Куды пайсці ў выхадныя 2–4 чэрвеня ў Мінску, Варшаве, Вільнюсе, Таліне і іншых гарадах, дзе жывуць беларусы

Lidbeer Dvor кліча на EZOO Fest – прыходзьце са сваімі сабакамі, коцікамі, пацукамі, лісамі і хто там у вас ёсць.

У праграме – шмат актыўнасцяў для дзетак і дарослых, промазоны і конкурсы ад партнёраў, маркет, аджыліці і фрысбі, дабрачынныя зоны, дзе можна знайсці новага сябра, і іншае.

На «Лучшей улице» пройдуць Дні крафта. Арганізатары сцвярджаюць, што рыхтуюць шмат цікавага: вялікую зону крафта, піўны лекторый, музычную атмасферу, зоны актыўнасцяў, фуд-корт ад рэзідэнтаў «Лучшей улицы» і іншае.

Фестываль будзе праходзіць два дні з 12:00 да 22:00.

На Мінскім моры адбудзецца вялікі open air. Будзе шмат музыкі да самай раніцы, некалькі танцполаў, прыгожая прырода на захадзе сонца, ежа, напіткі і непаўторная атмасфера. Расклад выступаў глядзіце тут (там жа і білеты).

У нядзелю ў прасторы «Вершы» пройдзе паэтычны перформанс з Аляксандрам Міцкевічам «Меней за адзінку». Каб запісацца на прагляд, пішыце ў дырэкт.

Праект Cinemascope запрашае паглядзець нямое кіно пад жывую музыку. Гэтым разам будзе фільм «Берлін. Сімфонія вялікага горада» (1927 год). Музычнае суправаджэнне: Аляксандр Музыкантаў (фартэпіяна), Аляксандра Ганькова (марымба).

У НЦСМ праходзіць персанальная выстава Елізаветы Янковай «Час пазначыць герояў». Аўтарку цікавіць у першую чаргу ўзаемадзеянне ўнутранага і знешняга. Якім чынам, напрыклад, жаданні, пачуцці і эмоцыі ўплываюць на ўчынкі чалавека, як прафесія або сфера дзейнасці адлюстроўваецца на бачным, адчувальным, даступным для іншага чалавека ўзроўні.

У галерэі «ДК» праходзіць выстава беларускай мастачкі Вікторыі Крупскай «Хронікі дыстанцыі».

Наша жыццё складаецца з падзей, якія для нас выбудоўваюць час і прастору. Часам дыстанцыі паміж падзеямі становяцца важнейшымі за самі выпадкі, якія адбіліся ў часе. Колер, каларыт і паўзы ствараюць жывапіс нашага жыцця з яго ўзлётамі і падзеннямі, сустрэчамі і расставаннямі, чаканнямі, цеплынёй дня і прахалодай ночы.

Нарэшце добрае надвор’е – самы час выбірацца на адпачынак за горадам. Вось тут мы якраз сабралі цікавыя мясціны – сядзібы ды гатэльныя комплексы ў розных кутках Беларусі, пра якія вы, магчыма, і не ведалі. Выбірайце, што больш падабаецца, і рэзервуйце загадзя.

У пятніцу гурт «Разбітае сэрца пацана» вяртаецца з канцэртам у Варшаву. Абяцаюць і старыя хіты, і новыя, зусім невядомыя, нікім не чутыя песні.

У суботу гурт «Петля Пристрастия» завяршае вясновы тур па Еўропе драйвовым канцэртам у Варшаве. Білетаў па 25 еўра ўжо няма, але яшчэ можна набыць па 30.

Майстар пластычнага тэатру, кіраўнік тэатра «ІнЖэст» Вячаслаў Іназемцаў ладзіць майстар-клас «Танцы звяроў. Нараджэнне руху з духу імправізацыі». Вы засвоіце фірмовы іназемцаўскі метад стварэння розных вобразаў і характараў, заснаваны на старажытнакітайскай сістэме пяці змен «у-сін».

У праграме майстар-класа: псіхафізічны трэнінг акцёра, танец Буто, элементы пантамімы, акрабатыкі, кун-фу. Майстэрня адкрыта для ўсіх артыстаў: танцораў, клоўнаў, мімаў, акцёраў, акрабатаў. А таксама для тых, хто цікавіцца сцэнічным рухам.

У нядзелю беларусаў Варшавы ад 4 да 99 гадоў запрашаюць на «рЭвалюцыю Зайца». Вас чакае выстава і спектаклік па народнай казцы «Ліс і заяц». А яшчэ майстар-клас, дзе кожны зможа стварыць свайго ўласнага героя з паперы.

Паказаў будзе чатыры, таму месцаў хопіць усім. Толькі не забудзьце зарэгістравацца.

У пятніцу Юрый Стыльскі і гурт «Дай Дарогу!» прыбывае ў Гданьск з вялікім электрычным канцэртам. Чакаюць усіх угарэлых і абяцаюць толькі хіты і драйв.

У пятніцу касмічная Shuma грае ў Вільнюсе канцэрт свайго вялікага тура «Купалінка».

«Мы хочам даць песні новае дыханне і зрабіць яе хітом сярод беларусаў і беларусак, рассеяных цяпер па ўсім свеце. KUPALINKA – гэта знак волі і адраджэння беларускай культуры, менавіта гэта песня гучала напачатку маршаў 2020 года, яе ведае кожны і кожная з нас. Таму мы і зрабілі сучасную аранжыроўку KUPALINKA, каб у нас з’явілася свая песня перамен!» – кажуць музыкі.

CreateCulture Space кліча глядзець фільм «Шакалад» і разбіраць яго з гештальт-тэрапеўткай. «Мы будзем на прыкладах разглядаць рознасць залежных, сузалежных, контрзалежных і ўзаемазалежных адносін, знаходзіць у героях сябе і шукаць выхады з цяжкіх сітуацый».

Shuma грае канцэрт на паветры з нагоды Дзён Старога горада ў Таліне. Кампанію складзе фольк-гурт JASAKAR.

Абяцаюць лямпавае свята з варкшопам, на якім нават можна будзе самому зрабіць невялікі сувенір з керамікі. Таксама будуць напоі і кактэйлі, гутаркі і цёплы летні вечар.