Куды пайсці ў выхадныя 20–22 кастрычніка ў Мінску, Варшаве, Вільнюсе і іншых гарадах, дзе жывуць беларусы

Вечарынка, якая дапаможа вам зрабіць першыя крокі ў пражыванне, усведамленне і прыняцце сваіх схаваных бакоў. Абяцаюць працаваць з усімі ўзроўнямі ўспрымання: ментальным, эмацыйным і фізічным.

У праграме, якая пачнецца з 18:00, – знаёмства з паняццем ценю і спосабамі яго трансфармацыі ў дары; інтэрактыўная лекцыя «Даведайся пра свой архетып тара»; тантрычная практыка Дасканаласці; практыка з дошкамі садху «Калідор кахання». З 23:00 – пачатак вечарыны. Dress code: freaky bohemian.

«Трыстана» з Катрын Дэнёў – адзін з апошніх фільмаў ветэрана-сюррэаліста Луіса Бунюэля, які да самага канца сваёй кар’еры захоўваў і рэжысёрскую хватку, і непрадказальную фантазію, і анархісцкую злосць.

Але менавіта «Трыстана» выклікала ў момант свайго выхаду на экраны здзіўленне крытыкаў. Як так: перакананы сюррэаліст раптам звярнуўся да класічнай прозы «іспанскага Бальзака» Беніта Перэса Гальдоса і зняў фільм паводле яго рамана гэтак жа строга і як бы рэалістычна. Але сюррэаліст заўсёды сюррэаліст: рэалізм «Трыстаны» падманлівы...

Фільм будуць паказваць у Скульптурнай залі музея з выкарыстаннем бесправадных навушнікаў на мове арыгінала (іспанскі) з рускімі субтытрамі.

У музеі Якуба Коласа пройдзе імпрэза «Хатні тэатр – тэорыя і рэальнасць» ад сямейнага тэатра «Бусы».

Спачатку пакажуць хатні спектакль з дзецьмі «Эксперымент 3028» пра дзіўны выпадак у лабараторыі штучнага інтэлекту і наш чалавечы выбар. Пасля вас чакае займальная лекцыя па гісторыі хатняга тэатра: даведаецеся пра тэатры на стале, пад сталом, на паляне, у агародзе, у кватэры, палацы і замку. А на салодкае – майстэрня па стварэнні смешных хатніх робатаў.

Запіс па тэл.: +375 17 270 17 02.

І зноў KaliLaska Market будзе праходзіць у новым фармаце: працаваць барахолка будзе не толькі на выхадных, але цэлы тыдзень. Абнаўляць асартымент абяцаюць кожны дзень, таму наведаць можна і не аднойчы.

У наступныя выхадныя – 28-29 кастрычніка – пройдзе фінальны распродаж: усе рэчы, якія застануцца, будуць аддаваць з 50%-най скідкай.

У Індыі існуе 72 асноўных класічных рагі і некалькі тысяч варыяцый. Традыцыя загадвае кожнай пары года і часу сутак сваю рагу. Гэта санскрыцкае слова літаральна азначае «запал, колер і прыхільнасць», нешта, што здольна «афарбаваць сэрцы людзей».

Вас будзе чакаць цудоўны вечар з выканаўцамі Ягорам Джэйгалам (флейта бансуры) і Юрыем Лебедзевым (табла).

У чацвер, 19 кастрычніка, у Палацы мастацтва адкрываецца выстава пераможцаў «Восеньскага салон» Postscriptum XXXIII. Вас чакаюць творы 35 мастакоў, якіх наведвальнікі найбольш актыўна падтрымалі ў наступных намінацыях: жывапіс, графіка, скульптура, манументальнае і дэкаратыўнае мастацтва, інсталяцыя і фатаграфія.

У пятніцу, 20 кастрычніка, у галерэі «ДК» адкрываецца выстава графікі гродзенскай мастачкі Валянціны Шобы «А гэта вінілы пра Лета».

Аўтарка нарадзілася разам з культурай хіпі і, калі дайшла да сталага ўзросту, прыйшла да ўсведамлення прывабнасці і правільнасці сузірання і адзіноты як асновы жыцця. І раптам з цэнтра яе жыцця забіў фантан з кветак і гукаў… Публіка кідае кветкі на сцэну ўспамінаў… І адкрыўся партал у той, іншы свет, і ўсё, што з’явілася са стану забыцця, прыйшло, каб здабыць абрысы, якія гучаць. Жыццё цыклічнае.

Музей вольнай Беларусі запрашае на унікальную выставу Ганны Каран «Сукенкi за свабоду». Праект Ганны з’яўляецца асэнсаванай рэакцыяй на падзеі апошніх гадоў у Беларусі, звязаныя з пратэсным рухам як рэакцыяй на беззаконне і беспакаранасць дыктатарскага рэжыму. Ганна звяртаецца да выключна персанальных гісторый людзей і выкарыстоўвае іх асабістыя рэчы.

Удзельніцы праекта па просьбе мастачкі самі выбіралі сукенку. Каб далікатны тэкстыль не спарахнеў, Ганна пакрывае гэтыя сукенкі тоўстым слоем эпаксіду, ператвараючы кожную сукенку ў помнік. Аб’екты пачынаюць напаўняцца сэнсамі, калі Ганна выходзіць у поле, дзе «прымярае» на сукенкі жывыя кветкі і пры дапамозе фарбы фіксуе іх адбітак. Так унутры кожнай сукенкі Ганна кансервуе энергетыку чалавека і перажытых падзей.

Таццяна Грыневіч-Матафонава вяртаецца ў Варшаву з акустычным канцэртам. Будуць песні пад гітару і скрыпку, сумесныя тэрапеўтычныя спевы, танцы і шчырыя гутаркі.

Таццяна стаяла ля вытокаў аднаўлення беларускіх народных танцаў. Пра гэта, а таксама пра сваё цяперашняе жыццё ў Стамбуле яна раскажа падчас канцэрта.

Калі пачаць пералічваць самыя багемныя месцы Варшавы, то, вядома, можна ўспомніць пляц Збавіцеля, вуліцу Познаньску або Саску Кемпу, але ўсе гэтыя месцы цьмянеюць у параўнанні з ім – самым старым некропалем Варшавы Павонзкамі. Тут адпачываюць вяршкі польскай інтэлігенцыі: уплывовыя палітыкі, таленавітыя мастакі і музыканты, рэжысёры і дзеячы літаратуры. І ўсё гэта – пад балдахінам дзіўнай архітэктуры склепаў і скульптур надмагілляў.

Праект Poznanska 24 запрашае паглыбіцца ў замагільны свет Варшавы і дакрануцца да інфернальнай гісторыі тых, каго з намі няма, але хто назірае за намі ўвесь час.

Праект So People запрашае на экскурсію з культурным аглядальнікам па адным з самых арыстакратычных раёнаў Варшавы – Жалібожы. Абяцаюць расказаць тое, пра што ведаюць толькі жыхары гэтых мясцін.

Беларусаў Варшавы, якія вымушана пакінулі краіну ў выніку палітычных рэпрэсій і гвалту, запрашаюць на бясплатную групу псіхалагічнай дапамогі. У праграме: псіхатэрапія траўмы і крызісных станаў; кансультатыўная псіхалагічная дапамога ўдзельнікам групы; псіхаасвета; групавая падтрымка і магчымасць пашырэння камунікацыі.

Групы будуць праходзіць афлайн 1 раз у 2 тыдні. Працягласць – 2 гадзіны.

У пятніцу беларускі рэгі-гурт Botanic project прэзентуе ва Вроцлаве новы альбом «Музыка сфер». Абяцаюць канцэрт у найлепшых традыцыях рэгі, песні з новага альбома і вядомыя хіты. А яшчэ афтэпаці з гарачанькай электроннай музыкай і дзікімі танцамі ад PAPA BO SELEKTAH.

У Гданьску адбудзецца спеўны сход з Сержуком Доўгушавым. Будуць супольныя спевы, танцы, прэзентацыя спеўніка «Бяседныя песні» і нават застолле (калі пажадаеце). Адмысловая госця – Ірына Ляшкевіч з гурта Kaliažanki.

Білеты на выбар: 30 зл. (у такі білет уваходзіць спеўнік у падарунак ды Samahon Shot) або 65 зл. – з застоллем з ежай і напоямі і спеўнікам у падарунак.

Прастора CreateCulture Space запрашае на новую Ноч правалаў на тэму «Летнія гісторыі». Паўдзельнічаць можна як спікер або як слухач.

Калі ёсць што расказаць, запісвайцеся ў якасці выступоўца: трэба будзе падрыхтаваць выступ на 7 хвілін у стылі стэндап або TED Talk і па магчымасці зрабіць прэзентацыю ці паказаць відэа.

А калі хочацца проста прыйсці і паслухаць, то рэгіструйцеся ў якасці ўдзельніка і прыходзьце з добрым настроем.

Беларусаў Вільнюса запрашаюць далучыцца да падтрымкі Украіны праз удзел у невялікім чэмпіянаце па бадмінтоне (узровень любы; калі няма ракеткі, можна арандаваць на месцы). За 3-е і 2-е месца абяцаюць маленькія прызы, а за 1-е – файную футболку са спецыяльна распрацаваным дызайнам.

У нядзелю ў Берліне яшчэ раз паказваюць дакументальны фільм Ганны Бадзякі і Аляксандра Міхалковіча Motherland, у якім беларускія пратэсты разглядаюцца скрозь прызму сістэмнага гвалту ў беларускай арміі і – глыбей – у беларускім грамадстве.

У нядзелю пашанцуе беларусам Мюнхена – туды з канцэртам едзе гурт NAVIBAND. Будуць любімыя песні, поўны гук і «свая» атмасфера. Не прапусціце!