Беларуская прыродаахоўная ініцыятыва прапануе школьным класам дапамагчы рэдкаму чорнаму буслу: бацькі і настаўнікі могуць сабраць грошы на спецыяльную гнездавую платформу – «буслянку», якую ўсталююць у лесе для чырванакніжнай птушкі.
У Instagram-акаўнце wildlife.belarus расказалі пра новую ініцыятыву для школьнікаў і іх бацькоў. Там прапануюць класам разам аплаціць усталяванне «буслянкі» – штучнай платформы для гнязда чорнага бусла, якога ў Беларусі лічаць рэдкім відам і Птушкай года 2026.
Аўтары праекта тлумачаць, што нават у добрых лясах для кармлення чорным буслам часам не хапае месцаў для гнездавання. Таму спецыялісты ўсталёўваюць на дрэвах спецыяльныя платформы, якімі птушкі могуць карыстацца дзесяцігоддзямі.
Падтрымаць праект можна праз «Дзікі маркет», дзе прадаюць сімвалічныя «галінкі» для буслянкі. Адна такая «галінка» каштуе 45 рублёў. Калі арганізатары збяруць 23 «галінкі», эксперты зробяць штучнае гняздоўе для чорнага бусла ў прыдатным месцы, а фотасправаздачу апублікуюць у сацсетках.
Кожны, хто купіць «галінку», атрымае калекцыйны металічны значок з чорным буслом. Арганізатары таксама абяцаюць паведаміць, калі ў буслянцы нехта загняздуецца.
Ідэю прапануюць абмяркоўваць у школьных і бацькоўскіх чатах як спосаб разам зрабіць добрую справу і дапамагчы рэдкай птушцы.
Перепечатка материалов CityDog.io возможна только с письменного разрешения редакции. Подробности здесь.
