Куды пайсці ў выхадныя 13–15 кастрычніка ў Мінску, Варшаве і Вільнюсе

У гэтыя выхадныя ў Новай Баравой пройдзе адкрыццё Цэнтральнай плошчы. Мерапрыемства запланавана ў фармаце гарадской ярмаркі з фуд-тракамі, маркетам рамеснікаў, гасцявой зонай з утульнай мэбляй, вулічным кінатэатрам, музычным квізам, танцамі, дзіцячай зонай і іншымі актыўнасцямі.

Арганізатары кажуць, што ўпершыню ў Мінску мерапрыемства такога маштабу адбудзецца не ў цэнтры горада, а ў спальным раёне. Варта наведаць!

Усяго тыдзень – з 5 да 13 кастрычніка – у Мастацкім музеі працуе выстава «Космас Язэпа Драздовіча», прысвечаная 135-годдзю мастака.

На экспазіцыі можна пабачыць творы з калекцыі аддзела старажытнабеларускай культуры Цэнтра даследаванняў беларускай культуры, мовы і літаратуры НАН Беларусі. Таксама ёсць карціны са знакамітых «касмічных серый» і творы, дзе мастак праявіў свой талент партрэтыста. Частка прац прадстаўлена гледачам упершыню.

«Чыжоўка-Арэна» запрашае адзначыць Дзень маці ў цёплай святочнай атмасферы на тэматычнай «Каляровай дыскатэцы». Гасцей будуць радаваць папулярныя хіты ад DJ DoubleTasty, вясёлыя конкурсы і розыгрыш прызоў, вядучы, святламузыка і лазерныя спецэфекты, а таксама шмат рознакаляровых шароў і бар з напоямі і выпечкай.

Гусляр Алесь Чумакоў будзе граць у музеі Якуба Коласа канцэрт да Дня маці «Мама, белая галубушка...». Вас чакае рок-класіка па-беларуску пад сапраўдныя гуслі.

На канцэрце прагучаць песні Булата Акуджавы ў перакладзе на беларускую мову, а таксама песня-віншаванне матулям у гонар свята. А яшчэ падчас сустрэчы музыка раскажа пра гісторыю гусляў ды адкажа на вашы пытаннечкі.

Школа танцаў Kredo запрашае на майстар-клас па бачаце – тых, хто зусім не танцаваў або мае невялікі досвед. Падчас занятку вы асвоіце базавыя крокі і павароты, даведаецеся пра вядзенне і ўзаемадзеянне ў пары, пазнаёміцеся з цікавымі хлопцамі і дзяўчатамі і добра пабавіце час.

Запісацца на майстар-клас можна праз дырэкт або па тэл.: +375 29 665 73 36.

Батанічны сад запрашае на «Цытрусавы бум». Можна будзе наведаць унікальную аранжарэю, даведацца пра карысныя якасці трапічнай садавіны і паслухаць пра звычаі, звязаныя з пладамі ў розных краінах.

А яшчэ можна будзе прыняць удзел у творчым практыкуме і навучыцца роспісу драўляных нарыхтовак акрылавымі фарбамі – а потым забраць свой выраб дамоў. Ну і, канешне, пакаштаваць лімоны з мясцовага ліманарыя.

У суботу і нядзелю ў антыкварнай галерэі «Камок» будзе праходзіць вінтажны маркет. Вас будуць чакаць велізарны ангар з антыкварнай мэбляй у цэнтры Мінска, адзенне і аксесуары, посуд, святло і вініл. Завітвайце!

У гэту нядзелю Flame Place запрашае на надзвычай займальны творчы вечар – выставу-кватэрнік. Вас чакае выступленне трох музычных гуртоў, магчымасць пазнаёміцца з працамі сучасных беларускіх фатографаў і мастакоў, даведацца пра іх станаўленне, творчы шлях і ўнутраны свет, а таксама сюрпрыз – дакладней, сапраўднае шоу ад перформінг-гурта.

Падчас музычна-літаратурнай лекцыі вы пачуеце невялікія фрагменты паэм «Забытая скрыпка», «У Купальскую ноч», «На Куццю», «На папасе». Гэтыя творы з прычыны цэнзуры ў часы савецкай акупацыі не друкаваліся ці замоўчваліся і па сённяшні дзень малавядомыя, паколькі рэжым у Беларусі працягвае тую ж палітыку ў галіне культуры.

А яшчэ пачуеце гісторыю стварэння рок-оперы Лучанка-Мулявіна «Гусляр», музычныя фрагменты асноўных тэм оперы і каментарыі да іх.

Суполка So Рeople запрашае глядзець фільм польскага рэжысёра Ежы Кавалеравіча «Маці Іаана ад анёлаў». Кіно пра няволю і забароны, якія гнятуць чалавека. Масавае грэхападзенне. Канфлікт кахання і веры. Рэлігійны «фільм жахаў» (але зусім не страшны), які атрымаў залатую пальмавую галіну на Канскім кінафестывалі.

А культурны аглядальнік раскажа, ці заснаваны фільм на рэальных падзеях ці гэта выдумка аўтара, чаму чорна-белыя фільмы да гэтага часу прыцягваюць увагу гледача, пра рэлігійны бок фільма (ці яго адсутнасць) і іншае.

На лекцыі Марыя, стваральніца клубa Craft Hand Lab, раскажа, што такое ChatGPT і як ён працуе, як выкарыстоўваць GPT для стварэння тэкстаў, апісанняў і ідэй для вашых вырабаў, а таксама дасць практычныя саветы і прыклады выкарыстоўвання GPT у творчай дзейнасці.

Карысна будзе паслухаць тым, хто хоча павялічыць эфектыўнасць і эканоміць час на стварэнні кантэнту, шукае ідэі і натхненне для новых праектаў.

З чым асацыюецца ў вас чорны колер? Уэнздэй Адамс, маленькая чорная сукенка Шанэль, жалоба, смерць, бясконцы сусвет, чорная котка, што перайшла дарогу, анархія ці вулканічныя пляжы Ісландыі? Цемра нас палохае ці, наадварот, вабіць? І галоўнае – чаму? У які момант мы вырашылі, што ад цёмных карцін зыходзіць «дрэнная энергетыка» і што пара спаліць усіх, у каго валасы на пару тонаў цямней? Калі чорны перастаў лічыцца колерам? А калі перажываў свой трыумф? Як гэта ўсё зафіксавалася ў мове? Што важней – колер ці тэкстура?

Нішто не ўзнікае ў нашай свядомасці з ніадкуль, кожная думка і асацыяцыя была клапатліва змешчана туды навакольным светам ва ўсёй яго разнастайнасці. Як рэлігія, соцыум, інстынкты і навука сфарміравалі наша ўяўленне пра чорны колер і як яно мянялася на працягу ўсёй гісторыі чалавецтва, раскажа Юлія Стратовіч.

Ужо ў гэту нядзелю ў Польшчы адбудуцца парламенцкія выбары, а «Беларускі дом» запрашае на свой нефармальны выбарчы вечар.

Спікеры будуць разглядаць і аналізаваць, як адбываюцца дэмакратычныя выбары, абвесцяць вынікі першых экзіт-полаў. А яшчэ вы зможаце далучыцца да дыскусіі наконт таго, што будзе азначаць той ці іншы выбар палякаў для знешняй палітыкі Польшчы адносна Беларусі.

На вечар пятніцы нічога не плануйце, бо час ісці на аўтарскі вечар барда Змітра Бартосіка «Смяяцца, плакаць і спяваць».

Спадар Зміцер абяцае вясёлы шансон 90-х гадоў, а таксама віленскія балады, чытанне непрыдуманых анекдотаў з жыцця і песні Аляксандра Вярцінскага, Булата Акуджавы і Уладзіміра Высоцкага ў перакладах Рыгора Барадуліна.

Зазірніце ў гісторыю з дапамогай кароткаметражнага ізраільскага кіно, прысвечанага араба-ізраільскаму канфлікту. Гэтыя фільмы раскажуць пра жыццё ва ўмовах канфлікту і войнаў, пра лёсы людзей, якія трапілі ў гэтыя цяжкія часы. Арыгінальныя дыялогі з англійскімі субцітрамі паглыбяць вас у атмасферу Ізраіля і пакажуць розныя грані гэтага складанага перыяду.

Перад паказам фільмаў Таня (арганізатарка прасторы) правядзе кароткую лекцыю па гісторыі Ізраіля ў кантэксце ваенных падзей. А пасля прагляду ўсе будуць запрошаны да абмеркавання і разважанняў.

Тэма: прыгажосць Амерыкі ў працах Эндру Уайета. На гуртку вы зможаце пазнаёміцца з працамі мастачак і абмеркаваць іх, расслабіцца і папрацаваць з целам і думкамі з дапамогай практык Easy mind, а таксама пазнаёміцца адзін з адным.

Таксама на сустрэчы вы даведаецеся пра методыку шведскіх гурткоў, як вучыцца самім і навучаць іншых, дзелячыся сваімі ведамі і вопытам.