Куды пайсці ў выхадныя 16–18 лютага ў Мінску, Варшаве і Вільнюсе

Кінаклуб «Анталогія» запрашае паглядзець кіно 1966 года Cul-de-sac (на мове арыгінала з рускімі субцітрамі).

Спрабуючы схавацца ад паліцэйскай пагоні, два бандыты, Рычард і Элберт, знаходзяць прытулак у адасобленым замку на марскім беразе, дзе жывуць жанападобны рамантык Джордж і яго маладая жонка Тэрэза. Уначы Элберт памірае ад атрыманага падчас пераследу ранення. Пасля пахавання таварыша паміж Рычардам і гаспадарамі замка завязваюцца дзіўныя ўзаемаадносіны.

Closed Door – гэта рух з жывога гуку, серыя аўдыявізуальных перформансаў. Кожная падзея ўнікальная і непаўторная, са стварэннем прапрацаванай і глыбокай канцэпцыі.

Вас чакаюць DJ-сэты ад Dita Redrum, Maklai, Ronin, Gilas x Aznok x Niko Mate, LW4. А яшчэ live performances: струнны квартэт, скрыпка; Romantica і 2DA.

У суботу пачне працаваць 9-дзённы дабрачынны KaliLaska-маркет. Будуць прадаваць не толькі зімняе адзенне, але і рэчы на вясну: паліто, аксесуары і абутак, рэчы для мужчын і жанчын на сезон сакавік-красавік, а таксама кнігі, пласцінкі, паштоўкі, посуд, інтэр’ерныя рэчы, тэкстыль і шмат іншага.

Абнаўляць асартымент будуць кожны дзень, а ў апошнія выхадныя – 23-25 лютага – правядуць вялікі распродаж: рэчы, якія застануцца, можна будзе набыць з 50-працэнтнай скідкай.

У краме «Гарбатная пошта» ладзяць варшкоп па лінарыце. За кароткі час вы засвоіце лінагравюрную тэхніку і навучыцеся самастойна рабіць адбіткі. Абяцаюць мінімум тэорыі і максімум практыкі.

З 14 па 25 лютага на фудмоле праходзіць фестываль ежы «Конкорс ясі. Зіма ў сэрцы». Вас чакаюць смачная і гарачая ежа, утульная атмасфера, штодзённыя бясплатныя мерапрыемствы і 26 корнераў удзельнікаў. Далучайцеся!

Вас чакае інтэрактыўная праграма з гідам (1,5 гадзіны) і знаёмства з экспазіцыяй – больш за 100 музычных інструментаў: ад рэдкіх і дарагіх (арфа, туба, басэтля, сітар…) да зусім незвычайных (глюкафон, тыбецкія чашы, якія спяваюць, званочкі Кошы…). А яшчэ 1000 унікальных арт-экспанатаў – майстэрскіх мініяцюр, статуэтак, шкатулак і карцін на музычную тэматыку.

У ГЦ «Тытан» да 18 лютага праходзіць гастратыдзень, прымеркаваны да Дня ўсіх закаханых. У рамках мерапрыемства наведвальнікі змогуць паспрабаваць спецыяльныя сэты ад аператараў фуд-корта па адзінай цане – 25 руб. Кожны сэт разлічаны на двух чалавек.

Выдатная магчымасць паспрабаваць разнастайныя стравы ад розных пунктаў фуд-корта і пабавіць час з тымі, з кім прыемна.

Да 18 лютага ў філіяле Нацыянальнага мастацкага музея – «Музеі беларускага народнага мастацтва» – працуе выстава работ майстрыхі па бісеры Веры Занкевіч «Па матывах ткацтва». На экспазіцыі прадстаўлены ўпрыгажэнні з бісеру некалькіх калекцый, распрацаваных за перыяд творчай працы аўтаркі – з 2003 па 2023 год.

У пятніцу ў Варшаве з акустычным канцэртам выступіць вядомы беларускі бард Аляксандр Баль. Будзе ўтульна – завітвайце.

HeartBreaking Performance запрашае на чарговую «Моцную сустрэчу» з коўчам «Як паступаць па-чалавечы (этычныя дылемы і як іх вырашаць)». Фасілітаваць сустрэчу будзе коўч Павел Сівалаў.

На сустрэчы будуць разгледжаны прыклады этычных дылем: у які момант дылема становіцца этычнай; як звяртаць увагу на неабходныя для прыняцця правільнага рашэння рэчы і меркаванні. Разгляд этычных дылем дапамагае сфармуляваць сваю пазіцыю і аргументы, якія яе абгрунтоўваюць.

Праект So People запрашае разам схадзіць на экскурсію ў нацыянальны музей Варшавы «Мадонна. Лілея чысціні» Дзмітрыя Салодкага. Будуць глядзець на мастацтва і размаўляць пра Дзеву Марыю.

Каб далучыцца, пішыце ў дырэкт.

На гэтай лекцыі разам са спікеркай Дар’яй вы даведаецеся, як псіхааналіз і гештальт-псіхалогія звязаны з мастацтвам, як медыцынскі прагрэс і ідэі Фрэйда паўплывалі на ўспрыманне мастакамі сябе і свету, а таксама пра іх дзённікі сексуальных адносін і перажыванняў, сімптомы нарцысізму і неўратычных паводзін, эмоцыі і страхі.

У чытацкім клубе бібліятэкі «Чытальня» адбудзецца сустрэча з адметнай беларускай паэткай Настай Кудасавай, якая завітае на чарговы міжнародны паэтычны фестываль «Вершы на асфальце» – Стральцоўскі фэст.

Зборнікі вершаў Насты Кудасавай «Я працягваю» і «Побач», аздобленыя ілюстрацыямі мастачкі Святланы Дземідовіч, неўзабаве з’явяцца ў «Чытальні».

Усе выхадныя ў Вільнюсе будзе праходзіць XII Міжнародны паэтычны фестываль памяці Міхася Стральцова «Вершы на асфальце», у якім традыцыйна бяруць удзел паэты з Беларусі і замежных краін.

Будуць і паэтычныя чытанні, і прэзентацыі кніг, і, вядома ж, абвяшчэнне лаўрэатаў Літаратурнай прэміі Міхася Стральцова. Праграму глядзіце тут.