Куды пайсці ў выхадныя 13–15 студзеня ў Мінску, Варшаве, Вільнюсе і іншых гарадах, дзе жывуць беларусы

Літаратурны музей Петруся Броўкі запрашае на імпрэзу «Курганная кветка», прысвечаную паэтцы Канстанцыі Буйло – першай паэтцы беларускай літаратуры, «якая не баялася пець пра жаданне асабістага шчасця». Яе раннія вершы напоўнены нечаканай для беларускай літаратуры «эратычнай інтуіцыяй», як цікава заўважыў Антон Луцкевіч.

Запрашаюць усіх, хто раней увогуле не танчыў ці мае ў танцах зусім невялічкі досвед. На майстар-класе вы зможаце засвоіць базавыя крокі, даведацца пра ўзаемадзеянне ў пары і пазнаёміцца з іншымі ўдзельнікамі. І не хвалюйцеся: там будуць такія ж самыя навічкі.

Вас клічуць адпачыць пасля навагодніх святаў на адпаведнай вечарыне, якую так і назвалі – «Адпачынак». Абяцаюць добрую музыку, напіткі на бары і прыемную атмасферу.

Батанічны сад кліча на інтэрактыўны практыкум па вырошчванні пакаёвых раслін. На мерапрыемстве даведаецеся, якія віды лепш за ўсё падыходзяць для дома і як іх вырошчваць.

Працягласць мерапрыемства – 2 гадзіны. Папярэдні запіс не патрэбны, але пытанні можна задаць: +375 29 320 17 17, +375 17 379 69 15.

Lidbeer Dvor працуе апошнія дні – потым закрыецца аж да мая. Падрабязную праграму мерапрыемстваў глядзіце ў апісанні да паста. Ад сябе толькі дададзім, што будзе шмат цікавага: і кросінг падарункаў, і квэст для дзяцей, і жывая музыка, і нават фермерскі маркет. А ў нядзелю яшчэ і вялікае закрыццё з вядучым і падарункамі.

У Мірскім замку пройдзе традыцыйны калядны баль. Таямнічыя маскі і сілуэты, вытанчаныя ўборы і жывая музыка – дазвольце сабе заблукаць у XVIII стагоддзі. Вас чакаюць танцавальныя майстар-класы, прыемныя сюрпрызы і фуршэт.

Дрэс-код: для спадароў – строгі гарнітур, для спадарынь – сукенка (пажадана ў стылі XVIII стагоддзя) і абутак без абцасаў.

У пятніцу, на Шчодры, філіял Веткаўскага музея ў Гомелі ладзіць традыцыйны паход гаманкім-звонкім гуртом у горад. У кампаніі Казы і Мядзведзя з традыцыйнымі спевамі і вясёлымі зычэннямі пойдуць на базар!

Абяцаюць весялуху, спевы, танцы, гульні – а можа, і пачастункі. Традыцыя патрабуе пераўвасобіцца ў нейкага персанажа, таму захапіце стракатую хустку, незвычайны капялюш, размалюйце твар – і далучайцеся.

Берасцейскі сталярны каворкінг «Вжух» паўтарае файны майстар-клас, на якім вы навучыцеся майстраваць простыя ды ладныя кармушкі для птушак. Майстар дапаможа на кожным этапе працы. Працягласць – 2 гадзіны. Дзецям таксама можна.

У варшаўскім Новым тэатры іграюць спектакль «1,8 м» драматурга і рэжысёра Івана Вырыпаева, прысвечаны беларускім палітвязням. 1,8 м – менавіта столькі плошчы даводзіцца на аднаго зняволенага ў беларускіх турмах. Спектакль заснаваны на тэкстах, якія палітвязні агучвалі ў судах і пісалі ў лістах родным.

Як цяпер жывуць людзі, якія сядзелі ў турме за выказванне свайго меркавання? Як атрымалася, што ў цэнтры Еўропы так пачварна гвалтуюць закон? Спектакль іграюць беларускія ды польскія акцёры на польскай, беларускай, рускай мовах.

«Менскі шпацыр», які вадзіў мінчан ачмурэннымі маршрутамі па горадзе, цяпер перабраўся ў Варшаву і ператварыўся ў «Варшаўскі шпацыр». Таму ў суботу вас клічуць далучыцца да дэбютнага шпацыру па беларускай Варшаве.

Падчас шпацыру вы пабачыце палацы, вуліцы і скверы, помнікі, звязаныя з нашымі суайчыннікамі, жыццёвы шлях якіх яднае гісторыю двух народаў. І даведаецеся пра іх процьму гісторый!

Суполка беларускіх комікаў Pan Standup дае першы ў новым годзе беларускамоўны стэндап у Варшаве. Выступаюць Міхась Ільін, Ягор Анісімаў і Дзіма Нарышкін.

Ва Вроцлаў з музычным калядным спектаклем «Маленькая чэмпіёнка» едуць Андрусь Такінданг і Аквалерыя. Вас чакае чароўная гісторыя пра дзяўчынку Ніну і яе калядныя прыгоды. А яшчэ, вядома ж, песні, забаўкі, гульні ды шмат іншага!

Паэтычны вечар – магчымасць сесці разам і прачытаць свае ці чужыя любімыя тэксты, атрымаць фідбэк ці проста пабыць побач. Тэма вечара – пошук і настальгія, станы, агульна актуальныя для беларускіх творцаў і слухачоў. За вечар можна будзе паслухаць тэксты маладых аўтарак і аўтараў, выступіць на адкрытым мікрафоне, паспачуваць і выпіць гарбаты.

Cuddle Therapy – гэта мерапрыемства, дзе ў прыязнай, бяспечнай абстаноўцы, у атмасферы цяпла і прыняцця можна даследаваць сябе ў тактыльным, НЕ сексуальным кантакце з іншымі людзьмі. Гэта спосаб папоўніць базавыя патрэбы ў цяпле, дотыку, а таксама навучыцца адкрыта выказваць свае жаданні, казаць «хачу» і «не хачу».

Swap Рarty – гэта ўтульная вечарына з пераапрананнямі і сяброўскім абменам непатрэбнымі рэчамі. У кожнай і кожнага ў гардэробе ёсць тое, што ўжо не такое любімае, як раней. Вось гэта ўсё можна прыносіць з сабой: адзенне, аксесуары, абутак і іншае (нават расліны).

Аранізатары прапануюць абменьвацца рэчамі, пазбаўляцца ад лішніх, прымяраць новыя стылі і заводзіць новыя знаёмствы – і ўсё гэта пад гарбату і ламбруска. Усе сабраныя на мерапрыемстве грошы і рэчы, якія застануцца, будуць перададзены на дабрачыннасць.