У працяг нашага кулінарна-гістарычнага праекта запрашаем вас на прэзентацыю публікацыі з рэцэптамі смачнага Мінска, а таксама невялікі кулінарны фестываль. Вы можаце таксама прынесці сваю страву, пачаставаць удзельнікаў фестывалю і падзяліцца адной са сваіх сямейных гісторый.
Афрыканскае Дзяцінства з баршчом
свініна на костцы, буракі, бульба, капуста, цыбуля, морква, часнок, памідоры, лімон, чарнасліў, перац, смятана
Гэта наш, «ладыгінскі» боршч ад мамы. Сямейная традыцыя. Яна родам з Архангельска, але гатавала гэты боршч па ўсім свеце: мы шмат пераязджалі з краіны ў краіну. Нават у Афрыцы варыла менавіта яго. Мне здаецца, што боршч знаходзіцца па-за геаграфічнымі і палітычнымі межамі. Па-за залежнасцю ад сапраўднай радзімы гэтага супу, БОРШЧ ЯДУЦЬ УСЕ.
Адсуньце свой самы вялікі рондаль убок і вазьміце другі па памеры. Гэта вельмі важная дэталь.
Звычайна я расцягваю прыгатаванне гэтага супу на два дні – каб не спяшацца і даць мясу праварыцца і настаяцца. Увечары пастаўце варыцца свініну на косцы, па памеры кавалак павінен займаць траціну рондаля. Адначасова ў другім рондалі пастаўце варыцца буракі (пару штук, каб па аб’ёме яны былі прыкладна роўныя з мясам).
Прачнуўшыся з усмешкай прадчування на твары, дастаньце мяса, пастаўце булён на агонь і дадайце пару-тройку бульбінаў (абабраных і пакроеных на кубікі 2-3 см) і нашаткаваную тонкай саломкай капусту (па аб’ёме – траціна аб’ёму мяса).
У гэты час – зрабіце смажонку: пару дробна накроеных цыбулінаў, нашаткаваную моркву, 4-5 пасечаных зубкоў часнаку – абсмажце да залацістасці і мяккасці, дадайце пару абабраных і дробна нарэзаных памідораў (прашу вас, не выкарыстоўвайце кансерваваныя!) і нашаткаваныя буракі (палітыя сокам лімону – для захавання колеру), і ў самым канцы – жменю пасечанага чарнасліву. (Так! Чарнасліў! Паспрабуйце!)
Цяпер вы можаце выкласці смажонку ў суп, Але… вы зразумееце, што супу цесна ў рондалі. І тут – вуаля – вы дастаяце спецыяльна пакінуты рондаль, і цяпер з лёгкасцю змесціце і смажонку, і булён з бульбай і капустай, і невялікія кавалкі мяса.
Дадайце перац, часнок і смятану. Соль я практычна не выкарыстоўваю – лічу, што варанае мяса мае салёны смак, але калі неабходна – дадайце на смак…
Я шмат разоў спрабавала варыць менш па аб’ёме, аднак, боршч павінен быць звараны ад усяго сэрца, таму рондаля заўсёды было мала. Толькі такі боршч варты кожнай хвіліны чакання – па словах Спадара С.
Запрашаем на стол, Ваша Вялікасць Боршч!
