Flexi studio, якую адкрылі беларусы ў Варшаве, запрашае на майстар-клас па маляванні. Навыкі не патрэбныя, можна прыходзіць зусім без досведу. Усё неабходнае для малявання будзе на месцы: фарбы, пэндзлі, палотны, пачастункі, напоі і нават віно.

А калі прыйсці з сябрам ці сяброўкай, то можна атрымаць скідку – майстар-клас абыдзецца ў 150 злотых кожнаму.

На працягу трох дзён у Вільнюсе будуць праходзіць паказы беларускага кінафэсту «Нефільтраванае кіно», адмененага сёлета ў Мінску па загадзе Мінкульта.

У чацвер у Ideas Block (A. Goštauto, 11) пакажуць праграму гістарычнага відэаарта – мастацтва супраціву.

У пятніцу ў CreateCulture Space (Karmelitų, 5) пакажуць Frontline. Ці здольны кінематограф адлюстраваць сучаснасць у цяжкія часы гуманітарных катастроф і войнаў? Што сёння можа выканаць ролю авангарда ў гэтым мастацтве?

А ў суботу вяртайцеся ў Ideas Block на сеанс найлепшых кароткаметражак фэсту.

У пятніцу адкрываецца выстава Кацярыны Пікірэні «Вязьмо». Гэта праект, які даследуе эстэтычны і містычны складнікі беларускіх літар, спрабуе намацаць мяжу, на якой знак пачынае перарастаць у абстрактны ўзор.

Гэты графічны эксперымент прысвечаны трывожнай сувязі з бабулямі, наймагутнейшымі полюсамі радаводаў. «Вязьмо» – не толькі пра любоў і памяць, але таксама пра сузалежнасць, разгубленасць і супярэчлівы досвед.

Выстава будзе працаваць да 21 верасня.