Куды пайсці ў выхадныя 12–14 студзеня ў Мінску, Варшаве і Вільнюсе

У музеі Якуба Коласа адбудзецца творчы вечар Леаніда Паўлёнка – кампазітара, лідара гурта «Нагуаль».

У праграме: песні з рэпертуару «Нагуаль», незвычайны майстар-клас па гульні на ўнікальных інструментах і зімовая паэзія.

Праект Cinemascope праводзіць спецыяльную праграму зімовых фільмаў у прасторы «Манахром». У суботу прапануюць паглядзець кіно «Фані і Аляксандр» 1982 года.

Гісторыя сям’і Экдаль, убачаная вачыма двух дзяцей – сястры і брата Фані і Аляксандра. Пакуль сям’я адзіная і неразлучная, дзеці шчаслівыя і без страху могуць аддавацца цудоўным марам. Пасля страты блізкіх людзей у іх расце пачуццё горычы і непрыязнасці да свету. Але там, дзе Фані спрабуе захаваць чыстую душу, Аляксандр замыкаецца ў цёмным і жорсткім унутраным свеце.

У рамках адукацыйнага праекта «Музыка і зоркі» ў мінскім планетарыі адбудзецца музычная праграма TRIANGLE. Вы зможаце адправіцца ў неверагоднае гукавое падарожжа, якое суправаджаецца паўнакупальным відэашэрагам і якое дазволіць цалкам расслабіцца і сысці ад паўсядзённых клопатаў.

Створаная рамантычная абстаноўка робіць гэты канцэрт ідэальным месцам для спаткання з каханым чалавекам ці проста для таго, каб сустрэцца з самім сабой у спакойным становішчы.

У мінскім касцёле Святога Роха праходзіць традыцыйны фестываль духоўнай музыкі «Калядныя вечары на Залатой Горцы». Яшчэ можна завітаць на выхадных.

У суботу, напрыклад, будзе вечар арганнай музыкі. У праграме – Бах і Леменс, граць будзе Ірына Арлоўская.

У нядзелю – музыка Рэнесансу і барока. Выступяць ансамбль старадаўняй музыкі Brevis СШ №13 і вакальна-харавы ансамбль інтэрнацыянальнай музыкі «Прамень» Рэспубліканскага цэнтра нацыянальных культур. У праграме – творы ананімных аўтараў XIII–XVII ст., Гендэля, апрацоўкі традыцыйных беларускіх калядак.

Вас чакае шмат актыўнасцей для дзяцей і дарослых, майстар-класы, промазоны і розыгрышы, маркет, зоны з гадаванцамі, фуд-корт, фрысбі і іншыя выступленні з гульнямі і трэніроўкамі жывёл, галоўная сцэна з насычанай забаўляльнай праграмай, дабрачынныя зоны, у якіх можна даць прытулак новаму сябру, інтэлектуальныя і забаўляльныя актыўнасці, жывая музыка, а таксама вялікая колькасць забаў, прызоў і іншага.

У галерэі Міхаіла Савіцкага працуе анімалістычная выстава твораў з керамікі, шкла, дрэва, металу, каменю ZOOART.

Анімалістычная тэматыка – кірунак, які не страчвае папулярнасці. Упершыню за доўгі час аматары жанру ўбачаць значную калекцыю анімалістычных твораў, вельмі розных па ўзросце і па светапоглядзе мастакоў.

На выставе вас чакае больш за 100 твораў 44 беларускіх мастакоў, сярод якіх і прафесійныя мастакі, і студэнты.

У Нацыянальным цэнтры сучасных мастацтваў працуе адразу тры выставы.

«Моры рэальныя і выдуманыя. Беларускія літаратары на вакацыях». У фокусе экспазіцыі – фотаздымкі класікаў беларускай літаратуры Эдзі Агняцвет, Янкі Брыля, Уладзіміра Дубоўкі, Уладзіміра Караткевіча, Якуба Коласа, Янкі Купалы і Максіма Танка ў час летняга адпачынку (з фондаў Беларускага дзяржаўнага архіва-музея літаратуры і мастацтва).

Беларускія літаратары часта помняцца па сваіх афіцыйна-сумных партрэтах у школьных падручніках. А калі ўбачыць фота маладых Янкі Брыля ў Неапалі або Уладзіміра Дубоўкі і Янкі Купалы на пляжы ў Ялце – ці гэта зменіць уяўленне? Ці зменшыць дыстанцыю паміж чытачом і аўтарам?

Калядная выстава «Сузор’е вандроўніка». Праект нагадвае пра тое, што ў пэўным сэнсе кожны з нас – таямнічы вандроўнік, які крочыць сваім шляхам, не падобным на іншыя, пакідаючы свой адметны след у сузор’і чалавечых лёсаў.

Экспазіцыя знаёміць з працамі аўтараў, сярод якіх – жывапісцы Анатоль Кузняцоў, Віктар Шылко, Сяргей Катран, Віктар Ціханаў, скульптары Павел Герасіменка, Валерый Малахаў.

Персанальная выстава твораў Івана Козела «Іван Козел. Жывапіс». «Стрыманасць палітры і праца з вялікімі колеравымі адносінамі складаюць аснову творчай манеры Івана Козела. Напэўна, дзякуючы гэтай індывідуальнай рысе надзвычай плённым было творчае судакрананне маладога жывапісца з асобай і метадалагічным прынцыпам Міхаіла Савіцкага – “пісаць не побыт, а быццё”, адбіраць і супастаўляць элементы мастацкай формы, ніколі слепа не пераймаць прыроду і не капіраваць натуру. Паводле гэтай жывапіснай прэамбулы, мінімізацыя сродкаў твора не даніна экспрэсіянізму, а метад дасягнення адпаведнасці формы зместу…»

У Музеі вольнай Беларусі пройдзе лялечны спектаклік для дзетак «УГУ! Калядныя навіны лесу». Узрост гледачоў – 4+.

У лесе адбываюцца незвычайныя падзеі: па начах нехта палохае ўсіх звяроў. Адважная карэспандэнтка Вавёрка бярэцца даследаваць сітуацыю і зрабіць найвыбітнейшы рэпартаж. Вас чакае казка пра тое, як усім важна разумець адзін аднаго і не толькі.

Час танчыць, вадзіць «казу» ды марыць. Нашы продкі на Шчодрык гатавалі смачную ежу, апраналі самую прыгожую вопратку, спявалі, шчадравалі ў масках ды варажылі на каханне. Людзі верылі: у гэту ноч усе жаданні здзейсняцца. Таму рыхтуйце свае маскі і далучайцеся да свята продкаў.

Абяцаюць танцы і спевы, 2 сцэны, 20 музыкаў, маркет і фуд-корт, забаўкі для дзетак, тэхна-рэйв. А вось хто зайграе: Dorn Ivan is djing, Šuma feat. Spievy & Kasary, Iva Sativa, Sw@da x Niczos, Bayski, Kipah, Papa Bo Selektah, Love Machine і шмат хто яшчэ!

Беларусікаў Варшавы клічуць на навагодні лялечны спектаклік «Казачны домік». Рэкамендаваны ўзрост: ад 3 да 9 гадоў.

Падчас спектакля дзетак чакаюць Зайка-трусішка, касалапы Мішка, смелы Пеўнік, хітрая круцілька Ліса і дурны Воўк. Разам з героямі можна будзе павесяліцца, паспяваць, патанчыць, а таксама дапамагчы героям спраўляцца з цяжкасцямі і нават спячы самага сапраўднага калабка.

У нядзелю ў беларускай кавярні Kult Kawy адбудзецца адкрыццё выставы беларускай мастачкі Наталлі Бяляевай.

На адкрыцці вас чакае нясумная творчая гутарка мастачкі з куратаркай выставы, мастацтвазнаўцай Эльвірай Каралёвай.

У Мазавецкім інстытуце культуры ў Варшаве адбудуцца майстар-класы Лабараторыі руху, дзе можна будзе навучыцца кантактнай імправізацыі і музычнаму джэму. Правядзе імпрэзу перформер і танцор Лукаш Вуйціцкі, а з ім музыкі Себасцьян Свёндэр і Аляксей Варсоба, знакаміты беларускі акардэаніст-імправізатар, заснавальнік гурта Port Mone.

У праграме: 18:00–19:30 – майстар-класы/урок кантактнай імправізацыі (па рэгістрацыі); 19:40–21:30 – джэм з жывой музыкай (уваход вольны).

У суботу ў беларускай культурнай прасторы CreateCulture Space пройдзе лекцыя пра ўкраінскія зімовыя традыцыі – напэўна, там будзе шмат агульнага з беларускімі. А калі не, то ў любым выпадку карысна пашырыць далягляд. Таму, калі разумееце ўкраінскую мову, запісвайцеся на імпрэзу.

Тэатральная школа Eteris (першая тэатральная студыя ў Літве і ў свеце, якая ставіць спектаклі з рускамоўнымі дзецьмі і падлеткамі на літоўскай мове) запрашае на бясплатны майстар-клас «Тэатр + літоўская».

На майстар-класе дзеці змогуць пазнаёміцца з сучасным метадам навучання праз гульню, а таксама ўбачыць, як можна займацца тэатрам і пры гэтым вучыць літоўскую.

З 15:00 да 16:00 пройдзе майстар-клас для дзяцей 9–11 гадоў, а з 16:00 да 17:00 – для падлеткаў 12–15 гадоў.

Колькасць месцаў на майстар-класы абмежавана, таму запісвайцеся па тэл.: +370 69 22 95 13.