Выдавецтва «Тэхналогія» падрыхтавала спіс кніг для летняга чытання: беларуская класіка, сучасная літаратура і нават школьная праграма – выбірайце нешта для сябе!
1. Творы замежнай літаратуры для дадатковага чытання ў 10–11-х класах. 19,60 руб.
У кнігу ўвайшлі творы сусветна вядомых класікаў амерыканскай і аўстрыйскай літаратуры.
2. Фелікс Акерман, «Аўташкола па-віленску». 30,80 руб.
Пажыўшы ў Гародні, Варшаве і Вільнюсе ды размаўляючы на мовах гэтых краін, нямецкі гісторык і падарожнік Фелікс Акерман прапануе ўнікальную перспектыву нашага кутка Еўропы.
У аўтарскія замалёўкі ўплецены гісторыі беларусаў, літоўцаў, яўрэяў, караімаў, прусаў, немцаў, брытанцаў, сірыйцаў – і з гэтай мяшанкі паўстае неадназначны, але бліскучы вобраз сучаснай Еўропы.
3. Антоні Лібера, «МАДАМ». 26,50 руб.
Падзеі рамана адбываюцца ў 1960-я гады, якія апісваюцца з доляй горкай іроніі і шчымлівай настальгіі. Апавядальнік, малады чалавек, вучань выпускнога класа, захапляецца настаўніцай французскай мовы і спадзяецца на ўзаемнасць, таму пачынае не толькі марыць, але і дзейнічаць, уключаючы ўвесь свой інтэлект і абазнанасць у паэзіі, музыцы і правілах шахматнай гульні.
4. Вінцэсь Мудроў, «Меліярацыя з Альбэрам Камю». 18,40 руб.
10 апавяданняў, у якіх аўтар піша пра нашы дні і згадвае часы маладосці. Выдатная мова, дарослыя сюжэты і гурманскі наклад кнігі: толькі 150 асобнікаў.
5. Мікола Адам, «Дачка». 32,20 руб.
Гэта гісторыя Майстра і Маргарыты ў сучасных умовах, дзе каханне перамешана з нянавісцю, а давер – са здрадай, і толькі сяброўства ды любоў не даюць упасці долу, калі зусім не стае сіл.
6. Уладзімір Караткевіч, «Хрыстос прызямліўся ў Гародні». 44,90 руб.
Уладзімір Караткевіч, які пісаў раман у эпоху ваяўнічага атэізму, здолеў расквеціць свой твор цытатамі з Евангелля і апісаннямі цудаў, якія творыць гарадзенскі Хрыстос. Не забыўся пісьменнік і пра цмокаў, што насялялі калісьці Лепельскае возера. Урэшце Караткевіч прывёў свайго героя ў рай, які вельмі нагадвае заможны беларускі падворак…
7. Галіна Багданава, «Паляванне на Любаву». 12,50 руб.
Інтымная хроніка часоў міжвер’я, дзеянне якой адбываецца ў розныя перыяды беларускай гісторыі, калі кожны змушаны быў вызначаць для сябе і веру, і свае паводзіны, але галоўным заставаўся найважнейшы Божы дар – Любоў і Каханне.
8. Узі Вайль, «Буржуазія задаволена не да канца». 12,50 руб.
У кнізе сабраны апавяданні і скетчы аўтара, якія моцна розняцца паводле метаду: адны з іх – рэалістычныя, іншыя – фантастычныя, трэція – містычныя, але ўсе яны маюць справу з няўлоўнай сутнасцю шчасця, кахання, смерці і болю.
Перадрук матэрыялаў CityDog.io магчымы толькі з пісьмовага дазволу рэдакцыі. Падрабязнасці тут.