Куды пайсці ў выхадныя 19–21 мая ў Мінску, Варшаве, Вільнюсе і іншых гарадах, дзе жывуць беларусы

Цэлых чатыры дні на гэтым тыдні будзе праходзіць маркет KaliLaska – шмат цікавых рэчаў будуць чакаць вас з чацвярга па нядзелю. Кожны дзень абяцаюць дадаваць новыя рэчы (адзенне, абутак, кнігі, аксесуары і іншае) нон-стоп, а ў нядзелю будзе вялікі распродаж са скідкамі 50%.

Нагадаем, што ў гэтыя выхадныя ў Мінску пройдзе Ноч музеяў. Розныя музеі горада рыхтуюць цікавыя праграмы: будуць і лекцыі, і экскурсіі, і танцы, і спевы – і шмат чаго іншага.

Вось тут мы сабралі самыя цікавыя прапановы на вечар суботы – выбірайце, што больш падабаецца. І будзьце гатовыя стаяць у чарзе.

У суботу і нядзелю ў гандлёвым цэнтры Palazzo будзе праходзіць вялікі модны маркет. Абяцаюць адзенне і аксесуары ад дзясяткаў беларускіх майстроў і рамеснікаў.

Кожныя выхадныя на фуд-корт-пляцоўцы «Лучшая улица» праходзіць ярмарка падарункаў Sarafan market. Можна набыць посуд ад рамеснікаў, упрыгажэнні, вырабы са скуры, мыла, рознае смакоцце і шмат чаго іншага.

У прасторы «Вершы» адкрываецца pop-up store беларускіх мастакоў. Гэта выстава-кірмаш, на якой можна пабачыць графіку і фотаздымкі аўтарства сучасных беларускіх мастакоў, злавіць натхненне і што-небудзь набыць.

На мінулым тыдні ў Мінску пачаўся фестываль мастацтваў «Арт-Мінск», у якім прымаюць удзел больш за 450 сучасных твораў беларускіх мастакоў Беларусі. Прыходзьце паглядзець, што новага ў беларускім мастацтве і якія скандальчыкі нам падрыхтавалі сёлета.

У Нацыянальным цэнтры сучасных мастацтваў адкрыліся адразу чатыры персанальныя выставы маладых мастачак – Дарыны Даўгадзінай, Таццяны Савік, Марыны Трус і Лізаветы Янковай.

Дарына Даўгадзіна, напрыклад, у сваім праекце «Стыхія» праз партрэты паказвае ўзаемасувязь стыхій, іх характар і асаблівасці. Марына Трус у сваім праекце «Каб ніхто не застаўся без роднай кветкі, калі прыйдзе час…» звяртаецца да асабістага сямейнага архіва, спадчыны ў пошуках «праўды», неабходнай асновы ўсвядомленага існавання. Таццяна Савік у праекце «Void / Пустата» прапануе запаволіцца ў прасторы маўчання і паўзы, фрагментацыі і адчужэння. А «Час пазначыць герояў» Лізаветы Янковай – гэта выстава, у якой аўтарка гаворыць з гледачом на мове вобразаў.

«Беларускі моладзевы хаб» працягвае серыю бясплатных майстар-класаў у падтрымку «Дома творцаў». У суботу вас будзе чакаць акцёр, рэжысёр тэатра і кіно Андрэй Новік. Не забудзьце зарэгістравацца!

Арганізатары ініцыятывы poznanska24 клічуць на экскурсію па выставе Шагала ў Нацыянальным музеі ў Варшаве. Каб запісацца на лекцыю, напішыце ў дырэкт. Колькасць месцаў абмежавана, таму для броні месца спатрэбіцца зрабіць 100% аплату загадзя.

У Варшаве адкрылася персанальная выстава Андрэя Анро «Вечны агонь». З дапамогай жывапісу аўтар разважае пра ўплыў улады, дыктатуры і вайны на наша ўспрыманне і досвед.

Карціны заснаваны на дакументальных фотаздымках, скрыншотах відэа і шчымлівых гістарычных момантах, у тым ліку вайне ў Афганістане, югаслаўскіх войнах, генацыдзе ў Руандзе, вайне ў В’етнаме, Першай сусветнай вайне.

Што і як мы памятаем падчас і пасля вайны? Як мяняюцца нашы ўспаміны пра тое, што было да яе? Як агрэсар апраўдвае ваенныя дзеянні мінуўшчынай і кантролем гістарычнай памяці?

Будзеце ў пятніцу ў Беластоку – зазірніце ў кавярню Lalki. Там адбудзецца канцэрт любімага Змітра Вайцюшкевіча. Да лета засталося зусім трошкі, і трэба ўжо спяваць песні на вольным паветры.

Ва Вроцлаў з канцэртам «Край» едзе Кацярына Ваданосава. Не адна, а з мастачкай Аляксандрай Канафальскай, якая, між іншым, уваходзіць у дзясятку найлепшых у свеце мастакоў па пяску.

Таму будуць не толькі любімыя песні, але і дзівосныя малюнкі пяском, і шмат беларусаў.

«Шпакоўнік» – гэта цыкл музычна-паэтычных сустрэч, натхнёных творчай ініцыятывай актрысы вільнюскага Старога тэатра Анастасіі Шпакоўскай.

Вось расклад:

• 18 мая, 20:00 – Алена ЖалудОк (тая самая «Шчучыншчына»), Алена Зуй-Вайцяхоўская, дуэт «Тапачкіны» і маладая спявачка Atesta.
• 19 мая, 21:00 – сустрэча са спявачкай Kетэван і Аляксандрам Дзянісавым (Дзецюкі).
• 20 мая, 20:00 – гурт Nakapiano і Аляксандр Памідораў.

Вільнюскі інстытут «Палітычная сфера» запрашае на сустрэчу-семінар: канец 1980-х – пачатак 1990-х гадоў стаў часам радыкальных змяненняў для Беларусі. Адбываўся не толькі распад камуністычнага парадку і савецкага федэратыўнага ўкладу, але і істотныя трансфармацыі ў эканамічнай, сацыяльнай і культурнай сферах. Прыходзьце паслухаць і абмеркаваць.

У пятніцу ў CreateCulture Space пройдзе ўжо трэцяя Ноч правалаў. Гэта такая імпрэза, дзе ў спагадлівай атмасферы можна падзяліцца сваімі прафесійнымі праваламі, памылкамі, няўдачамі, разам пасмяяцца з іх, падзяліцца досведам пра тое, як у вас атрымалася выйсці з гэтых сітуацый і знайсці сілы рухацца далей. Гэтым разам тэма – стасункі.

Калі хочаце прыйсці паслухаць, то рэгіструйцеся па спасылцы да канца чацвярга, 18 мая. А потым бярыце з сабой добры настрой і напоі, якія будзеце піць.