Куды пайсці ў выхадныя 17–19 лютага ў Мінску, Варшаве, Вільнюсе і іншых гарадах, дзе жывуць беларусы

Куды пайсці ў выхадныя 17–19 лютага ў Мінску, Варшаве, Вільнюсе і іншых гарадах, дзе жывуць беларусы
Вось 18 цікавых мерапрыемстваў надыходзячых выхадных, на якія варта звярнуць увагу. Выбірайце, што больш падабаецца, і плануйце якасны адпачынак!

Вось 18 цікавых мерапрыемстваў надыходзячых выхадных, на якія варта звярнуць увагу. Выбірайце, што больш падабаецца, і плануйце якасны адпачынак!

МІНСК

Пятніца: даведайцеся, што піла і ела шляхта

17 лютага, 18:30.

Вул. Крапоткіна, 97 (уваход з вул. Гая, 2-і пад’езд).

Кошт: 90 руб.

Алена Мікульчык, аўтарка кнігі «Шляхецкая кухня», запрашае на лекцыю «Што піла і ела шляхта» з дэгустацыяй старажытных напояў і закусак па рэцэптах 18-19-га стагоддзя.

У меню – розныя напоі, закускі, стэйк па-радзівілаўску са свіной выразкі з ягадна-вінным соусам, бігас з грыбамі і журавінамі на гарнір і шляхецкія цукеркі з п’янай вішняй на дэсерт. Па запіс звяртайцеся да спадарыні Алены ў дырэкт. Не забывайце пароль «шляхта».

Субота: навучыцеся рабіць традыцыйную вышыўку

18 лютага, 11:00.

Кнігарня-кавярня «Маркс» (вул. К. Маркса, 11).

Кошт: 30 руб.

Праект «Этыка» паўтарае ўтульны ранішні майстар-клас па традыцыйнай вышыўцы. Вышываць будуць роднае і блізкае сэрцу. Кожная схема, якую можна будзе выбраць самастойна, – гэта арыгінальны ўзор з беларускага нацыянальнага касцюма.

На ўдзел можна запісацца ў дырэкт праекта. Усе матэрыялы прадстаўляюцца. Колькасць месцаў абмежавана.

Субота: паглядзіце монаспектакль Івана Кірчука

18 лютага, 17:00.

НЦСМ (вул. Някрасава, 3).

Білеты: 25 руб. (тут).

У Нацыянальным цэнтры сучасных мастацтваў адбудзецца монаспектакль «Дарожка мая…» музыкі і фалькларыста Івана Кірчука. Праграма створана па матэрыялах шматлікіх фальклорна-этнаграфічных экспедыцый у розныя раёны Беларусі.

Падчас монаспекталя вы пачуеце больш за 40 народных песен, а таксама фрагменты старадаўніх замоў, якія прагучаць на інтуітыўным разуменні таго, як гэта маглі рабіць нашы продкі. А яшчэ будуць найгрышы на беларускіх народных інструментах.

Субота-нядзеля: абнавіце гардэроб на «Open Шкаф»

18-19 лютага.

М11 (пр-т Машэрава, 11).

Уваход: вольны.

Усе мінскія моднікі збяруцца ў гэтыя выхадныя на барахолцы «Open Шкаф», якая будзе праходзіць у прасторы М11 з 12:00 да 21:00.

Арганізатары заклікаюць купляць эксклюзіўныя рэчы, дзяліцца эмоцыямі, атрымліваць асалоду ад камунікацыі, слухаць музыку і глядзець паказы.

Усе выхадныя: прагуляйцеся па выставе Леаніда Шчамялёва

Да 16 сакавіка.

Галерэя «ДК» (Герцэна, 2а).

У чацвер, 16 лютага, у галерэі «ДК» адкрываецца выстава «Вялікае жыццё вялікага мастака», прымеркаваная да 100-годдзя знакамітага прадстаўніка беларускай жывапіснай школы, народнага мастака Беларусі Леаніда Шчамялёва.

Леанід Дзмітрыевіч захапляўся выявамі роднай зямлі і яе жыхароў, апяваў іх, кожны сюжэт прапускаў праз сваё сэрца. Яго карціны вылучаюцца свабодай: лёгкасцю выканання, экспрэсіўнасцю і дынамічнасцю.

Усе выхадныя: завітайце на выставу «Джаз! Каты! Вясна!»

Да 26 сакавіка.

НЦСМ (Някрасава, 3).

Білеты: 7 руб. – поўны, 3 руб. – льготны.

У Нацыянальным цэнтры сучасных мастацтваў адкрылася традыцыйная вясновая выстава «Джаз! Каты! Вясна!», якая заўсёды азначае, што вясна ўжо тут, блізенька. На экспазіцыі – жывапіс, графіка, фотаздымкі, скульптура, тэкстыль і інш.

У выставе бяруць удзел прафесійныя мастакі і аматары, дзеці і дарослыя. Большасць твораў у экспазіцыі сабраныя праз open-call, а самаму маленькаму ўдзельніку – 2 гады.

Усе выхадныя: паглядзіце выставу раслін за шклом

Да 26 лютага.

Батанічны сад.

Уваход: 10 руб.

Цэнтральны батанічны сад НАН Беларусі запрашае на выставу-экспазіцыю «Расліны за шклом». Шпацыруючы сярод вялікіх трапічных і субтрапічных раслін экспазіцыйнай аранжарэі, вы пазнаёміцеся з дзіўным светам раслін у разнастайных шкляных сасудах, сабраных разам у маленькія супольнасці. Вы ўбачыце пустынны рэльеф з сукулентамі, трапічны куток з валасянкамі і непентэсам; зможаце разгледзець паблізу лудызію, максілярыю, крыптантусы, венерыну валасянку і сарацэніі.

Падрабязней можна даведацца па тэлефонах: +375 29 320 17 17; +375 17 379 69 15.

ГРОДНА

Пятніца: купіце білет на эксперыментальны тэатр

17 лютага, 19:00.

Канцэртная зала (вул. Дзяржынскага, 1).

Білеты: 8 руб.

У пятніцу можна будзе паглядзець спектакль «Геній і распуста» – пра генія і ягоны цяжкі лёс, пра акцёрства і каханне, пра надзеі і расчараванні.

Гэта будзе новы спектакль народнага тэатра-студыі «Бачонак», створанага гарадзенскімі акцёрамі-аматарамі ў 2009 годзе і названага так па прозвішчы кіраўніка і рэжысёра Сяргея Бачкова. У рэпертуары тэатра ўжо больш за 10 спектакляў. Білеты можна набыць у касах канцэртнай залы.

ГОМЕЛЬ

Пятніца-субота: прагуляйцеся па інклюзіўнай выставе «Рукі бачаць»

17 лютага (18:00–20:00), 18 лютага (16:00–19:00).

Вул. Юбілейная, 48/1.

Уваход: 15 руб.

У пятніцу і суботу гомельскі цэнтр інклюзіўнай культуры прэзентуе праект «Рукі бачаць» – інтэрактыўную выставу, на якой наведвальнік зможа пабыць на месцы невідушчага чалавека і адчуць свет і прастору так, як яе адчуваюць людзі з абмежаваннямі зроку.

Для паўнаты адчуванняў і разумення вам прапануюць прайсці квэст «Крот» і, закрыўшы вочы спецыяльнай маскай, задзейнічаць іншыя пачуцці ды такім чынам пашырыць веды пра свае магчымасці і пра магчымасці людзей з парушэннем зроку.

ВАРШАВА

Пятніца: паслухайце акустычны выступ Іллі Чарапко-Самахвалава

17 лютага, 18:30.

«Беларускі моладзевы хаб» (plac Konstytucii, 6).

Білеты: 50 злотых (бронь).

У «Беларускім моладзевым хабе» адбудзецца акустычны канцэрт Іллі Чарапко-Самахвалава, лідара гуртоў «Петля Пристрастия», «Кассиопея» і Polyn. Абяцаюць самыя розныя песні ў акустыцы і камерную атмасферу – каб і паплакаць, і патанчыць, і пасмяяцца.

Пятніца: паслухайце канцэрт пра каханне

17 лютага, 18:00.

Музей вольнай Беларусі (Foksal, 11).

Уваход: данаты.

Канцэрт «Закаханыя ў… Любоў у часы апакаліпсы» пройдзе ў тэатралізаваным фармаце. Спявачкі і актрысыі беларускіх (у мінулым) і польскіх тэатраў Ана Мацкевіч і Маша Пятровіч падрыхтавалі для вас вечар, падчас якога будуць спяваць джазавую класіку і прадэманструюць творы паэзіі беларускіх і польскіх аўтараў.

Сярод песень будуць такія бессмяротныя кампазіцыі, як Summertime Элы Фіцджэральд і L.O.V.E. Фрэнка Сінатры, а пад некаторыя кампазіцыі вы зможаце нават танцаваць. Рэгістрацыя на канцэрт – праз дырэкт @heartbreaking_performance.

ПОЗНАНЬ

Усе выхадныя: прагуляйцеся па выставе Сяргея Шабохіна

Да 5 сакавіка.

Галерэя «Арсенал» (Szyperska, 2).

У Познані праходзіць выстава аднога з найважнейшых мастакоў беларускага contemporary art Сяргея Шабохіна «Атлас тэктанічных ландшафтаў».

На экспазіцыі можна пабачыць розныя серыі твораў: «Сацыяльны мармур» (звяртаецца да цэнзурнай практыкі беларускіх уладаў і феномена «сацыяльнай дзяржавы»); «Мы жорсткія спажыўцы культурных рэвалюцый» (у фокусе – спадчына УНОВИСа ў Віцебску); «Бясконцыя вуліцы» (серыя прысвечана радзіме мастака, Наваполацку, як гораду-ўтопіі); «Тэктанічныя пліты» (серыя асэнсоўвае вялікія геапалітычныя «зрухі» – ваенныя канфлікты, пандэмію, рэвалюцыю).

ВРОЦЛАЎ

Субота: паслухайце беларускамоўны стэндап

18 лютага, 18:00.

WędrówkiPub – Wrocławski Klub Podróżniczy (Podwale, 37/38).

Білеты: 60 злотых (тут).

У суботу ў Вроцлаве пройдзе новы беларускамоўны стэндап ад суполкі «Пан Стэндап». Жартаваць на роднай мове гэтым разам будуць Ягор Анісімаў, Міхась Ільін і Максім Канавал.

ЛОДЗЬ

Пятніца: схадзіце на жаночую сустрэчу падтрымкі

17 лютага, 18:00.

Sowinskiego, 49B.

Уваход: вольны.

У Лодзі стартуюць жаночыя сустрэчы падтрымкі, дзе будуць будаваць бяспечную і безацэначную прастору ўзаемападтрымкі. Там можна будзе знайсці сябровак, атрымаць падтрымку, абмеркаваць тое, што хвалюе.

На першай сустрэчы будуць знаёміцца, піць гарбату, распавядаць свае гісторыі эміграцыі (калі, вядома, вы адчуеце патрэбу ў гэтым і дастатковую бяспеку для выказвання) ды абмяркуюць тэмы, якія больш за ўсё турбуюць.

ВІЛЬНЮС

Субота: прыміце ўдзел у шведскім гуртку Sex Education

18 лютага, 18:00.

Прастора АБФ «МиссиЯ» (Teatro g., 3).

Удзел: вольны (рэгістрацыя).

Вас запрашаюць на шведскі гурток, дзе ўдзельнікі будуць абмяркоўваць пазначаныя тэмы, дзяліцца асабістым досведам і такім чынам навучацца адзін ад аднаго. Трапіць на занятак можна бясплатна, але арганізатары просяць зарэгістравацца, каб ведаць колькасць ахвотных прыйсці.

Нядзеля: паглядзіце дакументальны спектакль з маналогамі сям’і, пацярпелай ад рэпрэсій

19 лютага, 18:00.

ЕДУ, цокальны паверх (Savičiaus g., 17).

Кошт: рэкамендаваны данат ад 10 еўра (рэгістрацыя).

У нядзелю, 19 лютага, у Вільнюсе іграюць «Маналогі жніўня» – дакументальны спектакль, які расказвае гісторыю сям’і, пацярпелай ад рэпрэсій, якія разгарнуліся пасля пратэстаў 2020-га.

Уваход – рэкамендаваны данат па магчымасці. Колькасць месцаў абмежавана, таму рэгіструйцеся па спасылцы.

ПАРЫЖ

Пятніца-субота: паглядзіце спектакль «1,8 м» пра беларускія пратэсты

17-18 студзеня, 18:00, 19:30, 20:30.

Au Théâtre Nanterre-Amandiers (7, Av. Pablo Picasso).

Білеты: да 30 еўра (тут).

З 14 па 18 лютага ў Парыжы будуць паказваць спектакль «1,8 м» драматурга і рэжысёра Івана Вырыпаева, прысвечаны беларускім палітвязням.

Спектакль заснаваны на тэкстах, якія палітвязні агучвалі ў судах і пісалі ў лістах родным. Іграюць беларускія ды польскія акцёры на польскай, беларускай, рускай мовах. Сцэнаграфія – беларускага мастака Сяргея Шабохіна.

ЦЮРЫХ

Пятніца: пабывайце на канцэрце гурта NaviBand

17 лютага, 20:00.

Our Club (Wehntalerstrasse, 123).

Білеты: ад 15 франкаў (тут).

NaviBand граюць канцэрт у Швейцарыі. Вязуць новыя песні, беларускія матывы і трошкі пранізлівай блізкасці для вашых стомленых душ.

Прадугледжаны розныя скідкі на білеты.

 

#Беларусь #Варшава #Вильнюс #Минск #Польша
поделиться