Куды пайсці ў першыя выхадныя восені 1–3 верасня ў Мінску, Варшаве, Вільнюсе і іншых гарадах, дзе жывуць беларусы

Культурная прастора «Вершы» запрашае разам правесці лета і сустрэць восень пеністым і танцамі. Ствараць атмасферу будуць міксы ад DJ Nasuta. Пачынаюць у 21:00.

У Беларусі пройдзе адкрыты чэмпіянат па спартыўнай арніталогіі BirdRace-2023. На працягу 12 гадзін зарэгістраваныя каманды будуць шукаць птушачак па ўсёй краіне, каб убачыць як мага больш відаў.

Каб прыняць удзел, трэба сабраць каманду з 3 або 4 чалавек (не больш за аднаго ўдзельніка да 18 гадоў) і 2 верасня з 6-й раніцы да 6-й вечара выправіцца ў гонку за птушкамі на тэрыторыі Беларусі.

Калі хочаце паўдзельнічаць, але няма каманды, пішыце ў чат беларускіх птушкароў «Ціў-ціў» ды яднайцеся ў каманду з іншымі птушкарамі.

У суботу ў батанічным садзе ўжо ў пяты раз пройдзе буйное навукова-папулярнае мерапрыемства – фестываль навукі. Гэтым разам будуць прадстаўлены пляцоўкі мінулых гадоў і адкрыты новыя фарматы.

Упершыню на мерапрыемстве будзе арганізавана пляцоўка на стыку навукі і фантастыкі – зона Sci-fi. Тут вы ўбачыце, як навука ўплывае на масавую культуру і як масавая культура прапануе навуцы шляхі для развіцця.

Ezoo Fest – гэта вялікі фестываль для ўсіх аматараў хатніх жывёл, які ў чарговы раз гатовы сустрэць сваіх гасцей на пляцоўцы Lidbeer Dvor.

На фестывалі запланавана шмат актыўнасцей для дзяцей і дарослых: майстар-класы, промазоны і розыгрышы, маркет, фуд-корт, аджыліці, фрысбі і іншыя выступленні з гульнямі і трэніроўкамі жывёл, галоўная сцэна з насычанай забаўляльнай праграмай, дабрачынныя зоны, у якіх можна прытуліць новага сябра, жывая музыка, фотазоны і іншае.

На беразе Мінскага мора пройдзе Löwenbräufest – першае ў Беларусі свята нямецкай піўной культуры.

Вас чакаюць арыгінальнае піва, атмасфера кірмашу, яркі тэматычны дэкор і мноства актыўнасцей, як на самым сапраўдным баварскім свяце. Падрыхтуйцеся да смачных пачастункаў: традыцыйныя нямецкія брэцэлі, каўбаскі грыль, капуста, белыя мюнхенскія сасіскі і багацце соусаў.

Таксама запланаваны тэматычныя інтэрактывы і конкурсы, выступленне кавер-групы IODO Band, DJ-сэты, яркія фотазоны і іншае.

У нядзелю ў батанічным садзе другі раз пройдзе Family Sunday – кірмаш з займальнымі забавамі, прагулкамі, смачнай ежай і добрым настроем.

Вас чакаюць спартыўныя і тэатральныя пляцоўкі, робаты і малышковая зона, майстар-класы, драўляныя гульні і многае іншае. А таксама канцэртная праграма практычна на ўвесь дзень.

Палісаднік, кветнік, агародчык – у розных рэгіёнах Беларусі яго называюць па-свойму. Але гэта тое месца, дзе здаўна людзі стваралі своеасаблівы куточак раю – канцэнтрат прыгажосці з улюбёнымі раслінамі.

У творах Андрэя Карпянкова букеты паказаны дастаткова ўмоўна, што значна пашырае поле інтэрпрэтацый. Выявы спалучаюцца з дэкаратыўнымі фрагментамі, якія нагадваюць традыцыйныя беларускія тканыя посцілкі.

1 верасня ў Варшаве адбудзецца фестываль беларускай музыкі «ГРАЙ». Выступяць Volski, «Дай Дарогу!», Dzieciuki, J:Морс, :B:N: і The Superbullz. А падчас afterparty можна будзе патанчыць пад трэкі Papa Bo Selektah.

Таксама на фэсце будзе фуд-корт і арт-маркет з эксклюзіўнымі рэчамі ад беларускіх майстроў (карціны, адзенне, аксесуары, сувеніры з нацыянальнай сімволікай і іншае.

У пятніцу праект So People запрашае на кінавечар на летняй тэрасе. Будуць глядзець фільм Паўла Паўлікаўскага «Халодная вайна» – гісторыю немагчымага кахання ў немагчымы час.

А культурны аглядальнік раскажа, чаму гэты фільм выбралі намінантам на «Оскар» ад Польшчы і чаму чорна-белыя фільмы да гэтага часу прыцягваюць увагу гледача.

Фільм будзе на польскай мове з рускімі субцітрамі.

Восеньскі сезон беларускіх арт-маркетаў у Варшаве пачнецца у новым месцы. У нядзелю, 3 верасня, беларускія майстры і рамеснікі збяруцца ў Scena Chmielna.

Будзе шмат рознай біжутэрыі, свечкі, дэкор для дома, касметыка, адзенне, капелюшы і лялькі.

У Музеі вольнай Беларусі працуе выстава Rock Art, на якой прадстаўлены працы двух беларускіх рок-музыкаў – Лявона Вольскага і Юрыя Стыльскага. На экспазіцыі можна не толькі паглядзець карціны, але і набыць, калі нешта спадабаецца.

Выстава працуе штодзённа з 16:00 да 20:00.

Калі надакучыла сядзець у Варшаве, адпраўляйцеся ў Труймяста. Тым больш што на гэтых выхадных у Сопаце пройдзе вялікі Mara Fest – мультыкультурная музычная падзея на беразе мора, якая збярэ на адной сцэне лепшых артыстаў з Польшчы, Украіны і Беларусі.

Выступяць Sarsa, Brodka, Іван Дорн, NaviBand, Intelligency. У праграме: зоны актыўнасці, сустрэчы з папулярнымі блогерамі і інфлюенсерамі, актыўныя зоны для дзяцей, спартыўныя гульні і гульні на логіку, стэнды рукадзелля, зона ежы і напояў, музычная сцэна і галоўнае – дапамога ў зборы грошай для дабрачыннага фонду «Маша», які дапамагае жанчынам і дзецям ва Украіне.

Пачаць сваю восень можна з добрай музыкі, бо менавіта 1 верасня гурт Intelligency дасць вялікі канцэрт у Вільнюсе.

Білеты лепш купіць загадзя, бо на ўваходзе будзе крыху даражэй.

У суботу вас запрашаюць на фестываль «Вільнюс – мой горад», дзе вы зможаце бліжэй пазнаёміцца з інтэрнацыянальнымі культурна-сацыяльнымі праектамі Вільнюса.

А яшчэ там будуць прадстаўнікі культурнай прасторы CreateCulture Space, якія чакаюць вашай падтрымкі. Каманда прасторы раскажа цікавыя факты і абяцае падрыхтаваць крутыя інтэрактывы.