Куды пайсці ў выхадныя 17–19 лістапада ў Мінску, Варшаве, Вільнюсе і Гамбургу

На творчым вечары-рандэву Таццяна Грыневіч правядзе імерсіўны майстар-клас «Сінхранізацыя» ў фармаце «адно палатно – адна творчая плынь – шмат суаўтараў». Удзельнікі майстар-класа будуць героямі своеасаблівай «творчай лабараторыі», дзе ўнутраны свет і бачанне кожнага стане часткай аднаго твора, прыгожага і натхняльнага. Таццяна будзе толькі мадэраваць і накіроўваць творчы працэс.

Для запісу на сустрэчу пішыце ў дырэкт.

«12 чалавек у адным пакоі – хіба гэта кіно?» – пыталіся тыя, хто чытаў сцэнарый «12 разгневаных мужчын». А Сідні Люмету ўдалося стварыць шэдэўр!

У пятніцу ў кінаклубе «Cinemascope. Анталогія» ў Музеі-майстэрні З. І. Азгура будуць паказваць «12 разгневаных мужчын» – маніфест неабыякавасці, які тлумачыць, як энтузіязм і крытычнае мысленне запускаюць рэфлексію ў самых інэртных і абыякавых.

«Прыгажосць і жаноцкасць бязмежныя нават з абмежаванымі магчымасцямі». У сценах прасторы Flame пройдзе дабрачынная фотавыстава «Грацыя душы» аўтарства Анастасіі Жых. Уваход бясплатны. Кожны госць можа ахвяраваць любую суму фонду інвалідаў-вазочнікаў.

З 11 па 19 лістапада ў Мінску працуе дабрачынны маркет KaliLaska. Знойдзеце там добры выбар верхняга адзення ад пухавікоў да футраў, галаўных убораў і шалікаў, швэдраў і штаноў па сезоне. А таксама абутак, вініл, посуд, упрыгажэнні, паштоўкі і іншае. Кожны дзень дадаюць нешта новае, таму завітвайце!

У Палацы мастацтва працуе выстава Андрэя Пічушкіна Rave, якая адлюстроўвае ўспрыманне постсавецкай рэчаіснасці ад пачатку дзёрзкіх 1990-х і трансфармацыю гэтай эпохі ў сённяшнім дні.

З 17 па 26 лістапада батанічны сад запрашае на выставу індыйскай хрызантэмы «Кветка сонца», дзе будзе прадстаўлена больш за 80 сартоў гэтай кветкі.

Кветкі індыйскай хрызантэмы маюць мноства розных форм: ад простых рамонкаў (Aglow, Biarrita, Solo) да шматпялёсткавых пампонаў (Gazelle, Tom Pearse), вялікіх і маленькіх, розных афарбовак і адценняў – ад жоўтага і белага, ружовага, чырвонага і аранжавага да фіялетавага і нават зялёнага.

Больш за тое, на выставе можна будзе ўбачыць работы таленавітых супрацоўнікаў батанічнага сада, якія спрабуюць сябе ў жывапісе і ікебане.

Ашмянска-мінскі вандроўны гурт Leibonik вязе ў Варшаву новы альбом «ТАМ». У праграме – жвавыя мелодыі, шчыльныя тэксты і мора непасрэднай харызмы, каб трохі пасумаваць, але пайсці пасля дамоў з безумоўна добрым настроем.

15 лістапада ў Музеі вольнай Беларусі адкрываецца персанальная выстава DOM беларускага фатографа Аляксандра Кот-Зайцава.

Гэты праект пачынаўся як суб’ектыўны фотадакумент, спроба зразумець, як «чужая» прастора ўплывае на асобу з досведам эміграцыі. У 2022 годзе да праекта далучыўся беларускі кампазітар і музыкант Аляксандр Ясінскі, які стварыў адмысловую гукавую дарожку, адлюстраваўшы тэму праекта ў музыцы. Гук і вобразы ўзаемадзейнічаюць, пераносячы гледача і слухача ў прастору метафарычнага дому.

У беларускай кавярні Kult Kawy праходзіць персанальная выстава беларускай мастачкі Таццяны Савіч – можна зайсці па смачную каву і яшчэ і карціны паглядзець (а можа, і набыць).

З дапамогай мастацкай тушы і крышталёў солі кожны зможа паглыбіцца ў свае думкі і знайсці стан унутранага святла ў цемры.

У арт-практыцы не трэба баяцца сустрэчы са сваёй цемрай – праз яе будзе праяўляцца святло белага аркуша. Вы ўбачыце, як нават у самай непрабіўнай цемры з’яўляюцца светлыя промні. Яны могуць паўстаць у выглядзе цiкавых узораў, вашай сілы і фантазіі. Вазьміце з сабой крыху прыняцця, жменю смеласці і кахання – і напоўніце пятнічны вечар сваёй творчасцю.

Мерапрыемства для ўсіх жадаючых зразумець сябе лепш, знайсцi сваю сiлу ў неспрыяльных умовах.

Беларускія творцы ў Вільнюсе запрашаюць на новы «Шпакоўнік» – цыкл музычна-паэтычных сустрэч, натхнёных творчай ініцыятывай актрысы Анастасіі Шпакоўскай. Гэтым разам удзел бяруць Алесь Плотка і Сяргей Пукст.

Алесь Плотка – літаратар і музыка з Гомеля, франтмэн гурта Sož і праекта Baisan&Yasinski. Сяргей Пукст – энцыклапедычны эксцэнтрык, патомны кампазітар, энергічны і рознабаковы наватар, парадаксальны канцэптуалізатар, постэстэт і «некрасюррэаліст».

Беларускі акцёр Рыгор Жураўлёў запрашае на свой монаспектакль «Гаспадар кавярні» па п’есе беларускага драматурга Паўла Пражко.

Поўны раптоўных адступленняў і нечаканых высноў, гэты дасціпны, блытаны і жывы тэкст падобны хутчэй на даверную балбатню пра жыццё, чым на тэатральную п’есу. Здаецца, далёкі ад тэатра і глядач «Гаспадара кавярні»: седзячы ў прасторы кавярні, ён усміхаецца жартам і сочыць за парадаксальнымі выгінамі аўтарскай думкі. Але да канца змушаны азірнуцца на гэты досвед запытальна: а што такое сёння тэатр? якой можа быць п’еса? яе герой? І дзе ў гэтым ва ўсім я?

З панядзелка, 13 лістапада, стартаваў кінафестываль «Паўночнае ззянне» – і сёлета міжнародную і беларускую праграмы можна паглядзець бясплатна анлайн. (А тут можна заданаціць на падтрымку фэсту.)

У беларускім конкурсе прымаюць удзел «Радзіма» Аляксандра Міхалковіча і Ганны Бадзяка, «У жывым эфіры» Мары Тамковіч, «Ператрымка» Андрэя Кашперскага, «Ястраб памерам з каня» Сашы Кулак, «Чатыры колы далей ад цэнтра» Лены Ле, «Дзённік Анастасіі» Максіма Буйніцкага, «Мяцеліца» Лізаветы Багатка і інш.

Праграму і расклад кінафэсту глядзіце на сайце.