Куды пайсці ў выхадныя 10–12 сакавіка ў Мінску, Варшаве, Вільнюсе і іншых гарадах, дзе жывуць беларусы

У Нацыянальным цэнтры сучасных мастацтваў ладзяць artist-talk з фатографам Вадзімам Качаном у межах выставы «Джаз! Каты! Вясна!».

Спадар Вадзім – адзін з тых, чыімі вачыма мы глядзім цяпер на Мінск васьмідзясятых і дзевяностых (ды і на сучасны таксама), таму цікава будзе паслухаць.

Кінаклуб #CinemascopeАнталогія запрашае на прагляд фільмаў у музеі Азгура. У пятніцу будуць паказваць «Жанчыну ў пясках» Хірасі Тэсігахара (1964).

Па сюжэце энтамолаг-аматар Нікі Дзюмпэй спазняецца на апошні аўтобус, і мясцовыя жыхары запрашаюць яго пераночыць у іх вёсцы ў хаце ў маладой жанчыны. Дом знаходзіцца на самым дне ямы ў пяску, куды Дзюмпэя спускаюць па вяровачнай лесвіцы. На наступную раніцу энтамолаг выяўляе, што лесвіца знікла, а ён аказаўся палонным у гэтай яме і цяпер павінен дапамагаць жанчыне выграбаць пясок, які пастаянна наносіцца пясчанымі бурамі.

Гісторык моды Вольга Харашылава раскажа, як у моду ўвайшоў секс, чаму дзяўчаты пераапраналіся ў хлопчыкаў, а мужчыны насілі жаночыя сукенкі. Чаму Шанэль не вынаходзіла маленькую чорную сукенку і за што яна ненавідзела Жана Пату. Як адбіткі пальцаў дапамагалі Мадлен Віёне, а Рэнесанс дапамог Жане Ланвен. Чаму Гітлер насіў маленькія вусікі і як з’явіўся нацы-шык.

З 10 па 19 сакавіка ў Мінску пройдзе фестываль Gastrofest St. Patrick’s Day by Jameson, да якога ўдзельнікі рыхтуюць меню ў стылі ірландскага свята. Кошт фестывальных сэтаў гэтым разам – 25 руб. Усе сэты і ўдзельнікаў можна паглядзець у Instagram.

Праект Cinemascope паказвае рэтраспектыву фільмаў на Кастрычніцкай. У суботу, напрыклад, можна будзе паглядзець «Ваенна-палявы шпіталь» Роберта Олтмана (1970).

Рэжысёр сфарміраваўся ў эпоху Новага Галівуда – асаблівага перыяду ў гісторыі амерыканскага кіно, які зарадзіўся ва ўмовах крызісу 60-х, калі самыя распаўсюджаныя на той момант жанры (вестэрн і пеплум) перасталі знаходзіць водгук у аўдыторыі.

Эпоха Новага Галівуда адрознівалася небывалай творчай свабодай у рамках студыйнай сістэмы: аўтараў не абмяжоўвалі ні ў выбары тэм, ні ў тым, як іх падаваць, дзякуючы чаму амерыканскія карціны таго часу практычна сцёрлі грань паміж камерцыйным і інтэлектуальным кіно.

У нядзелю ў «Вершах» можна будзе падзяліцца сваімі жывымі раслінамі, забраць іншыя. А яшчэ будзе майстар-клас па пляценні вясновых вянкоў.

У музеі гісторыі беларускай літаратуры адкрылася файная выстава «Казкі з маляванак» сумесна з Віцебскім абласным цэнтрам народнай творчасці. На экспазіцыі можна пабачыць маляваныя дываны мастачак Віцебшчыны, а таксама кнігі беларускіх казак з фондаў музея.

Лейтматыў экспазіцыі – беларускі нацыянальны фальклорны тэкст (казкі) у спалучэнні з наіўным выяўленчым мастацтвам – маляванымі дыванамі. Куратарка выставы – Ірына Князева.

У прасторы Upgrade адбудзецца літаратурна-музычны вечар «Трэці званок» ад моладзевага тэатра Ad libitum. Вас чакаюць мастацкае чытанне ад удзельнікаў Ad libitum, запрошаныя госці з аўтарскімі песнямі і не толькі, інтэрактыўныя акцёрскія трэнінгі, экспромт, музіцыраванне, адкрыты мікрафон.

Дададзім толькі, што Аd libitum – новая тэатральная адукацыя, дзе сабраліся маладыя, закаханыя ў тэатр людзі, якія хочуць прыбраць рамкі паміж гледачом і акцёрам. Павінна быць цікава!

4roomclub ладзіць незвычайны квэст у краязнаўчым музеі. Квэст пройдзе ў абноўленай экспазіцыі «Прырода» і будзе інтэрактыўны: у некаторых заданнях выкарыстаны экспанаты і тэхнічныя сродкі, якія можна і трэба кранаць падчас гульні.

На квэсце будзе размежаваны старт каманд. Гуляць можна камандамі ад двух да чатырох чалавек. Квэст не патрабуе спецыяльных ведаў ці навыкаў. Галоўнае – не забудзьце зараджаны тэлефон з выхадам у інтэрнэт.

Да канца наступнага тыдня ў Брэсце яшчэ працуе штогадовая традыцыйная выстава маладых мастакоў «Усе разам». І як штогод, тут цікава, драйвова ды арыгінальна.

У нядзелю бібліятэка імя Карскага ладзіць шпацыр «Жаночы след у гісторыі Гродна», прымеркаваны да Міжнароднага жаночага дня.

Шпацыруючы па вуліцах Гродна, вы даведаецеся пра жанчын, якія пакінулі значны след у гісторыі горада: Бона Сфорца, Саламея Дэшнер, Соф’я Кёніг, Эліза Ажэшка, Зоф’я Налкоўская і многія іншыя. І вядома, убачыце славутасці, звязаныя з гераінямі.

На лекцыі вы даведаецеся, якія ёсць тэатры ў Варшаве, якія спектаклі сапраўды варта паглядзець, як падрыхтавацца да паходу ў тэатр, каб не шкадаваць пра згублены час і грошы.

У суботу гурт «Дай дарогу!» і асабіста Юрый Стыльскі граюць доўгачаканы электрычны канцэрт у Варшаве. Абяцаюць толькі правераныя часам баевікі і новы сінгл. Адмысловы госць – Direktor DJs.

Стваральнікі назвалі свой спектакль «чытаклем» – спалучэннем спектакля і сцэнічнага чытання. Насамрэч гэта паўнавартасны спектакль, заснаваны на асабістых успамінах і сведчаннях людзей, мірных жыхароў, якія змагаліся за сваё жыццё ва ўмовах вайны ва Украіне. Тут і гісторыі бежанцаў з Кіева і Вінніцы, і вопыт эміграцыі ў Румыніі і Германіі, і ўзгадванне трагедыі Бучы і Марыупаля.

«Беларускі моўны клуб» запрашае на другую сустрэчу беларускамоўнага нетворкінгу. Гэта добрая магчымасць папрактыкаваць беларускую мову, знайсці новых сяброў ды сустрэць аднадумцаў.

Падчас нетворкінгу ўдзельнікі расказваюць пра сябе, а потым абмяркоўваюць простыя пытаннні і такім чынам знаёмяцца паміж сабой, добра бавяць час за размовамі па-беларуску. А яшчэ кожны ўдзельнік будзе мець магчымасць расказаць пра ўласны праект ці зрабіць абвестку.

Фундацыя «Кут» ладзіць у Познані сустрэчу з медыя «Цячэ» пра гісторыю і культуру Беларусі. Сузаснавальніца праекта Алена Каховіч раскажа пра забароненыя тэмы, пошукі малавядомых ракурсаў беларускай гісторыі, значнасць візуалу, новыя фарматы і гумар.

«Цячэ» расказвае пра гістарычнае мінулае Беларусі, якое нечакана адлюстроўвае тое, што ў нас адбываецца і цяпер.

У нядзелю беларусы Кракава будуць гукаць вясну – у хатцы на беразе возера Крыспінуў у 15 кіламетрах ад горада. Гукаць будуць талакой: няма выканаўцаў і гледачоў – удзельнічаюць усе!

У праграме: распальванне вогнішчаў, веганскі плоў (гатуюць усе!), глінтвейн і зёлкавая гарбатка; варштат па вырабе папяровых птушак; абрад гукання вясны, спевы; беларускія народныя танцы; музычны джэм/open stage ля вогнішча.

У пятніцу ва Вроцлаве пройдзе творчы вечар Дзяніса Дудзінскага. Будзе прэзентацыя кнігі і літаратурны стэндап з элементамі эпісталярнага хуліганства.

Білеты можна загаддзя набыць па нумарах +48 532 879 008 і + 48 451 650 346 альбо звярнуўшыся да ksu_2023_sha ці @ValiaRudyka ў Telegram. На ўваходзе будзе ўжо даражэй.

У суботу завітвайце ў CreateCulture Space на паэтычны вечар «Цела і кроў». Добрая нагода сесці разам і прачытаць свае ці чужыя ўлюбёныя тэксты, атрымаць фідбэк ці проста пабыць побач ва ўразлівасці і чуллівасці.

Тэма вечара – цела і кроў. Цела метафарычнае і літаральнае, кроў сэрца ці думак. Прапануюць даследаваць, як гэта – жыць чалавекам і несці сябе з сабой. Таксама будзе час для адкрытага мікрафона і гарбаты.

Як зрабіць сваю скуру ззяючай здароўем пасля зімы? Якія сродкі дадаць у догляд, а якія адкласці? Ці ёсць асаблівыя працэдуры для абнаўлення скуры ў гэты час года?

Гэтыя і іншыя пытанні будуць узняты на нефармальнай сустрэчы «Практычная касметалогія». Будзе шмат жывых зносін у фармаце пытанняў і адказаў. Абяцаюць разабраць усе памылкі дамашняга догляду і знайсці самыя эфектыўныя рашэнні.