Куды пайсці ў вялікія выхадныя 5–9 мая ў Мінску, Варшаве, Вільнюсе і іншых гарадах, дзе жывуць беларусы

Плэйбек – гэта тэатр гісторый гледачоў. Ён нарадзіўся на стыку псіхалогіі і імправізацыі ў Нью-Ёрку ў канцы сямідзесятых гадоў мінулага стагоддзя. Сэнс у тым, што гледачы з залы расказваюць свае гісторыі, а акцёры тут жа іграюць іх на сцэне.

Тэма перформанса гэтым разам: «Тварыць – значыць з пачуццём жыць».

Кожную суботу ў Lidbeer Dvor праходзіць фермерскі рыначак «Усё сваё», дзе збіраюцца лакальныя рамеснікі і прадаюць свае смачныя натуральныя вырабы. Можна знайсці хлеб, мяса і каўбасы, сыры і малочку, смакоцце і выпечку, натуральныя алеі і шмат чаго яшчэ. Забягайце!

Калі шукаеце файныя ўпрыгажэнні ці рэчы для дому, зазірніце на «Гарошак-маркет» у гандлёвым цэнтры Galleria Minsk. Там можна і цікавыя дызайнерскія рэчы знайсці, і мясцовых рамеснікаў сваёй купляй падтрымаць.

Каралі, завушніцы, ключніцы, кубкі, брошы – усё гэта і шмат чаго іншага знойдзеце на маркеце.

Яшчэ адзін фермерскі рынак адбудзецца ў гандлёвым цэнтры «МОМО». На першым паверсе і ў суботу, і ў нядзелю мінскія рамеснікі будуць гандляваць сваімі натуральнымі вырабамі.

Працуе кірмашык да 17:00, але лепш прыходзіць раней, пакуль усё не раскупілі.

Па панядзелках у бары StandUp сексолаг і два комікі збіраюцца на сцэне, каб даць рэальныя і смешныя парады пра секс і адносіны. Можна задаць ананімнае пытанне і атрымаць дапамогу, а можна проста прыйсці і весела пабавіць час.

Galleria Minsk прапануе паглыбіцца ў свет моды і стылю разам з прафесійнай стылісткай Ганнай Бацян. На экскурсіі вы даведаецеся, як падбіраць колеры вашаму колератыпу і спалучаць іх паміж сабой, дзе знайсці ідэальнае паліто альбо рамантычную сукенку, дзе купіць стылёвыя fashion-вобразы і іншае.

Удзел бясплатны, толькі не забудьце зарэгістравацца.

Ужо ў гэту пятніцу адкрывае сезон фуд-корт-пляцоўка «ЛУЧшая улица». І зноў у мінчан будзе летняе месца са смачнай ежай і цікавымі мерапрыемствамі. 5 хвілін ад метро і праз дарогу ад парка Чалюскінцаў і батанічнага саду – ідэальна, каб забегчы на перакус.

У галерэі «Універсітэт культуры» праходзіць персанальная выстава магістранткі Беларускага дзяржаўнага ўніверсітэта культуры і мастацтваў Ян Люцзін «Вобразы Кітая».

Карціны мастачкі паказваюць бязмежны, адушаўлёны, шматгранны свет пейзажаў Кітая, выкананы ў адпаведнасці з тысячагадовай традыцыяй кітайскага жывапісу.

Ніякіх спецыяльных мерапрыемстваў у батанічным садзе на вялікіх выхадных не будзе, але тым і лепш – можна спакойна прагуляцца па квітнеючых алеях і наглядзецца на вясну. Столькі зараз там прыгажосці!

Адно што звярніце ўвагу: бясплатна можна рабіць здымкі толькі на тэлефон. Калі захочаце прыйсці з камерай, трэба будзе дадаткова заплаціць (ад 30 руб.).

А вось тут у нас яшчэ і фотарэпорт ёсць.

Калі не хочацца заставацца ў горадзе, выпраўляйцеся ў падарожжа па роднай краіне. А ў нас ужо ёсць шмат гатовых маршрутаў на адзін-два дні. Выбірайце, што больш падабаецца, у нашых рубрыках «Куды паехаць па Беларусі», «Скарбы», «Як гэта любіць».

А калі любіце катацца на ровары, то і веламаршруты ў нас таксама гатовыя!

Калі настрой такі, што ісці ці ехаць нікуды не хочацца, – гэта таксама нармальна. На такі выпадак у нас ёсць шмат падборак клёвых серыялаў, якія дапамогуць вам добра пабавіць час.

А ў рубрыцы «Прыелася?» яшчэ і шмат рэцэптаў знойдзеце, каб глядзець кіно было смачней.

Беларускія рамеснікі збяруцца ў беларускім бары Beer Station Ursynów, каб парадаваць вас дызайнерскімі цікавымі рэчамі. Можна будзе прыйсці і паглядзець адразу ўсё: ад упрыгажэнняў і натуральнага мыла да ўбранняў і салодкіх пернікаў.

Прадаваць будуць самі рамеснікі, таму з імі можна будзе яшчэ і паразмаўляць.

У Музеі вольнай Беларусі адкрылася выстава «1000 дзён #», прысвечаная беларускаму палітыку, афіцэру, патрыёту Мікалаю Статкевічу.

Лідэр сацыял-дэмакратаў ад пачатку 90-х змагаецца за свабодную і дэмакратычную Беларусь, гэта ягоная чацвёртая судзімасць па палітычным артыкуле. Статкевіч прыгавораны да 14 гадоў пазбаўлення волі. Але гэта не проста прысуд за грамадзянскую пазіцыю – гэта рэанімацыя жахлівых сталінскіх вердыктаў за іншадумства. Больш за 2 месяцы ад яго няма ніякай інфармацыі.

У Познані з сольнай праграмай выступіць Ідрак Мірзалізадэ – рэзідэнт Stand Up Club #1, аўтар і ўдзельнік праектаў «Не все так однозначно», «ВечерВечер», «Порараз Бирацца», «Разгоны», удзельнік шоу «Открытый микрофон», Stand Up ды іншых. Абяцаюць, што будзе смешна.

У пятніцу беларускія комікі з суполкі «Пан Стэндап» едуць у Гданьск з пранізлівай і вогненнай праграмай «Дзе жыве Беларусь?». Жарты рыхтуюць Паша Радзевіч і Ягор Анісімаў. Схадзіце даведацца, а то цяпер і насамрэч незразумела...

З канцэртам у Вільнюс едзе любімы многімі беларускі бард Зміцер Вайцюшкевіч. Абяцае песні, гутаркі ды лямпавы беларускі нетворкінг.

У пятніцу ў 19:00 у беларускай прасторы CreateCulture Space адбудзецца адкрыццё выставы Людмілы Навакоўскай «Знойдзеныя сэнсы». Але калі на само адкрыццё трапіць не атрымаецца, не бяда. Паглядзець экспазіцыю можна будзе да 18 мая падчас працы прасторы.

У Батумі з канцэртам едзе Palina. Яна дасць канцэрт у бары BACKDOOR. Якія тут яшчэ словы патрэбныя?