Куды пайсці ў выхадныя 20–22 студзеня ў Мінску, Варшаве, Вільнюсе і іншых гарадах, дзе жывуць беларусы

Вялікая барахолка будзе праходзіць чатыры дні – з чацвярга па нядзелю. Там можна будзе знайсці мужчынскія і жаночыя рэчы, абутак і аксесуары, торбы, посуд, кнігі, жывапіс, паштоўкі, пласцінкі, прадметы дэкору і іншае. Абяцаюць адборны вінтаж, сучасныя і рэтра-рэчы, несмяротную класіку.

Батанічны сад зноў адчыняе дзверы ў аранжарэі закрытага калекцыйнага фонду – трапіць туды можна будзе толькі ў пятніцу, суботу і нядзелю. Можна будзе пабачыць калекцыю сукулентаў, пазнаёміцца з баабабам, загадкавымі кактусамі, зазірнуць да цытрусавых і інш.

Працягласць наведвання – гадзіна. Падрабязнасці па тэл.: +375 29 320 17 17, +375 17 379 69 15.

Калі любіце рок, то правядзіце эксперымент і паслухайце любімыя кампазіцыі ў поўнай цемры. Будуць трэкі Deep Purple, Queen, Scorpions, Metallica і іншых выканаўцаў. А яшчэ цікавая інтэрактыўная праграма і добры настрой.

У суботу і нядзелю на першым паверсе ГЦ «МОМО» пройдзе фермерскі рынак, дзе збяруцца фермеры і рамеснікі са сваёй прадукцыяй. Будзе і мяса, і рыба, і сыры, і крафтавы хлеб, і алеі, і розныя смакоцікі. Арганізатары раяць не чакаць да вечара і прыходзіць раней, пакуль усё не раскупілі.

Японскі рэстаран Sakaguchi запрашае на майстар-клас, дзе вы зможаце навучыцца пісаць сваё імя з дапамогай унікальнага алфавіта.

У кошт уваходзяць усе неабходныя матэрыялы, навучанне і адна з незвычайных гарбат да выбару. Колькасць месцаў абмежавана, таму браніруйце ўдзел праз дырэкт ці па спасылцы.

У галерэі «ДК» праходзіць персанальная выстава маладой беларускай мастачкі Кацярыны Пашкевіч Collective Сonsciousness.

Арганізатары адзначаюць, што важным элементам экспазіцыі з’яўляецца спроба сумясціць буйнафарматны жывапіс і пошукі, стварыць сітуацыю камбінавання розных модуляў. Гэта становіцца часткай сэнсаўтваральнага элемента пра нараджэнне грандыёзнай містэрыі з шэпту; часткай фарміравання вялікага ў камернай сітуацыі.

Музей гісторыі рэлігіі кліча на экскурсію «Ад Рэйна да гродненскіх берагоў», прысвечаную нямецкім жыхарам Гродна. Вы даведаецеся, чаму самыя лепшыя прысмакі прадавалі ў аптэцы, які нямецкі архітэктар будаваў Новы Замак, дзе знаходзілася першая ў горадзе кавярня і іншае. А яшчэ ў праграме дэгустацыя сапраўднага венскага штрудзеля і канцэрт арганнай музыкі ў кірсе.

Запіс – праз дырэкт інстаграма музея альбо па нумары 718707.

На лекцыі будуць абмяркоўваць таямніцы і загадкі «Твін-Пікса», расказваць, як артхаўснаму рэжысёру ўдалося зняць адзін з самых паспяховых камерцыйных серыялаў 90-х і што азначае трэці сезон. На дэсерт абяцаюць адкрыць і абмеркаваць некаторыя таленты маэстра: напрыклад, можна будзе паслухаць яго кампазіцыі і паглядзець карціны.

Лекцыю чытаюць @juu.vas і Даша Брыян.

Цэнтр беларускай салідарнасці запрашае на творчую сустрэчу з адным з самых папулярных сучасных беларускіх пісьменнікаў Уладзімірам Арловым. Абяцаюць вясёлую і сур’ёзную размову пра стварэнне кніг, музычны сюрпрыз і аўтограф-сесію.

Таксама будзе прэзентацыя двух тамоў па-польску: «Паром праз Ла-Манш» і «Паручнік Пятровіч і прапаршчык Здань. Балады». І выступ вядомага беларускага музыкі, кампазітара і тэатральнага рэжысёра Рамана Арлова.

У нядзелю можна паспяваць, патанчыць і паадгадваць мелодыі. Збірайце каманду да 10 чалавек, рэгіструйцеся па спасылцы – і не сумуйце напярэдадні працоўнага тыдня.

У сераду, 18 студзеня, у Варшаве адкрываецца выстава беларускай мастачкі Ташы Кацубы «209 дзён шэрасці: смерць цела, неўміручасць духу».

Летам 2021 года Таша пераехала з Беларусі ва Украіну. Зусім без рэчаў і матэрыялаў жыла ў невялікім здымным пакойчыку ў Кіеве. Каб неяк праявіць сябе і адчуць сябе патрэбнай, зноў пачала ствараць. З нічога. Без колеру. Мастачка паўгода збірала аповед пра тое, што адчувала ў эміграцыі.

Праз два месяцы пасля пачатку вайны Таша адправілася ў другую эміграцыю – у Польшчу. І гэта выстава – спроба адлюстраваць хаця б малую частку таго, што перажываюць людзі, якія страцілі дом і блізкіх. Незалежна ад часу і месца.

Алесь Лютыч, фронтмэн гурта :B:N, грае канцэрт у Лодзі. Вас клічуць атрымаць асалоду ад музыкі і беларускай сяброўскай атмасферы.

Білеты можна будзе набыць наяўнымі на ўваходзе, але абавязкова зарэгіструйцеся.

Юрый Стыльскі і гурт «Дай Дарогу» едуць да беларусаў Вроцлава. Абяцаюць электрычную праграму і толькі правераныя часам хіты. Не прапусціце!

У нядзелю комік Андрусь Райн завітае ў Познань з сольным стэндап-канцэртам на беларускай мове. Андрусь больш за 8 гадоў у стэндапе, і вы можаце ведаць яго па шоў «Безкаца» і «Беларускі стэндап». Кампанію коміку складзе Ян Ліпай.

У Вільнюскім старым тэатры граюць «Самотны чалавечы голас» паводле «Чарнобыльскай малітвы» Святланы Алексіевіч. У спектаклі выкарыстаны толькі адзін фрагмент кнігі. Актрысу Аляксандру Метальнікаву захапіў маналог жанчыны, удавы загінулага ліквідатара, пра іх каханне і пра тое, як катастрофа здолела прымусіць яго загучаць і разгарэцца яшчэ мацней.

Амаль кожны дзень у Вільнюсе адбываюцца заняткі па ёзе, якія ладзяць беларусы. У пятніцу, напрыклад, можна прыйсці раніцай а 7-й гадзіне ці ўвечары а 18-й. У нядзелю заняткі запланаваны на 11:00. Працягласць усіх практык – 1,5 гадзіны, якія вы можаце прысвяціць сабе. Рэгістрацыя тут.

Дэгустацыя ў фармаце гульні для тых, хто любіць віно. Пад кіраўніцтвам прафесійнага самелье Паўла Манцэвіча ўсе ўдзельнікі збяруцца за сталом і будуць спрабаваць адгадаць, які гатунак віна зараз у келіху. Па выніках будзе выбраны пераможца.